Bìoball air-loidhne

Bîn-sò͘-kì 10 - 現代台語譯本羅馬字版

Gûn ê Lat-pah

¹ Siōng Chú bēng-lēng Mô͘-se, kóng,

² “Lí tio̍h ēng gûn phah nn̄g ki lat-pah, hō͘ lí ēng lâi tiàu-chi̍p hōe-chiòng, mā thang kiò ta̍k-ê iâⁿ chhut-hoat.

³ Nn̄g ki lat-pah chòe-hé pûn ê sî, choân-thé hōe-chiòng tio̍h khì lí hia, tī hōe-bō͘ mn̂g-kháu chū-chi̍p.

⁴ Nā kan-ta pûn chi̍t ki, chèng siú-léng, chiū-sī Í-sek-lia̍t ê cho̍k-tiúⁿ, tio̍h khì lí hia chū-chi̍p.

⁵ Pûn kín-kip té-im ê sî, chat-iâⁿ tī tang-pêng ê chi-cho̍k lóng tio̍h khí-kiâⁿ.

⁶ Tē-jī piàn pûn kín-kip té-im ê sî, chat-iâⁿ tī lâm-pêng ê chi-cho̍k tio̍h khí-kiâⁿ; beh kiò in khí-kiâⁿ, it-tēng tio̍h pûn kín-kip té-im.

⁷ Nā beh chū-chi̍p hōe-chiòng, lín tio̍h pûn lat-pah, m̄-kú m̄-thang pûn kín-kip té-im.

⁸ A-lûn ê hō͘-tāi chòe chè-si--ê, tio̍h hū-chek pûn hiah-ê lat-pah; che beh chòe lín sè-sè-tāi-tāi éng-oán ê kui-lē.

⁹ Lín kap chhim-hoān lín ê thó͘-tōe ê tùi-te̍k kau-chiàn ê sî, tio̍h ēng lat-pah pûn kín-kip té-im, án-ni Siōng Chú — lín ê Siōng-tè chiū ōe-kì-tit lín, koh beh kái-kiù lín thoat-lī lín ê tùi-te̍k.

¹⁰ Lín kú-hêng khèng-tián, tī choeh-kî kap ta̍k ge̍h-ji̍t ê chhoe-it, hiàn sio-hòa-chè kap pêng-an-chè ê sî, mā tio̍h pûn lat-pah, án-ni lín ê Siōng-tè chiū ōe-kì-tit lín. Góa sī Siōng Chú — lín ê Siōng-tè.”

Í-sek-lia̍t-lâng Chún-pī Chhut-hoat

¹¹ Tē-jī nî jī-ge̍h jī-cha̍p, hûn tùi khǹg iok-kūi ê hōe-bō͘ seng-koân,

¹² Í-sek-lia̍t-lâng chiū chiàu in ê hêng-thêng tùi Se-nāi ê khòng-iá chhut-hoat; hûn thêng tī Pa-lân ê khòng-iá.

¹³ Che sī in chiàu Siōng Chú hō͘ Mô͘-se ê bēng-lēng, tē-it piàn khí-thêng.

¹⁴ Iû-tāi chi-cho̍k ê tōa-kî chòe thâu-chêng, pō͘-tūi chi̍t-tūi chiap chi̍t-tūi hiòng-chêng kiâⁿ; Iû-tāi chi-cho̍k pō͘-tūi ê thóng-léng sī A-bí-ná-ta̍t ê kiáⁿ Ná-sūn.

¹⁵ Í-sat-ka chi-cho̍k pō͘-tūi ê thóng-léng sī So͘-ap ê kiáⁿ Ná-thán-gia̍p.

¹⁶ Se-pò͘-lûn chi-cho̍k pō͘-tūi ê thóng-léng sī Hi-lûn ê kiáⁿ Í-lī-ap.

¹⁷ Hōe-bō͘ chiū thiah--khí-lâi; Kek-sūn kap Bí-la-lī ê kiáⁿ-sun kng hōe-bō͘ chhut-hoat.

¹⁸ Chiàu pō͘-tūi ê sūn-sū, sòa-chiap chhut-hoat--ê sī Lū-piān chi-cho̍k ê tōa-kî; pō͘-tūi ê thóng-léng sī Sī-tiu-ní ê kiáⁿ Í-lī-siok.

¹⁹ Se-biān chi-cho̍k pō͘-tūi ê thóng-léng sī So͘-lī-sa-tāi ê kiáⁿ Sī-lō͘-bi̍t.

²⁰ Ka-tek chi-cho̍k pō͘-tūi ê thóng-léng sī Tiu-ní ê kiáⁿ Í-lī-ngá-sat.

²¹ Ko-hat chong-cho̍k kng sèng-só͘ lāi-bīn ê sèng-mi̍h khí-kiâⁿ; hōe-bō͘ tio̍h tī in kàu-ūi í-chêng tah hó.

²² Chiàu pō͘-tūi ê sūn-sū, sòa-chiap chhut-hoat--ê sī Í-hoat-liân chi-cho̍k ê tōa-kî; pō͘-tūi ê thóng-léng sī A-bí-hut ê kiáⁿ Í-lī-sa-má.

²³ Má-ná-se chi-cho̍k pō͘-tūi ê thóng-léng sī Pí-tāi-siok ê kiáⁿ Ka-má-lia̍t.

²⁴ Piān-ngá-bín chi-cho̍k pō͘-tūi ê thóng-léng sī Ki-to-nî ê kiáⁿ A-pí-tān.

²⁵ Chòe-āu sī Tān chi-cho̍k ê tōa-kî chhōa-tūi, chiàu pō͘-tūi ê sūn-sū, A-bí-sa-tāi ê kiáⁿ A-hi-í-siā chòe Tān chi-cho̍k ê thóng-léng.

²⁶ A-siat chi-cho̍k pō͘-tūi ê thóng-léng sī Gô-lân ê kiáⁿ Phà-kiat.

²⁷ Ná-hut-tha-lī chi-cho̍k pō͘-tūi ê thóng-léng sī Í-lâm ê kiáⁿ A-hi-la.

²⁸ Í-siōng sī Í-sek-lia̍t-lâng pō͘-tūi chiap pō͘-tūi hiòng-chêng kiâⁿ ê sūn-sū.

²⁹ Mô͘-se tùi i ê tiūⁿ-lâng Bí-tiân-lâng Liû-ní ê kiáⁿ Hô-pa kóng, “Goán beh khì Siōng Chú èng-ún beh siúⁿ-sù goán ê tōe; chhiáⁿ lí kap goán chòe-hé lâi-khì, goán ōe hó khoán-thāi lí; Siōng Chú í-keng èng-ún sù-hok hō͘ Í-sek-lia̍t-lâng.”

³⁰ I ìn kóng, “Góa m̄ khì. Góa beh tò-khì góa ê kò͘-hiong, góa ê chhin-cho̍k hia.”

³¹ Mô͘-se kóng, “Chhiáⁿ lí m̄-thang pàng-sak goán! Lí chai, goán tio̍h tī khòng-iá chhē só͘-chāi chat-iâⁿ, lí ōe-tàng kā goán chí-tō.

³² Lí nā kap goán chòe-hé khì, Siōng Chú sù goán ê hok-khì, goán it-tēng lóng ōe kap lí hun-hióng.”

Í-sek-lia̍t-lâng Khí-thêng

³³ In lī-khui Siōng Chú ê soaⁿ, chhut-hoat kiâⁿ saⁿ ji̍t ê lō͘-thêng; Siōng Chú ê iok-kūi tī thâu-chêng kiâⁿ saⁿ ji̍t ê lō͘-thêng, kā in chhē hioh-khùn ê só͘-chāi.

³⁴ In thiah in ê pò͘-pîⁿ chhut-hoat; ji̍t--sî Siōng Chú ê hûn tī in ê téng-bīn.

³⁵ Iok-kūi khí-thêng ê sî, Mô͘-se chiū kóng, “Siōng Chú ah, kiû lí khí--lâi! Goān lí kóaⁿ-sòaⁿ lí ê tùi-te̍k! Goān oàn-hūn lí ê lâng tī lí ê bīn-chêng tô-cháu!”

³⁶ Iok-kūi thêng ê sî, Mô͘-se chiū kóng, “Siōng Chú ah, kiû lí tò--lâi, tòa tī Í-sek-lia̍t chheng-chheng-bān-bān ê lâng tiong-kan!”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan