Bìoball air-loidhne

Bîn-sò͘-kì 13 - 現代台語譯本羅馬字版

Phài Cheng-thàm
( Sin 1.19-33 )

¹ Siōng Chú bēng-lēng Mô͘-se, kóng,

² “Lí tio̍h tùi ta̍k-ê chi-cho̍k soán chi̍t ê cho̍k-tiúⁿ, phài in khì thàm-cha góa beh sù hō͘ Í-sek-lia̍t-lâng ê Ka-lâm-tōe.”

³ Mô͘-se chiū chiàu Siōng Chú ê bēng-lēng, phài ta̍k chi-cho̍k ê cho̍k-tiúⁿ tùi Pa-lân ê khòng-iá chhut-hoat.

⁴ Chiah-ê cho̍k-tiúⁿ ê miâ kì tī ē-bīn: Lū-piān chi-cho̍k sī Sat-khek ê kiáⁿ Sa-bō͘-a

⁵ Se-biān chi-cho̍k sī Hô-lī ê kiáⁿ Sa-hoat

⁶ Iû-tāi chi-cho̍k sī Iâ-hu-nî ê kiáⁿ Ka-le̍k

⁷ Í-sat-ka chi-cho̍k sī Iok-sek ê kiáⁿ Í-ka

⁸ Í-hoat-liân chi-cho̍k sī Lūn ê kiáⁿ Hô-se-a

⁹ Piān-ngá-bín chi-cho̍k sī La-hu ê kiáⁿ Phà-thê

¹⁰ Se-pò͘-lûn chi-cho̍k sī So-tí ê kiáⁿ Ka-tia̍p

¹¹ Iok-sek ê hō͘-tāi Má-ná-se chi-cho̍k sī So͘-se ê kiáⁿ Ka-tí

¹² Tān chi-cho̍k sī Ki-má-lī ê kiáⁿ A-bí-lī

¹³ A-siat chi-cho̍k sī Bí-ka-le̍k ê kiáⁿ Se-thiap

¹⁴ Ná-hut-tha-lī chi-cho̍k sī Po̍k-se ê kiáⁿ Ná-pí

¹⁵ Ka-tek chi-cho̍k sī Má-ki ê kiáⁿ Kiū-lī

¹⁶ Í-siōng sī Mô͘-se phài-khì thàm-cha hit-ê tōe ê lâng ê miâ. Mô͘-se kā Lūn ê kiáⁿ Hô-se-a hō-miâ chòe Iok-su-a.

¹⁷ Mô͘-se phài in khì thàm-cha Ka-lâm-tōe ê sî, tùi in kóng, “Lín khì Nî-kek-hu, peh-chiūⁿ soaⁿ,

¹⁸ khòaⁿ hit-ê tōe siⁿ-chòe sím-mi̍h khoán: Hia ê chū-bîn sī kiông á-sī jio̍k, jîn-sò͘ chōe á-sī chió,

¹⁹ tòa ê tōe sī hó á-sī bái, tòa ê só͘-chāi sī bô siâⁿ-chhiûⁿ ê iâⁿ-tōe á-sī kian-kò͘ ê siâⁿ.

²⁰ Koh khòaⁿ hit-ê thó͘-tōe sī pûi á-sī sán, ū chhiū-ba̍k á bô. Lín tio̍h ióng-kám, chiong hit só͘-chāi ê ké-chí tòa chi̍t-kóa tò--lâi.” Hit-sî tú-á sī phû-tô chho͘-se̍k ê sî.

²¹ In chiū khì thàm-cha, tùi Sîm ê khòng-iá kàu Lī-ha̍p ê tōe-khu, ti̍t-kàu Hap-má ài-kháu.

²² In koh tùi Nî-kek-hu chiūⁿ-khì Hi-pek-lûn; chit-ê siâⁿ pí Ai-ki̍p ê Só-an-siâⁿ khah chá chhit nî khí-chō, ū A-la̍p-cho̍k ê A-hi-bān-lâng, Sī-su-lâng, Ta̍t-mái-lâng tòa tī hia.

²³ In kàu Í-si̍t-kok Soaⁿ-kok, chhò chi̍t ki phû-tô chhiū-oe, téng-bīn ū chi̍t pha phû-tô, su-iàu nn̄g ê lâng kng; koh tòa chi̍t-kóa sia̍h-liû kap bû-hoa-kó tò--lâi.

²⁴ In-ūi Í-sek-lia̍t-lâng tùi hia chhò chi̍t pha phû-tô, hit-ê só͘-chāi chiū kiò-chòe Í-si̍t-kok Soaⁿ-kok.

²⁵ In thàm-cha hit-ê tōe sì-cha̍p ji̍t kú, chiah tò--lâi.

²⁶ In lâi kàu Pa-lân khòng-iá ê Ka-te-su, kìⁿ Mô͘-se, A-lûn, kap Í-sek-lia̍t ê hōe-chiòng, kā in hôe-pò kui-ê hêng-thêng, koh hō͘ in khòaⁿ hit só͘-chāi ê ké-chí.

²⁷ In tùi Mô͘-se kóng, “Lí phài goán khì thàm-cha hit-ê tōe-khu, kó-jiân sī lâu lin kap bi̍t ê tōe; chiah-ê chiū-sī hit-ê só͘-chāi ê ké-chí.

²⁸ M̄-kú hit só͘-chāi ê chū-bîn chin ióng, siâⁿ tōa koh kian-kò͘; goán tī hia mā khòaⁿ-tio̍h A-la̍p-cho̍k.

²⁹ A-má-le̍k-lâng tòa tī Nî-kek-hu tōe-khu; Hek-lâng, Iâ-pò͘-su-lâng, A-mô͘-lī-lâng tòa tī soaⁿ-tōe; Ka-lâm-lâng tòa tī hái-piⁿ kap Iok-tàn hô-piⁿ.”

³⁰ Ka-le̍k tī Mô͘-se ê bīn-chêng hō͘ jîn-bîn an-chēng--lo̍h-lâi, kóng, “Lán kóaⁿ-kín lâi-khì kong-chiàm hit-ê só͘-chāi; lán it-tēng ōe iâⁿ.”

³¹ M̄-kú hiah-ê kap i chòe-hé khì ê lâng kóng, “Lán bô hoat-tō͘ kong-kek hiah-ê jîn-bîn; in pí lán khah ióng.”

³² Hiah-ê khì thàm-cha ê lâng tùi Í-sek-lia̍t-lâng sàn-pò͘ iâu-giân, kóng, “Goán thàm-cha kiâⁿ--kè ê tōe sī thun-chia̍h lâng ê tōe, koh khòaⁿ--tio̍h ê chū-bîn lóng chin tōa-hàn.

³³ Goán khòaⁿ--tio̍h ê A-la̍p-cho̍k ê lâng chiū-sī tōa-hàn-lâng, in sī tōa-hàn-lâng ê hō͘-tāi; kap in pí--khí-lâi, lán chhin-chhiūⁿ chháu-meh, in khòaⁿ lán mā-sī án-ni.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan