Bìoball air-loidhne

Ai-ko 2 - 現代台語譯本羅馬字版

Siōng Chú Hêng-hoa̍t Iâ-lō͘-sat-léng

¹ Ài ah! Siōng Chú kèng-jiân hoat tōa siū-khì, hō͘ Sek-an kiàn-siàu! I chiong Í-sek-lia̍t ê êng-hôa tùi thiⁿ hiat-lo̍h tōe; tī I siū-khì ê ji̍t, liân ka-kī ê kha-tiam, sèng-tiān, I mā bô kò͘-liām.

² Siōng Chú húi-bia̍t Ngá-kok lóng-chóng ê chháu-po͘, chi̍t-sut-á to bô lîn-bín. I hoat tōa siū-khì, thiah-húi Iû-tāi ê pó-lúi, hō͘ Iû-tāi kap i ê léng-siù thiat-tóe siū lêng-jio̍k.

³ I hoat tōa siū-khì, siau-bia̍t Í-sek-lia̍t só͘-ū ê khùi-la̍t; tùi-te̍k lâi ê sî, I m̄ chhun-chhiú pó-hō͘. I chhin-chhiūⁿ hé-iām thun-bia̍t Ngá-kok, chiong i só͘-ū--ê lóng sio-húi.

⁴ I chhin-chhiūⁿ tùi-te̍k ǹg góa khui keng, chhin-chhiūⁿ te̍k-jîn ēng chìⁿ siā góa. I chiong goán ióng-chòng ê siàu-liân-lâng lóng thâi-sí; I ê tōa siū-khì hoat-chhut, chhin-chhiūⁿ hé sio-húi Sek-an ê pò͘-pîⁿ.

⁵ Siōng Chú chhin-chhiūⁿ tùi-te̍k, húi-bia̍t Í-sek-lia̍t; I thiah-húi Í-sek-lia̍t ê kiong-tiān, hō͘ pó-lúi hong-hòe; I ke-thiⁿ Iû-tāi jîn-bîn ê pi-siong kap ai-khàu.

⁶ I húi-hoāi I ka-kī khiā-khí ê só͘-chāi, chhin-chhiūⁿ húi-hoāi hn̂g-á; I thiah-húi sèng-tiān. Siōng Chú hō͘ Sek-an ê lâng bōe-kì-tit choeh-kî kap An-hioh-ji̍t; I tī tōa siū-khì tiong khì-sak kun-ông kap chè-si.

⁷ Siōng Chú hòng-khì ka-kī ê chè-tôaⁿ, pàng-sak I ê sèng-só͘; I chiong kiong-tiān ê ûi-chhiûⁿ kau hō͘ tùi-te̍k, chhut-chāi in thiah-húi. In tī Siōng Chú ê tiān-lāi, tōa-siaⁿ soan-hoa, chhin-chhiūⁿ teh kè-choeh.

⁸ Siōng Chú koat-tēng beh thiah-húi Sek-an ê siâⁿ-chhiûⁿ; I giú chún-chîn, beh phò-hoāi; I ê chhiú bô koh siu-hôe. I hō͘ siâⁿ-lâu kap siâⁿ-chhiûⁿ ai-khàu, chòe-hé tó-hoāi.

⁹ Sek-an ê siâⁿ-mn̂g í-keng tâi tī thô͘--ni̍h; Siōng Chú kòng-tn̄g siâⁿ-mn̂g ê mn̂g-chhòaⁿ. Kun-ông kap léng-siù lóng siū hòng-tio̍k khì lia̍t-kok. Sek-an bô lâng káng-kái lu̍t-hoat; sian-ti bô koh tùi Siōng Chú tit-tio̍h īⁿ-siōng.

¹⁰ Sek-an ê tiúⁿ-ló chē tī thô͘-kha, tiām-tiām bô chhut-siaⁿ. In iā thô͘-soa-hún sám thâu-khak, seng-khu chhēng môa-saⁿ; Iâ-lō͘-sat-léng ê siàu-lú thâu-lôe-lôe tàm kàu thô͘-kha.

¹¹ Góa ê ba̍k-chiu in-ūi lâu ba̍k-sái sit-bêng, góa ê tn̂g-á kiáu-ká, góa ê ngó͘-chōng siau-iûⁿ; góa ê tông-pau siū châu-bia̍t, gín-á kap eⁿ-á hūn-tó tī siâⁿ-lāi ê kóng-tiûⁿ.

¹² In chhin-chhiūⁿ siū-siong ê chiàn-sū hūn-tó tī kóng-tiûⁿ, tī lāu-bú ê heng-chêng bān-bān tn̄g-khùi; in mn̄g lāu-bú, kóng: Ū sím-mi̍h thang chia̍h--bô? Ū sím-mi̍h thang lim--bô?

¹³ Iâ-lō͘-sat-léng, góa ōe-tàng thòe lí kóng sím-mi̍h? Góa ōe-tàng ēng sím-mi̍h pí-phēng lí? Sek-an, góa thang ēng sím-mi̍h kap lí pí-kàu lâi an-ùi lí? Lí ê khang-chhùi chhin-chhiūⁿ hái hiah-ni̍h tōa, siáⁿ-lâng ōe-tàng kā lí i-tī?

¹⁴ Lí ê sian-ti khòaⁿ--kìⁿ-ê sī bô-iáⁿ-chiah, phiàn--lâng ê īⁿ-siōng; in m̄-bat chí-chhut lí ê chōe, hō͘ lí hóe-kái, m̄-bián siū lia̍h; in thoân hō͘ lí--ê sī hu-ké, kiâⁿ bê-lō͘ ê be̍k-sī.

¹⁵ Só͘-ū ê kè-lō͘-lâng lóng phah-pho̍k-á, hàiⁿ-thâu thí-chhiò Iâ-lō͘-sat-léng, kóng: Che kiám sī lâng teh kóng hit-ê si̍p-choân-si̍p-bí ê siâⁿ? Che kiám sī choân sè-kài ê lâng lóng teh o-ló ê siâⁿ?

¹⁶ Só͘-ū ê tùi-te̍k lóng kā lí phì-siùⁿ; in thí-chhiò lí, kā-gê-chhiat-chhí kóng: Goán í-keng chiong i thun-bia̍t lah! Goán chiū-sī teh thèng-hāu chit-ji̍t! Taⁿ goán chhin-ba̍k khòaⁿ--tio̍h lah!

¹⁷ Siōng Chú í-keng oân-sêng I ê kè-ōe, si̍t-hiān I chá-chêng tiāⁿ-tio̍h ê kéng-kò; I thiah-húi, chi̍t-sut-á to bô liû-chêng. I hō͘ tùi-te̍k tùi lí khoa-kháu, hō͘ in iāu-bú-iông-ui.

¹⁸ Tio̍h tùi sim-tóe kiû-kiò Chú! Iâ-lō͘-sat-léng ê siâⁿ-chhiûⁿ ah, goān lí ê ba̍k-sái chhin-chhiūⁿ kang-hô ti̍t-ti̍t lâu, mî-ji̍t bô-thêng! Goān lí ê ba̍k-chiu lâu ba̍k-sái bô hioh-khùn!

¹⁹ Tio̍h tī ta̍k-àm ōaⁿ-kiⁿ ê sî khí-lâi kiû-kiò; ǹg Siōng Chú thò͘-lō͘ lí ê sim-siaⁿ chhin-chhiūⁿ piàⁿ-chúi; tio̍h gia̍h siang-chhiú ūi-tio̍h lín ê gín-á ê sìⁿ-miā kî-tó, in tī koe-lō͘ iau kah teh-beh sí--khì.

²⁰ Siōng Chú, kiû lí khòaⁿ, khòaⁿ lí kiám bat án-ni kā lâng chek-hoa̍t--kè? Hū-jîn-lâng kiám thang chia̍h ka-kī só͘ siⁿ só͘ iúⁿ-chhī ê eⁿ-á? Chè-si kap sian-ti ná thang tī Siōng Chú ê sèng-tiān siū sat-hāi?

²¹ Siàu-liân-lâng kap lāu-lâng lóng tó tī koe-lō͘; siàu-lú kap chheng-liân-lâng lóng sí tī to-ē. Lí tī siū-khì ê ji̍t kā in thâi-sí, chi̍t-sut-á to bô liû-chêng.

²² Lí tùi sì-bīn tiàu-chi̍p góa ê tùi-te̍k, chhin-chhiūⁿ kiò lâng lâi kè-choeh. Tī Siōng Chú siū-khì ê ji̍t, bô lâng ōe-tàng tô-thoat, ōe-tàng pó-chûn sìⁿ-miā; tùi-te̍k thâi-sí góa só͘-ū ióng-io̍k ê jî-lú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan