馬太福音 9 - 現代台語譯本漢字版

耶穌醫好半身不遂的人

¹ 耶穌坐船過湖，轉去家己的城。

² 有人用床扛一個半身不遂的人來耶穌遐。伊看見𪜶的信心，就對彼個半身不遂的人講：「少年人，安心，你的罪赦免啦！」

³ 有幾若個經學教師心內想：「此個人啲褻瀆上帝！」

⁴ 耶穌知𪜶的心思就問𪜶：「是按怎恁心內有此款歹念頭？

⁵ 對此個人講『你的罪赦免啦』，抑是講『你起來行』，叨一項較簡單？

⁶ 不過我欲互恁知，人子佇地上有赦罪的權柄。」然後伊對彼個半身不遂的人講：「起來，夯你的床，轉去恁兜！」

⁷ 彼個人就起來，轉去𪜶兜。

⁸ 眾人看著真著驚，歸榮光互上帝，因為伊有將此款權柄賜互人。

耶穌呼召馬太

⁹ 耶穌離開遐向頭前行的時看著一個人，名叫做馬太，坐佇稅關。耶穌給伊講：「來隨我！」伊就起來隨伊。

¹⁰ 耶穌佇馬太的厝食飯的時，有真多貿稅的及罪人嘛來及耶穌以及伊的門徒做夥食。

¹¹ 法利賽派的人看著就對伊的門徒講：「是按怎恁老師及貿稅的以及罪人做夥食飯？」

¹² 耶穌聽著就講：「健康的無需要醫生，破病的才有需要。

¹³ 恁去學習此句聖經的話：『我愛憐憫，無愛祭物。』因為我來，毋是欲招義人，是欲招罪人。」

禁食的問題

¹⁴ 有一遍，約翰的門徒來見耶穌，對伊講：「阮及法利賽派的人常常禁食，是按怎你的門徒無禁食？」

¹⁵ 耶穌應講：「新郎猶及婚宴的人客做夥的時，人客豈會哀傷？日子啲欲到，新郎會互人對𪜶中間掠去，彼時𪜶就會禁食。

¹⁶ 「無人用無勼水的布去補舊衫，因為補的彼塊會給衫糾裂，顛倒破閣較大孔。

¹⁷ 嘛無人將新酒入佇舊皮袋。若按呢做，皮袋會爆破，酒流出來，皮袋嘛歹去。新酒應該入佇新皮袋，按呢兩項就攏保全。」

會堂主管的查某子及致著血漏病的婦仁人

¹⁸ 耶穌對𪜶講諸個話的時，有一個會堂的主管來跪佇伊的面前，講：「我的查某子抵仔死去，請你來給伊按手，伊就會活起來。」

¹⁹ 耶穌就起來，隨伊去；伊的門徒嘛去。

²⁰ 抵彼時，有一個致著血漏病十二年久的婦仁人行倚去耶穌的後面，摸伊衫仔裾的鬚。

²¹ 因為伊心內想：「我干焦摸著伊的衫，病就會好。」

²² 耶穌越過來看伊，給伊講：「查某子，安心；你的信心互你好去啦！」婦仁人隨時得著醫好。

²³ 耶穌來到會堂主管的厝，看著歕𥰔仔的及歸大陣人浪浪滾，

²⁴ 就給𪜶講：「恁攏出去，此個查某囝仔毋是死去，是啲睏。」𪜶就給伊恥笑。

²⁵ 趕群眾出去了後，耶穌入去查某囝仔的房間，牽伊的手，查某囝仔就起來。

²⁶ 對按呢，此個消息傳到彼地區的逐所在。

耶穌醫好兩個盲人

²⁷ 耶穌離開遐的時，有兩個盲人隨伊去；𪜶大聲喝：「大闢的子，憐憫阮！」

²⁸ 耶穌入去厝內，盲人就行倚去。耶穌問𪜶：「恁信我會當給恁做此個代誌是無？」𪜶應講：「主啊，你會。」

²⁹ 然後，耶穌摸𪜶的目睭，講：「照恁的信心互恁實現。」

³⁰ 𪜶的目睭就開，會看見。耶穌嚴嚴吩咐𪜶講：「千萬毋通互人知此個代誌。」

³¹ 毋拘𪜶一下出去，煞將耶穌的代誌傳遍彼地區的逐所在。

耶穌醫好一個𣍐講話的人

³² 𪜶出去的時，有人導一個互鬼附身𣍐講話的人來耶穌遐。

³³ 鬼一下互耶穌趕出去，彼個𣍐講話的人就講話。群眾攏著驚，講：「佇以色列阮毋曾看著此款代誌。」

³⁴ 不過法利賽派的人講：「伊是靠鬼王啲趕鬼。」

耶穌可憐群眾

³⁵ 耶穌行透周圍所有的城市及庄社，佇𪜶的會堂教示人，傳天國的福音，醫好逐款的症頭及病疼。

³⁶ 伊看著赫大陣的人，就可憐𪜶，因為𪜶親像羊無牧者，困苦，無人照顧。

³⁷ 耶穌就對伊的門徒講：「通收成的真多，作工的人真少。

³⁸ 所以，恁著祈求管收成的主派工人去收成。」