Ai-ko 5 - 現代台語譯本羅馬字版

Ai-kiû Lîn-bín

¹ Siōng Chú ah, kiû lí ōe-kì-tit goán ê cho-gū, àⁿ-lo̍h khòaⁿ goán só͘ siū ê lêng-jio̍k.

² Goán ê sán-gia̍p lo̍h tī siⁿ-hūn-lâng ê chhiú-tiong; goán ê chhù-the̍h hō͘ gōa-cho̍k-lâng the̍h--khì.

³ Goán chiâⁿ-chòe bô pē ê ko͘-jî; goán ê lāu-bú chhin-chhiūⁿ kóaⁿ-hū.

⁴ Goán liân lim ka-kī ê chúi mā tio̍h hù-chîⁿ, liân ka-kī beh hiâⁿ ê chhâ mā tio̍h bóe.

⁵ Goán chhin-chhiūⁿ ām-kún kòa taⁿ ê gû hō͘ lâng kóaⁿ, lô-lo̍k ià-siān, bô thang hioh-khùn.

⁶ Goán tio̍h ǹg Ai-ki̍p kap A-su̍t tâu-hâng, chiah chia̍h ōe pá.

⁷ Goán ê chó͘-sian hoān-chōe; taⁿ in mā í-keng bô tī--teh lah, m̄-kú goán soah in-ūi in ê chōe siū-khó͘.

⁸ Chòe lô͘-châi ê lâng koán-hat goán, mā bô lâng kiù goán thoat-lī in ê chhiú.

⁹ Khòng-iá ū kiông-tō, goán tio̍h mō͘ sìⁿ-miā ê gûi-hiám chhē-chia̍h.

¹⁰ Goán in-ūi iau-gō hoat-jia̍t, phê-hu o͘ chhin-chhiūⁿ hé-lô͘.

¹¹ Hū-jîn-lâng tī Sek-an siū kiông-pō, siàu-lú tī Iû-tāi ê siâⁿ-tìn siū lêng-jio̍k.

¹² Goán ê léng-siù hō͘ lâng tiàu--khí-lâi; lāu-lâng bô siū chun-tiōng.

¹³ Siàu-liân-lâng siū-pek oe chio̍h-bō; gín-á in-ūi phāiⁿ chhâ poa̍h-tó.

¹⁴ Lāu-lâng bô koh tī siâⁿ-mn̂g-kháu chū-chi̍p; siàu-liân-lâng bô koh tôaⁿ-khîm chok-ga̍k.

¹⁵ Goán ê sim bô koh ū hí-lo̍k; thiàu-bú pìⁿ-chòe ai-khàu.

¹⁶ Goán ê ông-koan tùi thâu-khak lak--lo̍h-lâi; goán hoān-chōe, goán ū chai-hō lah.

¹⁷ Goán in-ūi chiah-ê sū sim-hoân-ì-loān; ba̍k-sái hō͘ goán ê ba̍k-chiu bông-bū.

¹⁸ Sek-an-soaⁿ í-keng pha-hng, chhâi-lông tī hia lōa-lōa-sô.

¹⁹ Siōng Chú, lí éng-oán chûn-chāi; lí ê thóng-tī ti̍t-kàu bān sè-tāi.

²⁰ Lí sī-án-chóaⁿ it-ti̍t bōe-kì-tit goán? Lí sī-án-chóaⁿ tn̂g-kî khì-sak goán?

²¹ Siōng Chú ah, kiû lí hō͘ goán hôe-sim-tńg-ì, hō͘ goán oa̍t-thâu kui-ǹg lí. Kiû lí ōaⁿ-sin goán ê sìⁿ-miā, chhin-chhiūⁿ chá-sî ê ji̍t-chí!

²² Lí ná thang éng-oán siū-khì goán? Lí ná thang éng-oán khì-sak goán?

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan