Bìoball air-loidhne

Ai-ko 4 - 現代台語譯本羅馬字版

Hām-lo̍h Āu ê Iâ-lō͘-sat-léng

¹ Ah, n̂g-kim kèng-jiân àm-tām bô kng, sûn-kim kèng-jiân sit-khì kong-chhái! Sèng-tiān ê chio̍h-thâu kèng-jiân sòaⁿ kah kui koe-lō͘.

² Sek-an chun-kùi ê chú-bîn kè-ta̍t chhin-chhiūⁿ sûn-kim, hiān-chāi soah hō͘ lâng khòaⁿ-chòe sio-hûi sai-hū chòe ê chho͘-hûi.

³ Chhâi-lông iáu-kú hō͘ i ê kiáⁿ suh-lin, góa ê chú-bîn kèng-jiân chân-jím chhin-chhiūⁿ khòng-iá ê tô-chiáu.

⁴ Chia̍h-lin ê eⁿ-á bô lin thang suh, chhùi-ta kah chhùi-chi̍h liâm tī téng-kiuⁿ; gín-á thó chia̍h-mi̍h, liân chi̍t-sut-á to bô lâng pun hō͘ in.

⁵ Pêng-sî chia̍h san-tin-hái-bī ê lâng, hiān-chāi gō-sí tī koe-lō͘; kè-khì seng-oa̍h chhia-chhí ê lâng, hiān-chāi tī pùn-sò-tui chhē mi̍h chia̍h.

⁶ Siōng-tè chi̍t-ba̍k-nih-kú húi-bia̍t Só͘-to-má, bô ēng lâng ê chhiú; góa ê chú-bîn ê chōe, pí Só͘-to-má chū-bîn ê chōe koh-khah tāng.

⁷ Kè-khì, Sek-an ê Ná-sè-ní-lâng pí seh khah pe̍h, pí lin khah sûn; in ê seng-khu pí âng-pó-chio̍h khah âng, siⁿ-chòe súi chhin-chhiūⁿ nâ-pó-chio̍h.

⁸ Hiān-chāi, in ê bīn pí hé-thòaⁿ khah o͘, siau-sán-lo̍h-bah, sán kah chhin-chhiūⁿ chhâ; in tī lō͘--ni̍h bô lâng ōe-jīn--tit.

⁹ Hō͘ lâng thâi--sí-ê pí gō--sí-ê khah hó; gō-sí sī bô chia̍h-mi̍h, bān-bān siau-sán lâi sí.

¹⁰ Góa ê chú-bîn siū húi-bia̍t ê sî, liân jîn-chû ê lāu-bú to chú ka-kī ê kiáⁿ chia̍h!

¹¹ Siōng Chú hoat tōa siū-khì, piàⁿ-chhut pak-lāi ê lia̍t-hé, ēng hé sio Sek-an, liân tōe-ki mā kā i sio-húi.

¹² Sè-kan ê kun-ông kap tōe-chiūⁿ ê chū-bîn, lóng bōe-tàng siong-sìn ū tùi-te̍k ōe-tàng kong-ji̍p Iâ-lō͘-sat-léng ê siâⁿ-mn̂g.

¹³ Che lóng sī in-ūi in sian-ti ê chōe-ok kap chè-si ê chōe-gia̍t; in thâi-sí siâⁿ-lāi kong-gī chèng-ti̍t ê lâng.

¹⁴ In chhin-chhiūⁿ bông-jîn tī koe-lō͘ sì-kòe se̍h, kui seng-khu bak kah choân-choân huih, bô lâng káⁿ bong-tio̍h in ê saⁿ, khióng-kiaⁿ bô chheng-khì.

¹⁵ Lâng hoah in: Cháu! Siám-khui! Lín chiah-ê bô chheng-khì ê lâng, mài óa--lâi! In pìⁿ-chòe lān-bîn sì-kòe liû-lōng, bô chi̍t ê kok-ka khéng siu-liû in.

¹⁶ Siōng Chú chhin-sin kā in kóaⁿ-sòaⁿ, bô koh khòaⁿ-kò͘ in; chè-si bô siū khòaⁿ-tāng, tiúⁿ-ló bô siū chun-tiōng.

¹⁷ Goán khòaⁿ kah ba̍k-chiu hoe, iáu khòaⁿ bōe tio̍h kiù-chō͘ ê ǹg-bāng; goán thèng-hāu koh-chài thèng-hāu--ê, kèng-jiân sī chi̍t ê bô-la̍t kái-kiù goán ê kok-ka.

¹⁸ Tùi-te̍k tui-chong goán ê kha-pō͘, hāi goán m̄-káⁿ tī koe-lō͘ kiâⁿ. Goán ê ji̍t-chí móa lah! Goán ê kiat-kio̍k kàu lah!

¹⁹ Tui-jip goán ê lâng pí khong-tiong teh pe ê eng-chiáu khah kín; in tī soaⁿ--ni̍h tui-jip goán, tī khòng-iá bâi-ho̍k thèng-hāu goán.

²⁰ Siōng Chú boah-iû soán-li̍p ê kun-ông sī goán ê sìⁿ-miā; goán bat án-ni siūⁿ: Tī i ê pó-hō͘-ē, goán ōe-tàng tī lia̍t-kok tiong seng-chûn. M̄-kú i lo̍h tī hām-khiⁿ hō͘ lâng lia̍h--khì.

²¹ Í-tong-lâng, O͘-su ê chū-bîn ah, chhut-chāi lín hoaⁿ-hí khoài-lo̍k! Khó͘-poe mā ōe lûn kàu lín lim; lín beh lim kah chiú-chùi, chhiah-sin-lō͘-thé.

²² Sek-an ah, lí chōe-kò ê hêng-hoa̍t í-keng móa, Siōng Chú bōe koh hō͘ lí siū hòng-tio̍k. Í-tong ah, Siōng Chú beh hêng-hoa̍t lí, beh po̍k-lō͘ lí ê chōe-ok.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan