Bìoball air-loidhne

Ai-ko 1 - 現代台語譯本羅馬字版

Iâ-lō͘-sat-léng ê Pi-siong

¹ Ài ah! Chit-ê chá-chêng lâng-khoeh-lâng ê siâⁿ-chhī, hiān-chāi kèng-jiân pha-hng. Chá-chêng tī lia̍t-kok siū kèng-tiōng--ê, hiān-chāi kèng-jiân chhin-chhiūⁿ kóaⁿ-hū. Chá-chêng tī ta̍k siâⁿ-chhī chòe ông-hō͘--ê, hiān-chāi kèng-jiân lo̍k-phek kah chòe lô͘-lē.

² I kui-mî ai-khàu, móa-bīn ba̍k-sái. Chá-chêng ê ài-jîn, hiān-chāi bô chi̍t ê lâi an-ùi. I ê pêng-iú chhut-bōe i, pìⁿ-chòe i ê tùi-te̍k.

³ Iû-tāi liû-bông tī gōa-pang, siū khó͘, chòe khó͘-kang. In tòa tī lia̍t-kok, bōe-tàng an-jiân khiā-khí; in siū ûi-khùn, bô lō͘ tô-thoat.

⁴ Thàng kàu Sek-an ê tōa-lō͘ ai-siong, in-ūi bô lâng lâi kè-choeh; só͘-ū ê siâⁿ-mn̂g hong-hòe, chè-si ai-thàn, siàu-lú pi-siong; Sek-an ut-chut thòng-khó͘.

⁵ I ê tùi-te̍k pìⁿ-chòe chú-lâng; i ê siû-jîn hoân-êng sáng-sè. In-ūi i chi̍t-piàn koh chi̍t-piàn pōe-poān, Siōng Chú hō͘ i siū-khó͘; i ê gín-á hō͘ tùi-te̍k lia̍h--khì.

⁶ Sek-an ê êng-hôa í-keng siau-sit. I ê léng-siù chhin-chhiūⁿ chhē bô chháu-tiûⁿ ê lo̍k; in siám-pī tui-jip in ê lâng, m̄-kú bô-la̍t thang cháu.

⁷ Iâ-lō͘-sat-léng khùn-khó͘ liû-lōng ê sî, hôe-sióng i chá-chêng ê êng-hôa. I ê chū-bîn lo̍h tī tùi-te̍k ê chhiú-thâu, bô lâng kiù-chō͘ i. Tùi-te̍k khòaⁿ-kìⁿ i lûn-hām, hong-chhì thí-chhiò i.

⁸ Iâ-lō͘-sat-léng hoān tōa-chōe, chiâⁿ-chòe lâng ê chhiò-pìⁿ. Chá-chêng chun-tiōng i ê lâng, khòaⁿ i hiān-chāi chhiah-sin-lō͘-thé, chiū biáu-sī i. I ka-kī ai-thàn, kiàn-siàu cháu-khì bih.

⁹ I ê ù-òe kō-tio̍h i ê kûn; i m̄-bat siūⁿ-tio̍h ka-kī ê kiat-kio̍k. I ê tūi-lo̍h hō͘ lâng tio̍h-kiaⁿ; bô lâng an-ùi i. Siōng Chú ah, kiû lí khòaⁿ góa ê khó͘-lān, in-ūi góa ê tùi-te̍k teh tùi góa chhàng-chhiu.

¹⁰ Tùi-te̍k chhun-chhiú chhiúⁿ-toa̍t i choân-pō͘ ê châi-pó; i khòaⁿ-tio̍h gōa-cho̍k-lâng chhim-ji̍p sèng-tiān, chiū-sī Siōng Chú kìm-chí in ji̍p--khì ê só͘-chāi.

¹¹ Jîn-bîn ai-thàn thó͘-khùi, sì-kòe chhē-chia̍h, ūi-tio̍h kiù sìⁿ-miā, the̍h châi-pó ōaⁿ chia̍h-mi̍h. Siōng Chú ah, kiû lí àⁿ-lo̍h khòaⁿ, khòaⁿ góa pìⁿ-chòe chiah-ni̍h pi-chhám!

¹² Lín chiah-ê kè-lō͘-lâng, lín kiám lóng bô iàu-kín? Lín sì-bīn koan-chhat, kiám ū lâng chhin-chhiūⁿ góa án-ni siū khó͘-chhó͘? Che sī Siōng Chú tōa siū-khì ê sî hō͘ góa sêng-siū ê thòng-khó͘.

¹³ I tùi téng-bīn kàng-hé tī góa ê kut-thâu lāi-bīn teh sio. I siat lô-bāng tîⁿ góa ê kha, hō͘ góa poa̍h-tó thè-āu. I pàng góa ko͘-toaⁿ, hō͘ góa kui-ji̍t pi-chhám.

¹⁴ I chiong góa chōe-kò ê taⁿ pa̍k tī góa ê ām-kún, hō͘ góa cheng-le̍k ta--khì. Chú chiong góa kau tī góa bô-la̍t tùi-khòng ê tùi-te̍k chhiú-tiong.

¹⁵ Chú khì-sak góa só͘-ū ê ióng-sū; I tiàu-chi̍p tāi-kun kong-kek góa, teh-chhùi góa ê siàu-liân-lâng. Chú thún-ta̍h góa ê jîn-bîn, chhin-chhiūⁿ tī chiú-khut ta̍h phû-tô kâng-khoán.

¹⁶ Góa ūi-tio̍h chiah-ê sū thî-khàu, góa ê ba̍k-sái ti̍t-ti̍t lâu. Bô lâng tī sin-piⁿ an-ùi góa; bô lâng hō͘ góa koh-chài tit-tio̍h khùi-la̍t. Góa ê jîn-bîn ko͘-khó͘-bû-chō͘, in-ūi góa ê tùi-te̍k thâi-iâⁿ góa.

¹⁷ Sek-an chhun siang-chhiú kî-kiû, m̄-kú bô lâng an-ùi i. Kóng-tio̍h Ngá-kok, Siōng Chú í-keng hā-lēng, hō͘ sì-chiu-ûi ê lâng chiâⁿ-chòe i ê tùi-te̍k; in chiong Iâ-lō͘-sat-léng khòaⁿ-chòe ù-òe ê mi̍h.

¹⁸ Siōng Chú kong-gī, m̄-kú góa ûi-pōe I ê bēng-lēng. Bān-kok ê jîn-bîn, chhiáⁿ thiaⁿ, chhiáⁿ khòaⁿ góa só͘ siū ê thòng-khó͘: Góa ê siàu-lú, góa ê chheng-liân lóng siū lia̍h--khì!

¹⁹ Góa kā pêng-iú kiû oān-chō͘, m̄-kú in khi-phiàn góa. Góa ê chè-si kap tiúⁿ-ló chhē-chia̍h beh kiù sìⁿ-miā, soah tn̄g-khùi sí tī siâⁿ-lāi.

²⁰ Siōng Chú, lí khòaⁿ leh, góa chiah-ni̍h put-hēng thòng-khó͘! Góa ê tn̂g-á ká-kún, góa ê sim-koaⁿ kiat kui-kiû, in-ūi góa tōa-tōa pōe-ge̍k. Tī koe-lō͘ ū hiong-sat, tī chhù-lāi ū sí-bông.

²¹ Lâng thiaⁿ-tio̍h góa haiⁿ-haiⁿ-chhan, m̄-kú bô lâng an-ùi góa. Tùi-te̍k thiaⁿ-kìⁿ góa tú--tio̍h ê chai-hō, lóng in-ūi lí hêng-hoa̍t góa lâi hoaⁿ-hí. Goān lí soan-kò ê ji̍t-chí lâi kàu, hō͘ tùi-te̍k kap góa siâng-khoán siū khó͘-lān.

²² Goān lí khòaⁿ-kìⁿ in só͘-chòe ê siâ-ok, kā in hêng-hoa̍t, chhin-chhiūⁿ lí in-ūi góa ê chōe-kò hêng-hoa̍t góa siâng-khoán. Góa in-ūi ai-thàn bô-soah, góa ê sim-sîn soe-lám.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan