馬太福音 7 - 現代台語譯本漢字版

批判人

¹ 「毋通批判人，才免受上帝審判。

² 因為恁用什麼標準批判人，上帝嘛會照按呢給恁審判；恁用什麼量量互人，上帝嘛會照按呢量互恁。

³ 你哪干焦啲看兄弟目睭內的柴幼仔，亦無注意著家己目睭內有柴箍？

⁴ 你家己目睭內有柴箍，哪會當給你的兄弟講『你目睭內有柴幼仔，我給你提出來』？

⁵ 假好的人，家己目睭內的柴箍著先提出來，才會當看清楚通給兄弟目睭內的柴幼仔提出來。

⁶ 「毋通提神聖的物互狗，𪜶會越過來咬恁；嘛毋通將恁的真珠㧒佇豬的面前，𪜶會用腳踐踏。」

求，尋，拍門

⁷ 「求，會得著；尋，會尋著；拍門，會給恁開。

⁸ 因為求的，就得著；尋的，就尋著；拍門的，就給伊開。

⁹ 恁中間豈有人，𪜶子給伊討麵包，會提石頭互伊？

¹⁰ 給伊討魚，會掠蛇互伊？

¹¹ 恁雖然歹，猶會曉提好物互恁的子兒，何況恁的天父，伊一定會提好物互對伊祈求的人！

¹² 「所以，恁愛人按怎對待恁，嘛著按呢對待𪜶。這就是律法及先知的教示。」

狹的門

¹³ 「恁著對彼個狹的門入去；因為迵到滅亡彼個門闊，彼條路好行，入去的人真多。

¹⁴ 迵到活命彼個門狹，彼條路細，尋著的人真少。」

樹及果子

¹⁵ 「著防備假先知。𪜶來恁遮，外表親像綿羊，內面卻是兇惡的豺狼。

¹⁶ 恁會當對𪜶的果子來識𪜶。豈會當對莿挽葡萄？抑是對蒺藜挽無花果？

¹⁷ 按呢，好樹結好果子；歹樹結歹果子。

¹⁸ 好樹𣍐結歹果子；歹樹嘛𣍐結好果子。

¹⁹ 𣍐結好果子的樹攏著剉起來，㧒落火。

²⁰ 按呢，恁會當對𪜶的果子來識𪜶。」

我毋識恁

²¹ 「稱呼我『主啊，主啊』的人，𣍐攏入天國；只有實行我的天父的旨意的人才會。

²² 佇彼日，有真多人會對我講：『主啊，主啊，阮豈毋是曾奉你的名傳信息，曾奉你的名趕鬼，曾奉你的名行真多神跡？』

²³ 彼時我會明明對𪜶講：『我攏毋識恁。恁諸個做歹的人，攏離開我！』」

兩款地基

²⁴ 「所以，聽我諸個話閣實行的人攏親像聰明的人給厝起佇石磐頂，

²⁵ 雨潑，大水來，風掃，沖著厝，厝嘛𣍐倒，因為起佇石磐頂。

²⁶ 「聽我諸個話無實行的人親像戇人給厝起佇沙頂，

²⁷ 雨潑，大水來，風掃，沖著厝，厝就倒，閣倒甲真厲害。」

耶穌的權威

²⁸ 耶穌諸個話講煞，群眾對伊的教示感覺非常希奇，

²⁹ 因為伊的教示真有權威，及𪜶的經學教師無仝款。