Bìoball air-loidhne

A-mô͘-sū-su 9 - 現代台語譯本羅馬字版

Siōng Chú ê Sím-phòaⁿ

¹ Góa khòaⁿ-kìⁿ Chú khiā tī chè-tôaⁿ piⁿ; I kóng, “Tio̍h kòng thiāu ê téng-chō, kòng kah ki-chō iô-tāng, hō͘ chhù-téng hām--lo̍h-lâi, teh-tio̍h chèng-lâng ê thâu-khak; teh bô sí--ê, góa beh ēng to thâi-sí, bô chi̍t ê cháu ōe lī, liân chi̍t ê to bô lâu--teh.

² In nā ó͘-khang, chǹg ji̍p-khì Im-kan, góa mā beh tùi hia kā in lia̍h--chhut-lâi; nā peh-chiūⁿ thiⁿ, góa mā beh tùi hia kā thoa--lo̍h-lâi.

³ In nā bih tī Ka-bi̍t soaⁿ-téng, góa mā beh kā in chhē kàu tio̍h, lia̍h--chhut-lâi; nā môa-kè góa ê ba̍k-chiu khì bih tī hái-tóe, góa mā beh bēng-lēng chôa khì kā in.

⁴ In nā hō͘ tùi-te̍k lia̍h--khì, góa beh tùi hia bēng-lēng to-kiàm kā in thâi-sí. Góa beh kā in kò͘-tiâu-tiâu, m̄-sī beh pó-hō͘ in, sī beh kā in hêng-hoa̍t.”

⁵ Chì-koân ê Siōng Chú — Bān-kun ê Thóng-sòe chi̍t-ē bong-tio̍h tōe, tōe chiū siau-iûⁿ; só͘-ū tòa tī tōe-chiūⁿ--ê lóng ōe ai-siong; choân-tōe ōe chhin-chhiūⁿ Nî-lô-hô tiòng--khí-lâi, chhin-chhiūⁿ Ai-ki̍p tōa-hô ê chúi kàng-kē.

⁶ I tī thiⁿ-téng khí I tòa ê só͘-chāi, tī tōe-chiūⁿ hē kiong-chhong ê tōe-ki, kiò hái-chúi lâi piàⁿ tī tōe-chiūⁿ. I ê chheng-ho͘ sī Siōng Chú.

⁷ Siōng Chú kóng, “Í-sek-lia̍t-lâng ah, Góa tùi-thāi lín kiám m̄-sī kap tùi-thāi Kó͘-si̍t-lâng siâng-khoán? Góa kiám m̄-sī ū chhōa Í-sek-lia̍t-lâng chhut Ai-ki̍p, ū chhōa Hui-lī-sū-lâng chhut Ka-hui-thok, chhōa Sū-lī-a-lâng chhut Kiat-ní?

⁸ Góa — Chì-koân ê Siōng Chú kim-kim teh khòaⁿ chit-ê ū-chōe ê Í-sek-lia̍t-kok, beh tùi tōe-chiūⁿ kā i siau-bia̍t, m̄-kú bōe kā Ngá-kok ê hō͘-tāi lóng-chóng châu-bia̍t. Siōng Chú án-ni soan-pò͘.

⁹ “Góa beh chhut bēng-lēng, kā Í-sek-lia̍t-ke khǹg tī thai-á, kap bān-kok chòe-hé thai, liân chi̍t lia̍p sòe-lia̍p chio̍h-thâu to bô beh hō͘ i lak--khì.

¹⁰ Góa ê chú-bîn tiong-kan só͘-ū ū-chōe ê lâng kóng, ‘Chai-hō bōe jip-tio̍h goán, bōe lîm-kàu goán.’ Chiah-ê lâng lóng ōe sí tī to-ē.”

Í-sek-lia̍t ê Ho̍k-heng

¹¹ Siōng Chú kóng, “Tī hit-ji̍t, góa beh tiông-kiàn Tāi-pi̍t tó-hoāi ê pò͘-pîⁿ; góa beh siu-pó͘ i ê phòa-khiah, beh tùi hong-hòe tiong têng-sin khí-chō, hō͘ i hôe-ho̍k chá-chêng ê chêng-kéng;

¹² hō͘ Í-sek-lia̍t ōe-tàng tit-tio̍h chhun--lo̍h-lâi ê Í-tong-lâng, í-ki̍p só͘-ū sio̍k góa ê kok-ka.” Beh sêng-chiū chit-ê sū ê Siōng Chú án-ni soan-pò͘.

¹³ Siōng Chú kóng: Ji̍t-chí beh kàu, siu-koah--ê ōe hō͘ lôe-chhân--ê jip--tio̍h; ta̍h phû-tô--ê ōe hō͘ chèng phû-tô--ê jip--tio̍h; tōa-soaⁿ ōe tih tiⁿ-chiú, sió-soaⁿ ōe lâu sin-chiú.

¹⁴ Góa beh chhōa góa siū-lia̍h ê chú-bîn Í-sek-lia̍t tò-tńg--lâi. In ōe tiông-kiàn hong-hòe ê siâⁿ-chhī, koh tòa tī hia; in ōe chai-chèng phû-tô, lim chhut-sán ê chiú; in ōe keng-choh ké-chí-hn̂g, chia̍h chhut-sán ê ké-chí.

¹⁵ Góa beh hō͘ in khiā-khí tèng-kun tī ka-kī ê thó͘-tōe; in bōe koh hō͘ lâng tùi góa siúⁿ-sù hō͘ in ê thó͘-tōe pu̍ih--khí-lâi. Siōng Chú — lín ê Siōng-tè án-ni soan-pò͘.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan