Bìoball air-loidhne

Bîn-sò͘-kì 23 - 現代台語譯本羅馬字版

¹ Pa-lân tùi Pa-le̍k kóng, “Lí tī chia kā góa khí chhit chō chè-tôaⁿ, koh chún-pī chhit chiah gû-káng, chhit chiah iûⁿ-káng.”

² Pa-le̍k chiū chiàu Pa-lân ê ōe chòe; Pa-le̍k kap Pa-lân tī ta̍k-chō tôaⁿ hiàn chi̍t chiah gû-káng kap chi̍t chiah iûⁿ-káng.

³ Pa-lân tùi Pa-le̍k kóng, “Lí chhiáⁿ khiā tī lí ê sio-hòa-chè ê piⁿ--á, góa beh khì thâu-chêng, bô-it-tēng Siōng Chú ōe tùi góa hián-hiān. I kā góa chí-sī sím-mi̍h, góa ōe kā lí kóng.” Pa-lân chiū chiūⁿ-khì khah koân bô chháu-ba̍k ê só͘-chāi.

⁴ Siōng-tè tùi Pa-lân hián-hiān, Pa-lân tùi I kóng, “Góa í-keng chún-pī chhit chō chè-tôaⁿ, tī ta̍k-chō tôaⁿ hiàn chi̍t chiah gû-káng kap chi̍t chiah iûⁿ-káng.”

⁵ Siōng Chú chiong Pa-lân eng-kai kóng ê ōe kau-tài i, koh kā i kóng, “Lí tò-khì Pa-le̍k hia, tio̍h án-ni kā i kóng.”

⁶ I chiū tò-khì Pa-le̍k hia; khòaⁿ-tio̍h Pa-le̍k kap Mô͘-ap ê koaⁿ-oân iáu khiā tī sio-hòa-chè ê piⁿ--á.

⁷ Pa-lân chiū liām-si, kóng: Pa-le̍k chhōa góa tùi Sū-lī-a lâi, Mô͘-ap-ông chhōa góa chhut tang-pêng ê soaⁿ. I kóng, “Lâi, kā góa chiù-chó͘ Ngá-kok; lâi, lóe-mē Í-sek-lia̍t.”

⁸ Siōng-tè bô chiù-chó͘--ê, góa ná thang chiù-chó͘? Siōng Chú bô lóe-mē--ê, góa ná thang lóe-mē?

⁹ Góa tùi soaⁿ-giâm khòaⁿ, tùi soaⁿ-téng koan-khòaⁿ; chit-ê jîn-bîn ka-kī khiā-khí, bô kap lia̍t-kok pâi chòe-hé.

¹⁰ Siáⁿ-lâng ōe-tàng kè-sǹg Ngá-kok ê thô͘-soa? Siáⁿ-lâng ōe-tàng tiám-sǹg Í-sek-lia̍t ê thô͘-hún? Goān góa ê sí chhin-chhiūⁿ gī-lâng ê sí, góa ê kiat-kio̍k chhin-chhiūⁿ in ê kiat-kio̍k.

¹¹ Pa-le̍k tùi Pa-lân kóng, “Lí sī teh chhòng siáⁿ? Góa kiò lí lâi chiù-chó͘ góa ê tùi-te̍k, lí kèng-jiân kā in chiok-hok!”

¹² I ìn kóng, “Siōng Chú kau-tài góa kóng ê ōe, góa ná káⁿ bô chiàu-si̍t kóng?”

Pa-lân Tē-jī Piàn Ū-giân

¹³ Pa-le̍k tùi Pa-lân kóng, “Chhiáⁿ lí kap góa khì pa̍t-ūi, tī hia lí ōe-tàng khòaⁿ-tio̍h in; lí chí-ū ōe khòaⁿ-tio̍h in ê chi̍t-pō͘-hūn, bōe-tàng khòaⁿ-tio̍h in choân-pō͘. Lí tio̍h tī hia thòe góa kā in chiù-chó͘.”

¹⁴ I chiū chhōa Pa-lân khì Só-hui ê iá-tōe, chiūⁿ Pí-su-ka soaⁿ-téng, khí chhit chō chè-tôaⁿ, ta̍k-chō tôaⁿ hiàn chi̍t chiah gû-káng kap chi̍t chiah iûⁿ-káng.

¹⁵ Pa-lân tùi Pa-le̍k kóng, “Lí chhiáⁿ tiàm chia, khiā tī lí ê sio-hòa-chè ê piⁿ--á, thèng-hāu góa khì hia kìⁿ Siōng Chú.”

¹⁶ Siōng Chú tùi Pa-lân hián-hiān, chiong i eng-kai kóng ê ōe kau-tài i; koh kóng, “Lí tò-khì Pa-le̍k hia, tio̍h chiàu án-ni kóng.”

¹⁷ Pa-lân chiū tò-khì Pa-le̍k hia; khòaⁿ-tio̍h Pa-le̍k kap Mô͘-ap ê koaⁿ-oân iáu khiā tī sio-hòa-chè ê piⁿ--á. Pa-le̍k mn̄g i kóng, “Siōng Chú tùi lí kóng sím-mi̍h?”

¹⁸ Pa-lân chiū liām-si, kóng: Pa-le̍k, chù-ì thiaⁿ! Se-phoat ê kiáⁿ, thiaⁿ leh!

¹⁹ Siōng-tè bōe chhin-chhiūⁿ lâng kóng pe̍h-chha̍t, mā bōe chhin-chhiūⁿ lâng ōe hoán-hóe. I kiám ōe kóng-liáu bô chòe, kiám ōe kóng chhut-chhùi bô si̍t-hiān?

²⁰ Góa hōng-bēng chiok-hok; Siōng Chú ê chiok-hok, góa bōe kā i kái-piàn.

²¹ Tī Ngá-kok khòaⁿ bōe tio̍h chai-lān, tī Í-sek-lia̍t khòaⁿ bōe tio̍h chai-hō, Siōng Chú — in ê Siōng-tè kap in tông-chāi; tī in tiong-kan ū o-ló Siōng Chú — in ê Ông ê siaⁿ.

²² Siōng-tè chhōa in chhut Ai-ki̍p; ūi-tio̍h in, I hoat-chhut chhin-chhiūⁿ iá-gû ê khùi-la̍t.

²³ Ngá-kok bô su-iàu khòaⁿ tiāu-thâu, Í-sek-lia̍t bô su-iàu pok-kòa; sî-kan chi̍t-ē kàu, lâng kóng-tio̍h Ngá-kok it-tēng ōe kóng: Siōng-tè í-keng ūi Í-sek-lia̍t oân-sêng hiah tōa ê sū!

²⁴ Chit-ê bîn-cho̍k heng-khí chhin-chhiūⁿ sai-bú, théng-sin chhin-chhiūⁿ sai-kang; i bô chia̍h la̍h-bu̍t, bô lim la̍h-bu̍t ê huih, it-tēng bô beh hioh-khùn.

²⁵ Pa-le̍k tùi Pa-lân kóng, “Lí bô kā in chiù-chó͘ to hāi ah, ná koh kā in chiok-hok?”

²⁶ Pa-lân ìn Pa-le̍k kóng, “Góa kiám bô kā lí kóng ‘Siōng Chú kau-tài góa ê ōe, góa it-tēng tio̍h chiàu án-ni kóng’?”

Pa-lân Tē-saⁿ Piàn Ū-giân

²⁷ Pa-le̍k tùi Pa-lân kóng, “Lâi, góa chhōa lí lâi pa̍t-ūi, khó-lêng Siōng-tè ài lí tī hia thòe góa kā in chiù-chó͘.”

²⁸ Pa-le̍k chiū chhōa Pa-lân khì Pí-ní-soaⁿ ê soaⁿ-chiam, tùi hia khòaⁿ--lo̍h-khì, ōe-tàng khòaⁿ-tio̍h khòng-iá.

²⁹ Pa-lân tùi Pa-le̍k kóng, “Lí tī chia kā góa khí chhit chō chè-tôaⁿ, koh chún-pī chhit chiah gû-káng, chhit chiah iûⁿ-káng.”

³⁰ Pa-le̍k chiū chiàu Pa-lân ê ōe chòe, tī ta̍k-chō tôaⁿ hiàn chi̍t chiah gû-káng kap chi̍t chiah iûⁿ-káng.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan