Bìoball air-loidhne

Bîn-sò͘-kì 4 - 現代台語譯本羅馬字版

Ko-hat Chong-cho̍k ê Chit-chek

¹ Siōng Chú hoan-hù Mô͘-se kap A-lûn, kóng,

^2-3 “Lín tio̍h chiàu chong-cho̍k kap ka-cho̍k, tiám-sǹg Lī-bī-lâng Ko-hat ê hō͘-tāi, tùi saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘.

⁴ Ko-hat ê hō͘-tāi tio̍h hū-chek koán-lí hōe-bō͘ lāi-bīn chì-sèng ê mi̍h.

⁵ “Beh sóa-iâⁿ ê sî, A-lûn kap i ê kiáⁿ tio̍h ji̍p-khì hōe-bō͘, chiong jia-cha̍h ê tiùⁿ-lî pak lo̍h-lâi khàm iok-kūi;

⁶ koh tio̍h ēng siōng-téng ê phê khàm tī téng-bīn, jiân-āu khàm sûn-nâ ê pò͘, chiah kā iok-kūi chhng kǹg.

⁷ “In tio̍h ēng nâ-sek ê pò͘ chhu tī pâi hiàn-chè ê piáⁿ ê toh; chiong chiah-ê pôaⁿ, phiat-á, tiān-chiú-chè ê ô͘ kap poe, pâi tī hit téng-bīn; hiàn-chè ê piáⁿ tio̍h lâu tī toh-téng.

⁸ Pâi hiàn-chè ê piáⁿ ê toh tio̍h khàm chu-âng-sek ê pò͘, koh khàm siōng-téng ê phê, chiah kā toh-á chhng kǹg.

⁹ “In tio̍h the̍h nâ-sek ê pò͘ khàm teng-tâi, teng-tâi ê poe, teng-chián, teng-pôaⁿ, í-ki̍p só͘-ū tóe iû ê khì-khū.

¹⁰ Koh tio̍h chiong teng-tâi, kap teng-tâi só͘-ū ê khì-khū, ēng siōng-téng ê phê pau hó-sè, hē tī ūn-poaⁿ ê kè téng-bīn.

¹¹ “In tio̍h chhu nâ-sek ê pò͘ tī kim chè-tôaⁿ téng-bīn, koh ēng siōng-téng ê phê khàm--teh, chiah kā tôaⁿ chhng kǹg.

¹² Mā tio̍h ēng nâ-sek ê pò͘ pau sèng-só͘ lāi-bīn só͘-ū ê khì-khū, chiah ēng siōng-téng ê phê khàm--teh, hē tī ūn-poaⁿ ê kè téng-bīn.

¹³ In tio̍h chiong chè-tôaⁿ ê hé-hu chheng hō͘ chheng-khì, ēng chí-sek ê pò͘ khàm tī chè-tôaⁿ téng-bīn.

¹⁴ Koh tio̍h chiong chè-tôaⁿ teh ēng ê hé-tiáⁿ, bah-chhe, thuh-á, pôaⁿ hē tī chè-tôaⁿ téng-bīn, jiân-āu ēng siōng-téng ê phê khàm tī hit téng-bīn, chiah kā tôaⁿ chhng kǹg.

¹⁵ “Beh sóa-iâⁿ ê sî, A-lûn kap i ê kiáⁿ chiong sèng-só͘ kap só͘-ū ê khì-khū pau hó-sè, jiân-āu Ko-hat ê kiáⁿ-sun lâi kng; m̄-kú in m̄-thang bong-tio̍h sèng ê mi̍h, chiah bián sí; hōe-bō͘ lāi-bīn chiah-ê mi̍h-kiāⁿ sī Ko-hat ê kiáⁿ-sun tio̍h kng--ê.

¹⁶ “Chè-si A-lûn ê kiáⁿ Í-lī-a-sat tio̍h hū-chek koán-lí tiám-teng ê iû, hiuⁿ-liāu, siông-siông hiàn ê sò͘-chè, kap thang boah ê sèng-iû; mā tio̍h kò͘-siú hōe-bō͘ kap lāi-bīn só͘-ū ê mi̍h-kiāⁿ, í-ki̍p sèng-só͘ kap sèng-só͘ só͘-ū ê khì-khū.”

¹⁷ Siōng Chú hoan-hù Mô͘-se kap A-lûn, kóng,

¹⁸ “Lín m̄-thang hō͘ Ko-hat chong-cho̍k tùi Lī-bī-lâng ê tiong-kan siū siau-bia̍t.

¹⁹ A-lûn kap i ê kiáⁿ tio̍h ji̍p-khì hōe-bō͘ chí-phài in ta̍k-ê lâng tio̍h chòe ê kang-chok, tio̍h kng ê mi̍h-kiāⁿ, thang hō͘ in tī óa-kūn chì-sèng ê mi̍h ê sî, iáu ōe oa̍h, bián sí.

²⁰ In bōe-ēng-tit ji̍p-khì khòaⁿ sèng-mi̍h ūn-poaⁿ ê ū-pī kang-chok, chiah bián sí.”

Kek-sūn Chong-cho̍k ê Chit-chek

²¹ Siōng Chú hoan-hù Mô͘-se, kóng,

²² “Lí tio̍h chiàu chong-cho̍k kap ka-cho̍k tiám-sǹg Kek-sūn ê hō͘-tāi,

²³ saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘.

²⁴ Kek-sūn ê chong-cho̍k tio̍h pān-lí ê kang-chok, tio̍h kng ê mi̍h-kiāⁿ sī chiah-ê:

²⁵ In tio̍h kng hōe-bō͘ hiah-ê tiùⁿ-bō͘, hōe-bō͘, hōe-bō͘ ê kòa, hit téng-bīn siōng-téng ê phê chòe ê kòa, hōe-bō͘ ê mn̂g-lî,

²⁶ hōe-bō͘ kap chè-tôaⁿ chiu-ûi ê tiâⁿ ê pò͘-ûi kap mn̂g-lî, soh-á, kap in teh ēng só͘-ū ê khì-khū; kap chiah-ê khì-khū iú-koan ê kang-chok, in lóng tio̍h hū-chek.

²⁷ Kek-sūn ê hō͘-tāi tio̍h chiàu A-lûn kap i ê kiáⁿ-sun ê bēng-lēng kng mi̍h-kiāⁿ, pān-lí sū-bū; in beh kng ê mi̍h-kiāⁿ, lín tio̍h kau-tài in hū-chek.

²⁸ Í-siōng sī Kek-sūn chong-cho̍k tī hōe-bō͘ ê chit-chek; in tio̍h siū chè-si A-lûn ê kiáⁿ Í-tha-má kàm-tok.”

Bí-la-lī Chong-cho̍k ê Chit-chek

²⁹ “Lí tio̍h chiàu chong-cho̍k kap ka-cho̍k tiám-sǹg Bí-la-lī ê hō͘-tāi,

³⁰ saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘.

³¹ In tī hōe-bō͘ lāi tio̍h hū-chek ê chit-bū, chiū-sī kng hōe-bō͘ ê pán, hoâiⁿ-kông, thiāu, ū sún-khang ê chō,

³² tiâⁿ chiu-ûi ê thiāu, thiāu ê chō, khi̍t-á kap soh-á, í-ki̍p teh ēng ê khì-khū; ta̍k-hāng tio̍h kng ê mi̍h-kiāⁿ, lóng tio̍h ū chí-tēng ê lâng hū-chek.

³³ Í-siōng sī Bí-la-lī chong-cho̍k tī hōe-bō͘ ê chit-chek; in tio̍h siū chè-si A-lûn ê kiáⁿ Í-tha-má kàm-tok.”

Lī-bī-lâng ê Jîn-kháu Tiâu-cha

³⁴ Mô͘-se, A-lûn, kap hōe-chiòng ê siú-léng, chiàu chong-cho̍k kap ka-cho̍k tiám-sǹg Ko-hat ê hō͘-tāi,

³⁵ saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘,

³⁶ kiōng nn̄g-chheng chhit-pah gō͘-cha̍p miâ.

³⁷ Che sī Mô͘-se kap A-lûn chiàu Siōng Chú tùi Mô͘-se ê bēng-lēng, tiám-sǹg Ko-hat chong-cho̍k tī hōe-bō͘ tng-chit choh-kang ê lâng ê jîn-sò͘.

³⁸ Kek-sūn ê hō͘-tāi, chiàu chong-cho̍k kap ka-cho̍k, tiám-sǹg

³⁹ saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘,

⁴⁰ kiōng nn̄g-chheng la̍k-pah saⁿ-cha̍p miâ.

⁴¹ Che sī Mô͘-se kap A-lûn chiàu Siōng Chú tùi Mô͘-se ê bēng-lēng, tiám-sǹg Kek-sūn chong-cho̍k tī hōe-bō͘ tng-chit choh-kang ê lâng ê jîn-sò͘.

⁴² Bí-la-lī ê hō͘-tāi, chiàu chong-cho̍k kap ka-cho̍k tiám-sǹg

⁴³ saⁿ-cha̍p hè kàu gō͘-cha̍p hè tī hōe-bō͘ tng-chit choh-kang ê lâng ê jîn-sò͘,

⁴⁴ kiōng saⁿ-chheng nn̄g-pah miâ.

⁴⁵ Che sī Mô͘-se kap A-lûn chiàu Siōng Chú tùi Mô͘-se ê bēng-lēng, tiám-sǹg Bí-la-lī chong-cho̍k ê jîn-sò͘.

⁴⁶ Mô͘-se, A-lûn, kap Í-sek-lia̍t hōe-chiòng ê siú-léng, chiàu chong-cho̍k kap ka-cho̍k tiám-sǹg Lī-bī-lâng,

⁴⁷ saⁿ-cha̍p hè kàu gō͘-cha̍p hè tī hōe-bō͘ tng-chit chòe kang, kng mi̍h-kiāⁿ ê lâng ê jîn-sò͘,

⁴⁸ chóng-kiōng poeh-chheng gō͘-pah poeh-cha̍p miâ.

⁴⁹ Mô͘-se chiàu Siōng Chú ê bēng-lēng chí-phài ta̍k-ê lâng tio̍h pān ê sū-bū, tio̍h kng ê mi̍h-kiāⁿ. In lóng chiàu Siōng Chú tùi Mô͘-se ê bēng-lēng án-ni teng-lio̍k.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan