Bìoball air-loidhne

Bîn-sò͘-kì 1 - 現代台語譯本羅馬字版

Tē-it Piàn Hō͘-kháu-phó͘-cha

¹ Í-sek-lia̍t-lâng chhut Ai-ki̍p-tōe liáu-āu, tē-jī nî jī-ge̍h chhoe-it, Siōng Chú tī Se-nāi ê khòng-iá, tī hōe-bō͘ hoan-hù Mô͘-se kóng,

^2-3 “Lí kap A-lûn tio̍h chiàu chong-cho̍k, ka-cho̍k tiám-sǹg Í-sek-lia̍t choân hōe-chiòng ê jîn-sò͘, teng-lio̍k jī-cha̍p hè í-siōng, ōe-tàng chhut-khì kau-chiàn ê ta-po͘-teng ê miâ, kā in phian-tūi, thóng-kè jîn-sò͘.

⁴ Ta̍k-ê chi-cho̍k tio̍h ū chi̍t ê lâng, chiū-sī in ê cho̍k-tiúⁿ hia̍p-chō͘ lín.

^5-15 Ē-bīn sī hia̍p-chō͘ lín ê lâng ê miâ-toaⁿ: Lū-piān chi-cho̍k, Sī-tiu-ní ê kiáⁿ Í-lī-siok Se-biān chi-cho̍k, So͘-lī-sa-tāi ê kiáⁿ Sī-lō͘-bi̍t Iû-tāi chi-cho̍k, A-bí-ná-ta̍t ê kiáⁿ Ná-sūn Í-sat-ka chi-cho̍k, So͘-ap ê kiáⁿ Ná-thán-gia̍p Se-pò͘-lûn chi-cho̍k, Hi-lûn ê kiáⁿ Í-lī-ap Iok-sek ê hō͘-tāi nn̄g ê chi-cho̍k: Í-hoat-liân chi-cho̍k, A-bí-hut ê kiáⁿ Í-lī-sa-má; Má-ná-se chi-cho̍k, Pí-tāi-siok ê kiáⁿ Ka-má-lia̍t Piān-ngá-bín chi-cho̍k, Ki-to-nî ê kiáⁿ A-pí-tān Tān chi-cho̍k, A-bí-sa-tāi ê kiáⁿ A-hi-í-siā A-siat chi-cho̍k, Gô-lân ê kiáⁿ Phà-kiat Ka-tek chi-cho̍k, Tiu-ní ê kiáⁿ Í-lī-ngá-sat Ná-hut-tha-lī chi-cho̍k, Í-lâm ê kiáⁿ A-hi-la

¹⁶ Chiah-ê sī tùi hōe-chiòng soán-chhut ta̍k-ê chi-cho̍k ê cho̍k-tiúⁿ, lóng chòe Í-sek-lia̍t kun-tūi ê chí-hui-koaⁿ.”

¹⁷ Mô͘-se kap A-lûn chiū chhōa hiah-ê ū tī miâ-toaⁿ ê lâng,

¹⁸ tī jī-ge̍h chhoe-it tiàu-chi̍p choân-thé hōe-chiòng, chiàu chong-cho̍k, ka-cho̍k, teng-lio̍k jī-cha̍p hè í-siōng ê ta-po͘-teng ê miâ.

¹⁹ Mô͘-se chiàu Siōng Chú ê bēng-lēng, tī Se-nāi ê khòng-iá kā in tiám-sǹg.

^20-43 Ē-bīn sī Ngá-kok ê hō͘-tāi, chiàu in ê chong-cho̍k, ka-cho̍k, kap lâng-miâ ê sò͘-bo̍k, jī-cha̍p hè í-siōng ōe-tàng chhut-khì kau-chiàn ê ta-po͘-teng ê jîn-sò͘: Lū-piān chi-cho̍k, sì-bān la̍k-chheng gō͘-pah miâ Se-biān chi-cho̍k, gō͘-bān káu-chheng saⁿ-pah miâ Ka-tek chi-cho̍k, sì-bān gō͘-chheng la̍k-pah gō͘-cha̍p miâ Iû-tāi chi-cho̍k, chhit-bān sì-chheng la̍k-pah miâ Í-sat-ka chi-cho̍k, gō͘-bān sì-chheng sì-pah miâ Se-pò͘-lûn chi-cho̍k, gō͘-bān chhit-chheng sì-pah miâ Iok-sek ê hō͘-tāi nn̄g ê chi-cho̍k: Í-hoat-liân chi-cho̍k, sì-bān khòng gō͘-pah miâ Má-ná-se chi-cho̍k, saⁿ-bān nn̄g-chheng nn̄g-pah miâ Piān-ngá-bín chi-cho̍k, saⁿ-bān gō͘-chheng sì-pah miâ Tān chi-cho̍k, la̍k-bān nn̄g-chheng chhit-pah miâ A-siat chi-cho̍k, sì-bān chi̍t-chheng gō͘-pah miâ Ná-hut-tha-lī chi-cho̍k, gō͘-bān saⁿ-chheng sì-pah miâ

⁴⁴ Í-siōng chiah-ê sī Mô͘-se, A-lûn, kap Í-sek-lia̍t cha̍p-jī ê siú-léng tiám-sǹg ê jîn-sò͘; chiah-ê siú-léng ta̍k-ê tāi-piáu in ê chi-cho̍k.

⁴⁵ Í-sek-lia̍t-lâng chiàu in ê chong-cho̍k, tùi jī-cha̍p hè í-siōng ōe-tàng chhut-khì kau-chiàn ê lâng,

⁴⁶ teng-lio̍k ê jîn-sò͘ chóng-kiōng la̍k-cha̍p-bān saⁿ-chheng gō͘-pah gō͘-cha̍p miâ.

⁴⁷ M̄-kú Lī-bī-lâng bô chiàu in chó͘-sian ê chong-cho̍k teng-lio̍k chāi-lāi.

⁴⁸ In-ūi Siōng Chú bat hoan-hù Mô͘-se, kóng,

⁴⁹ “Lī-bī chi-cho̍k lí m̄-thang tiám-sǹg, m̄-thang tī Í-sek-lia̍t tiong sǹg in ê jîn-kháu.

⁵⁰ Lí tio̍h phài Lī-bī-lâng koán-lí hōe-bō͘ kap lāi-bīn ê khì-khū, pau-koat kng hōe-bō͘ kap lāi-bīn só͘-ū ê khì-khū, chéng-lí hōe-bō͘, tī hōe-bō͘ ê chiu-ûi chat-iâⁿ.

⁵¹ Hōe-bō͘ beh chhut-hoat ê sî, Lī-bī-lâng hū-chek thiah hōe-bō͘; beh an-tì hōe-bō͘ ê sî, Lī-bī-lâng hū-chek tah; nā ū kî-tha ê lâng óa-kūn hōe-bō͘, it-tēng tio̍h hō͘ i sí.

⁵² Í-sek-lia̍t-lâng ta̍k-ê tio̍h tī in só͘ sio̍k chi-cho̍k ê tōa-kî ē-bīn, chiàu in ê pō͘-tūi chat-iâⁿ.

⁵³ M̄-kú Lī-bī-lâng tio̍h tī hōe-bō͘ ê chiu-ûi chat-iâⁿ, hū-chek kò͘-siú hōe-bō͘, chiah bián góa tùi Í-sek-lia̍t hōe-chiòng hoat tōa siū-khì.”

⁵⁴ Siōng Chú án-chóaⁿ hoan-hù Mô͘-se, Í-sek-lia̍t-lâng lóng chiàu án-ni chòe.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan