Bìoball air-loidhne

A-mô͘-sū-su 5 - 現代台語譯本羅馬字版

Í-sek-lia̍t-lâng Tio̍h Hóe-kái

¹ Í-sek-lia̍t-lâng ah, tio̍h thiaⁿ, góa beh tùi lín chhiùⁿ chi̍t siú ai-ko:

² Siàu-lú Í-sek-lia̍t poa̍h-tó, bōe koh khí--lâi; i tī ka-kī ê thó͘-tōe hō͘ lâng pàng-sak, bô lâng kā i hû--khí-lâi.

³ In-ūi Chì-koân ê Siōng Chú án-ni kóng: Í-sek-lia̍t ê siâⁿ, chi̍t-chheng ê chhut-cheng, chhun chi̍t-pah ê tńg--lâi, chi̍t-pah ê chhut-cheng, chhun cha̍p ê tńg--lâi.

⁴ Siōng Chú tùi Í-sek-lia̍t-lâng kóng: Tio̍h chhē-kiû góa, lín chiū ōe oa̍h.

⁵ M̄-thang khì Pek-te̍k-lī chhē, m̄-thang ji̍p-khì Kiat-kah, mā m̄-thang kè-khì Pia̍t-sī-pa; in-ūi Kiat-kah ê lâng it-tēng ōe hō͘ lâng lia̍h--khì, Pek-te̍k-lī ōe bia̍t-bông.

⁶ Tio̍h chhē-kiû Siōng Chú, lín chiū ōe oa̍h; nā bô, I ōe chhin-chhiūⁿ iām-hé thun-bia̍t Iok-sek ê ke, sio-chīn Pek-te̍k-lī, bô lâng ōe-tàng kā i phah-hoa.

⁷ Lín chhám ah, lín oai-khiok chèng-ti̍t, thún-ta̍h kong-gī.

⁸ Lín tio̍h chhē hit-ūi Chhòng-chō-chú; I chhòng-chō Báu-chhiⁿ kap Chham-chhiⁿ, hō͘ o͘-àm pìⁿ-chòe lê-bêng, hō͘ ji̍t--sî pìⁿ-chòe àm-mî, bēng-lēng hái-chúi piàⁿ tī tōe-bīn. I ê chheng-ho͘ sī Siōng Chú.

⁹ I hō͘ pó-lúi hut-jiân húi-hoāi, hō͘ iàu-sài pìⁿ-chòe thô͘-tui.

¹⁰ Lín oàn-hūn tī siâⁿ-mn̂g-kháu chú-chhî kong-tō ê lâng, iàm-ò͘ⁿ kóng chin-si̍t-ōe ê lâng;

¹¹ lín thún-ta̍h sàn-chhiah-lâng, pak-siah in só͘ siu-sêng--ê, só͘-í lín ēng phah--kè ê chio̍h-thâu khí ê súi-chhù tòa bōe tio̍h, hó ê phû-tô-hn̂g chhut-sán ê chiú mā lim bōe tio̍h.

¹² Góa chai lín ê chōe-kò jōa-á-ni̍h tōa, lín ê chōe sǹg bōe liáu; lín ap-chè gī-lâng, siu hóe-lō͘, tī siâⁿ-mn̂g-kháu oan-óng sàn-chhiah-lâng.

¹³ Tī chit-khoán siâ-ok ê sî-sè, khiáu-lâng lóng tiām-tiām m̄ kóng-ōe.

¹⁴ Tio̍h tui-kiû hó, m̄-thang tui-kiû pháiⁿ, lín chiah ōe oa̍h; án-ni, Siōng Chú — Bān-kun ê Thóng-sòe Siōng-tè ōe chiàu lín só͘ kóng--ê kap lín tông-chāi.

¹⁵ Tio̍h oàn-hūn pháiⁿ, ì-ài hó; tī siâⁿ-mn̂g-kháu chú-chhî kong-tō; án-ni, kiám-chhái Siōng Chú — Bān-kun ê Thóng-sòe Siōng-tè ōe si-un hō͘ Iok-sek-ke chhun ê kiáⁿ-sun.

¹⁶ Só͘-í, Chì-koân ê Siōng Chú — Bān-kun ê Thóng-sòe Siōng-tè án-ni kóng: Tī só͘-ū ê kóng-tiûⁿ ū ai-khàu, tī ta̍k-tiâu koe-lō͘ ū lâng kóng, “Chhám ah, chhám ah!” In ōe kiò choh-sit-lâng lâi thî-khàu, chhiàⁿ gâu chhiùⁿ ai-ko--ê lâi ai-khàu.

¹⁷ Tī só͘-ū ê phû-tô-hn̂g ōe ū ai-khàu, in-ūi góa beh lâi kā lín hêng-hoa̍t. Siōng Chú án-ni soan-kò.

¹⁸ Lín ǹg-bāng Siōng Chú ê ji̍t ê lâng, chhám ah! Lín sī-án-chóaⁿ teh ǹg-bāng Siōng Chú ê ji̍t? Hit-ji̍t sī àm, m̄-sī kng.

¹⁹ Hit-ji̍t lâi-lîm ōe chhin-chhiūⁿ lâng siám-pī sai soah tú-tio̍h hîm; ji̍p-khì chhù-lāi, chhiú hōaⁿ piah soah hō͘ chôa kā--tio̍h.

²⁰ Siōng Chú ê ji̍t sī àm, m̄-sī kng; àm-àm-àm, chi̍t-si-á kng to bô.

²¹ Góa iàm-ò͘ⁿ, kū-choa̍t lín ê choeh-kî, mā bô ài lín ê giâm-siok-hōe.

²² Lín hiàn sio-hòa-chè kap sò͘-chè hō͘ góa, góa m̄ chiap-siū; lín hiàn pûi ê cheng-siⁿ chòe pêng-an-chè, góa mā bô beh chiap-la̍p.

²³ Tio̍h hō͘ lín chhiùⁿ-koa ê siaⁿ lī-khui góa; lín tôaⁿ-khîm ê tiāu, góa bô ài thiaⁿ.

²⁴ Tio̍h hō͘ kong-pêng chhin-chhiūⁿ tōa-chúi tn̂g-lâu, hō͘ kong-gī chhin-chhiūⁿ kang-hô ti̍t-ti̍t lâu.

²⁵ Í-sek-lia̍t-lâng ah, lín tī khòng-iá sì-cha̍p nî, kiám ū hiàn seng-lé kap lé-mi̍h hō͘ góa?

²⁶ Lín kng lín ūi ka-kī chō ê sîn-bêng Sat-kò͘-ông kap Ka-un chhiⁿ-sîn ê siōng.

²⁷ Só͘-í góa beh hō͘ lín siū-lia̍h khì pí Tāi-má-sū-kek koh-khah hn̄g ê só͘-chāi. Siōng Chú — Bān-kun ê Thóng-sòe Siōng-tè án-ni soan-kò.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan