馬太福音 8 - 現代台語譯本漢字版

耶穌醫好痲瘋病人

¹ 耶穌對山頂落來的時，有歸大陣的人隨伊。

² 抵彼時，有一個痲瘋病人行倚來，跪落去伊的面前，講：「主啊，你若肯，會當互我清氣。」

³ 耶穌伸手給伊摸，講：「我肯，互你清氣！」伊的痲瘋病隨時清氣。

⁴ 耶穌給伊講：「著注意，攏毋通給人講。不過著去互祭司驗，閣照摩西的規定獻禮物，通對眾人證明。」

耶穌醫好羅馬軍官的僕人

⁵ 耶穌入去迦百農的時，有一個羅馬軍官行倚來給伊懇求，

⁶ 講：「主啊，我的僕人半身不遂倒佇厝內，非常艱苦。」

⁷ 耶穌給伊講：「我來去給伊醫治。」

⁸ 軍官應講：「主啊，你來阮兜，我𣍐堪得。你干焦講一句話，我的僕人就會好。

⁹ 因為我是互人管的人，嘛有兵互我管。我給此個講『去』，伊就去；給別個講『來』，伊就來；給我的僕人講『你做此個』，伊就去做。」

¹⁰ 耶穌聽了感覺真意外，就對許個隨伊的人講：「我實在給恁講，連佇以色列人的中間，我都猶毋曾看著此款的信心。

¹¹ 我給恁講，有真多人會對東對西來及亞伯拉罕、以撒、雅各佇天國坐桌。

¹² 不過許個本來是天國的子兒的，反轉會受趕出去外面烏暗的所在，佇遐啼哭，咬牙切齒。」

¹³ 然後耶穌對彼個軍官講：「你去，互你所信的實現！」 抵抵彼時，僕人的病就好去。

耶穌醫好真多病人

¹⁴ 耶穌入去彼得𪜶兜，看著伊的丈姆發熱，倒佇眠床。

¹⁵ 耶穌摸伊的手，熱退去，伊就起來侍候伊。

¹⁶ 黃昏的時，有一寡人導真多互邪神附身的人來耶穌遐。伊用一句話就給邪神攏趕出去，閣醫好所有的病人。

¹⁷ 這是欲應驗通過先知以賽亞所講的話： 伊承受咱的軟弱， 擔當咱的病疼。

欲隨耶穌的人

¹⁸ 耶穌看著一大陣人圍佇伊周圍，就吩咐門徒過去湖的彼旁岸。

¹⁹ 有一個經學教師行倚來給伊講：「老師，你無論去叨位，我攏欲隨你。」

²⁰ 耶穌應講：「狐狸有孔，空中的鳥有巢，不過人子連靠頭殼的所在都無。」

²¹ 另外一個門徒給耶穌講：「主啊，聽候阮序大人百歲年老，我就來隨你。」

²² 耶穌應講：「來隨我，互死人去埋葬𪜶家己的死人！」

耶穌平靜風湧

²³ 耶穌上船，伊的門徒隨伊去。

²⁴ 忽然，湖起大風湧，船煞互湧蓋甲欲沉落去，毋拘耶穌啲睏。

²⁵ 門徒去給伊叫醒，講：「主啊，救咧噢，咱啲欲無命囉！」

²⁶ 耶穌對𪜶講：「小信的人，恁哪即無膽？」伊就起來，責備風及湧，湖就靜靜靜。

²⁷ 許個人著驚講：「此個是什麼款人，連風及湧都順服！」

兩個互鬼附身的人

²⁸ 耶穌過去湖的彼旁岸，到加大拉人的地區，有兩個互鬼附身的人對墓仔埔出來，抵著伊。𪜶雄介介，所以無人敢對彼條路經過。

²⁹ 𪜶忽然大聲喝：「上帝的子，你插阮！時猶未到，你就來欲給阮苦楚是無？」

³⁰ 彼時，離𪜶有赫遠啊的所在，有一大群豬啲討食。

³¹ 鬼求耶穌講：「你若欲給阮趕出去，著差阮進入彼群豬。」

³² 耶穌給𪜶講：「恁去！」鬼就出去，進入豬群；忽然歸群豬攏對山坪闖落去湖裡，死佇水內。

³³ 飼豬的人就逃走，走入去城內，將一切所發生以及互鬼附身的人所抵著的代誌攏報人知。

³⁴ 全城的人攏出來欲看耶穌；𪜶一下看著伊，就懇求伊離開𪜶的地區。