Bìoball air-loidhne

Bîn-sò͘-kì 6 - 現代台語譯本羅馬字版

Ná-sè-ní-lâng ê Tiâu-lē

¹ Siōng Chú hoan-hù Mô͘-se

² tùi Í-sek-lia̍t-lâng soan-pò͘: Nā ū lâng, bô-lūn lâm-lú, hē te̍k-pia̍t ê goān beh chòe Ná-sè-ní-lâng, chiong ka-kī hiàn hō͘ Siōng Chú,

³ án-ni, i po̍h-chiú kap kāu-chiú, í-ki̍p ēng po̍h-chiú kāu-chiú chòe ê chhò͘, lóng m̄-thang lim, mā m̄-thang lim phû-tô-chiap, m̄-thang chia̍h phû-tô kap phû-tô-koaⁿ.

⁴ Tī hē-goān kî-kan, phû-tô-chhiū só͘ chhut--ê, sīm-chì chí kap phê, lóng m̄-thang chia̍h.

⁵ I tī hē-goān chòe Ná-sè-ní-lâng kî-kan, m̄-thang thì-thâu; kàu i chiong ka-kī hiàn hō͘ Siōng Chú ê ji̍t-kî móa í-chêng, tio̍h hun-pia̍t-choh-sèng, chhut-chāi thâu-mn̂g hoat-tn̂g.

⁶ Tī i chòe Ná-sè-ní-lâng hiàn hō͘ Siōng Chú ê kî-kan, m̄-thang óa-kūn sin-si.

⁷ Chiū-sī pē-bú, hiaⁿ-tī chí-bē sí, i mā m̄-thang ūi-tio̍h in ê sin-si hō͘ ka-kī bô chheng-khì, in-ūi i ê thâu-khak ū chòe Ná-sè-ní-lâng hiàn hō͘ Siōng-tè ê kì-hō.

⁸ Tī i chòe Ná-sè-ní-lâng ê kî-kan, i sī kui hō͘ Siōng Chú chòe sèng.

⁹ I ê sin-piⁿ nā hut-jiân ū lâng sí, tì-kàu phah lâ-sâm i hun-pia̍t-choh-sèng ê thâu-khak, i tio̍h tī chheng-khì ê ji̍t, chiū-sī tī tē-chhit ji̍t thì-thâu.

¹⁰ Tē-poeh ji̍t, i tio̍h tòa nn̄g chiah pan-kah á-sī hún-chiáu-á-kiáⁿ lâi hōe-bō͘ mn̂g-kháu, kau hō͘ chè-si.

¹¹ Chè-si tio̍h hiàn chi̍t chiah chòe sio̍k-chōe-chè, chi̍t chiah chòe sio-hòa-chè, ūi-tio̍h hit-ê lâng in-ūi bak-tio̍h sin-si ín-khí ê bô chheng-khì sio̍k-chōe, koh tio̍h tī hit-ji̍t hō͘ i ê thâu-khak têng-sin chòe sèng.

¹² I tio̍h koh soán chi̍t ji̍t, chiong ka-kī hun-pia̍t-choh-sèng hiàn hō͘ Siōng Chú; koh tio̍h khan chi̍t chiah chi̍t-hè ê iûⁿ-káng-á chòe pê-chōe-chè; m̄-kú í-chêng hit kúi ji̍t bô chún-sǹg, in-ūi i chòe Ná-sè-ní-lâng hit tiong-kan í-keng bak-tio̍h lâ-sâm.

¹³ Hōng-hiàn chòe Ná-sè-ní-lâng ê kî-hān nā kàu, tio̍h chiàu ē-bīn eng-kai chun-siú ê tiâu-lē chòe: I tio̍h hō͘ lâng chhōa kàu hōe-bō͘ mn̂g-kháu,

¹⁴ hiàn lé-mi̍h hō͘ Siōng Chú, chiū-sī chi̍t chiah bô hâ-chhû chi̍t-hè ê mî-iûⁿ-káng-á chòe sio-hòa-chè, chi̍t chiah bô hâ-chhû chi̍t-hè ê mî-iûⁿ-bú-á chòe sio̍k-chōe-chè, kap chi̍t chiah bô hâ-chhû ê mî-iûⁿ-káng chòe pêng-an-chè;

¹⁵ koh hiàn kui-nâ ēng chhiau-iû ê iù mī-hún chòe ê bô-kàⁿ-piáⁿ, í-ki̍p boah-iû ê bô-kàⁿ po̍h-piáⁿ, sò͘-chè, kap tiān-chiú-chè.

¹⁶ Chè-si tio̍h the̍h chiah-ê lé-mi̍h, tī Siōng Chú ê bīn-chêng hiàn-chòe sio̍k-chōe-chè kap sio-hòa-chè,

¹⁷ mā tio̍h chiong hit-chiah iûⁿ-káng kap hit-nâ bô-kàⁿ-piáⁿ hiàn hō͘ Siōng Chú chòe pêng-an-chè, koh hiàn sò͘-chè kap tiān-chiú-chè.

¹⁸ Ná-sè-ní-lâng tio̍h tī hōe-bō͘ mn̂g-kháu thì-thâu, chiong i hun-pia̍t-choh-sèng ê thâu-mn̂g hē tī pêng-an-chè ê ē-bīn sio.

¹⁹ Ná-sè-ní-lâng thì i hun-pia̍t-choh-sèng ê thâu-mn̂g liáu-āu, chè-si tio̍h chhú chú--kè ê iûⁿ-káng chi̍t ki chêng-thúi, koh tùi nâ-á lāi the̍h chi̍t tè bô-kàⁿ-piáⁿ kap chi̍t tè bô-kàⁿ po̍h-piáⁿ, hē tī hit-ê lâng ê chhiú.

²⁰ Chè-si tio̍h chiong chiah-ê lé-mi̍h tī Siōng Chú ê bīn-chêng iô-iô--leh; chiah-ê kap iô--kè ê heng-khám-bah, gia̍h-koân ê chiàⁿ-pêng tōa-thúi lóng chòe sèng-mi̍h, kui hō͘ chè-si; jiân-āu Ná-sè-ní-lâng chiah thang lim-chiú.

²¹ Í-siōng sī Ná-sè-ní-lâng eng-kai chun-siú ê tiâu-lē. I nā iáu ū khùi-la̍t thang hiàn kui-tēng í-gōa ê lé-mi̍h, tio̍h chiàu i hē ê goān hiàn chè-mi̍h hō͘ Siōng Chú.

Chè-si ê Chiok-hok

²² Siōng Chú bēng-lēng Mô͘-se,

²³ tio̍h tùi A-lûn kap i ê kiáⁿ soan-pò͘: Lín tio̍h án-ni kā Í-sek-lia̍t-lâng chiok-hok, kóng,

²⁴ “Goān Siōng Chú sù-hok lí, pó-hō͘ lí;

²⁵ Goān Siōng Chú ê bīn ê kng chiò lí, si-un hō͘ lí;

²⁶ Goān Siōng Chú hoaⁿ-hí ê bīn khòaⁿ lí, siúⁿ-sù lí pêng-an.”

²⁷ Án-ni, in nā hōng góa ê miâ kā Í-sek-lia̍t-lâng chiok-hok, góa chiū beh sù-hok Í-sek-lia̍t-lâng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan