Bìoball air-loidhne

A-mô͘-sū-su 1 - 現代台語譯本羅馬字版

¹ Ē-bīn sī Thê-ko-a chi̍t ê kò͘-iûⁿ-lâng A-mô͘-sū ê ōe. O͘-se-a chòe Iû-tāi-ông, Iok-hôa-si ê kiáⁿ Iâ-lô-pho-an Jī-sè chòe Í-sek-lia̍t-ông ê nî-kan, chiū-sī tōa tōe-tāng chêng nn̄g nî, Siōng-tè kā A-mô͘-sū khé-sī iú-koan Í-sek-lia̍t ê sū.

² A-mô͘-sū kóng: “Siōng Chú tùi Sek-an chhin-chhiūⁿ sai teh háu, tùi Iâ-lō͘-sat-léng chhin-chhiūⁿ lûi teh tân; kò͘-iûⁿ-lâng ê chháu-po͘ ta--khì, Ka-bi̍t ê soaⁿ-téng lóng ko͘-tâ.”

Siōng-tè tùi Lia̍t-kok ê Sím-phòaⁿ Tùi Sū-lī-a

³ Siōng Chú án-ni kóng, “Tāi-má-sū-kek-lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in ge̍k-thāi Ki-lia̍t-lâng, chhin-chhiūⁿ ēng thih-khí-pang géng ngó͘-kok.

⁴ Só͘-í, góa beh pàng-hé sio Hap-sih ê ông-kiong, sio-húi Piān Hap-ta̍t ê kiong-tiān.

⁵ Góa beh lòng-tn̄g Tāi-má-sū-kek-siâⁿ ê mn̂g-chhòaⁿ, beh siau-bia̍t A-bûn pêng-goân ê chū-bîn, í-ki̍p Pek I-tiân ê thóng-tī-chiá, chiong Sū-lī-a-lâng lia̍h-khì Kiat-ní.” Siōng Chú án-ni soan-kò.

Tùi Hui-lī-sū

⁶ Siōng Chú án-ni kóng, “Ka-sat-lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in lia̍h só͘-ū ê chū-bîn, bōe hō͘ Í-tong-lâng chòe lô͘-châi.

⁷ Só͘-í, góa beh pàng-hé sio Ka-sat ê siâⁿ-chhiûⁿ, sio-húi i ê kiong-tiān.

⁸ Góa beh siau-bia̍t A-si̍t-tu̍t ê chū-bîn, í-ki̍p A-si̍t-ki-lûn ê thóng-tī-chiá; góa beh chhun-chhiú kong-kek Í-kek-lûn, ti̍t-kàu só͘ chhun ê Hui-lī-sū-lâng lóng bia̍t-bông.” Chì-koân ê Siōng Chú án-ni soan-kò.

Tùi Thài-ní

⁹ Siōng Chú án-ni kóng, “Thài-ní-lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in lia̍h kui-cho̍k ê chū-bîn, bōe hō͘ Í-tong-lâng chòe lô͘-châi, bô chun-siú kap iú-pang só͘ tēng ê bêng-iok.

¹⁰ Só͘-í, góa beh pàng-hé sio Thài-ní ê siâⁿ-chhiûⁿ, sio-húi i ê kiong-tiān.”

Tùi Í-tong

¹¹ Siōng Chú án-ni kóng, “Í-tong-lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; in-ūi in ēng to-kiàm tui-sat ka-kī ê hiaⁿ-tī, chi̍t-tiám-á to bô lîn-bín ê sim, in hoat sèng-tē bô-thêng, khí siū-khì bô-soah.

¹² Só͘-í, góa beh pàng-hé sio Thê-bān, sio-húi Pho-su-la ê kiong-tiān.”

Tùi A-bûn

¹³ Siōng Chú án-ni kóng, “A-bûn-lâng chi̍t-piàn koh chi̍t-piàn hoān-chōe, góa it-tēng beh hêng-hoa̍t in; ūi-tio̍h beh khok-tián in ê léng-thó͘, in phòa-khui Ki-lia̍t ū-sin ê hū-jîn-lâng.

¹⁴ Só͘-í, tī chiàn-cheng háng-hoah ê ji̍t, tī kông-hong-tāi-chok ê sî, góa beh pàng-hé sio La-pa ê siâⁿ-chhiûⁿ, sio-húi i ê kiong-tiān;

¹⁵ In ê ông ōe siū hòng-tio̍k, ông kap i ê koaⁿ-oân chòe-hé siū-lia̍h.” Siōng Chú án-ni soan-kò.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan