Bìoball air-loidhne

A-mô͘-sū-su 3 - 現代台語譯本羅馬字版

Sian-ti ê Jīm-bū

¹ Í-sek-lia̍t-lâng ah, tio̍h thiaⁿ góa Siōng Chú chek-pī lín ê ōe: Lín choân-ke sī góa tùi Ai-ki̍p-tōe chhōa--chhut-lâi--ê;

² tī tōe-chiūⁿ bān-cho̍k tiong góa chí-ū kéng lín, só͘-í góa beh in-ūi lín só͘ hoān it-chhè ê chōe hêng-hoa̍t lín.

³ Nn̄g ê lâng nā bô sio-iok, ná ōe tàu-tīn kiâⁿ?

⁴ Sai nā bô la̍h-bu̍t, kiám ōe tī chhiū-nâ lāi háu? Sai-á-thûn nā bô tit-tio̍h chia̍h-mi̍h, kiám ōe tī tōng-lāi chhut-siaⁿ?

⁵ Oa̍h-tauh nā bô khǹg jī, ná ōe tng-tio̍h chiáu-á? Nā bô ta̍h-tio̍h ki-koan, oa̍h-tauh ná ōe ha̍p--khí-lâi?

⁶ Siâⁿ-lāi nā ū sàu-kak ê siaⁿ, chū-bîn kiám bōe kiaⁿ? Siâⁿ-lāi nā ū chai-hō, kiám m̄-sī Siōng Chú só͘ kàng?

⁷ Chì-koân ê Siōng Chú kè-ōe beh chòe tāi-chì, it-tēng ōe tāi-seng chí-sī I ê po̍k-jîn sian-ti.

⁸ Sai teh háu, siáⁿ-lâng bōe kiaⁿ? Chì-koân ê Siōng Chú kóng-ōe, siáⁿ-lâng káⁿ bô thoân-ta̍t?

Sat-má-lī-a ê Kiat-kio̍k

⁹ Tio̍h tī A-si̍t-tu̍t ê kiong-tiān kap Ai-ki̍p ê kiong-tiān soan-pò͘: Tio̍h tī Sat-má-lī-a ê soaⁿ chū-chi̍p, khòaⁿ siâⁿ-lāi ê tōa jiáu-loān kap lāi-bīn khi-ap jîn-bîn ê sū.

¹⁰ In-ūi in bōe-hiáu chòe chèng-ti̍t ê tāi-chì; in ê kiong-tiān tún-móa ēng kiông-pō chhiúⁿ--lâi ê mi̍h. Siōng Chú án-ni soan-kò.

¹¹ Só͘-í Chì-koân ê Siōng Chú án-ni kóng: Ū tùi-te̍k beh lâi ûi-khùn chit-ê tōe, kong-phòa lí ê hông-ōe-sòaⁿ, chhiúⁿ lí ê kiong-tiān.

¹² Siōng Chú án-ni kóng: Chhin-chhiūⁿ bo̍k-chiá tùi sai ê chhùi chhiúⁿ--chhut-lâi--ê, kan-ta nn̄g ki iûⁿ-kha, á-sī chi̍t-tè-á hī-á, tī Sat-má-lī-a kè chhia-chhí seng-oa̍h ê Í-sek-lia̍t-lâng, ōe-tàng tô-thoat--ê mā-sī hiah-ni̍h chió.

¹³ Chì-koân ê Siōng Chú — Bān-kun ê Thóng-sòe Siōng-tè kóng: Tio̍h thiaⁿ, tio̍h kéng-kò Ngá-kok ê hō͘-tāi.

¹⁴ Góa in-ūi Í-sek-lia̍t-lâng hoān-chōe kā in hêng-hoa̍t hit-ji̍t, góa beh húi-hoāi Pek-te̍k-lī ê chè-tôaⁿ; tôaⁿ ê kak ōe siū chám-tn̄g, lak-lo̍h tōe.

¹⁵ Góa beh thiah-húi in tang-thiⁿ joa̍h-thiⁿ ê pia̍t-chong; chhiūⁿ-gê chng-thāⁿ ê chhù ōe siū húi-bia̍t, liân tōa keng chhù to ōe bô--khì. Siōng Chú án-ni soan-kò.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan