馬太福音 6 - 現代台語譯本漢字版

賑濟

¹ 「著謹慎，毋通為著欲互人看才故意佇人的面前展恁的敬虔；按呢做𣍐當對恁的天父得著報賞。

² 「所以，你賑濟的時，毋通先歕喇叭報人知，親像假好的人佇會堂及街路按呢做，愛互人謳咾。我實在給恁講，𪜶已經得著𪜶的報賞啦。

³ 你賑濟的時，毋通互你的倒手知正手的所做，

⁴ 互你通恬恬仔賑濟，恬恬仔啲看的你的父會給你報賞。」

祈禱

⁵ 「恁祈禱的時，毋通親像假好的人，因為𪜶愛互人看，故意徛佇會堂抑是路口祈禱。我實在給恁講，𪜶已經得著報賞啦。

⁶ 你祈禱的時，著入去房間內，關門，對你恬恬仔啲看的父求，按呢恬恬仔啲看的你的父會給你報賞。

⁷ 「恁祈禱的時，毋通親像外邦人講了閣講，因為𪜶想，講較多話上帝才會聽見。

⁸ 恁毋通及𪜶像款；因為猶未求以前，恁的父已經知恁的需要。

⁹ 所以，恁著按呢祈禱： 阮的天父： 願你的聖名受尊崇。

¹⁰ 願你施行主權； 願你的旨意實現， 佇地上親像佇天頂。

¹¹ 求你今仔日賜阮需要的食物。

¹² 求你赦免阮的辜負， 親像阮嘛有赦免辜負阮的人。

¹³ 求你毋通互阮陷落擔當𣍐起的試探， 救阮脫離彼個邪惡者。

¹⁴ 「恁若赦免人的過失，恁的天父嘛會赦免恁；

¹⁵ 恁若無赦免人，恁的天父嘛𣍐赦免恁的過失。」

禁食

¹⁶ 「恁禁食的時，毋通親像假好的人憂頭結面；因為𪜶故意互面歹看，愛互人看出𪜶啲禁食。我實在給恁講，𪜶已經得著報賞啦。

¹⁷ 你禁食的時，頭毛著抹油，面著洗，

¹⁸ 互人看𣍐出你啲禁食，只有互恬恬仔啲看的父看見，按呢恬恬仔啲看的你的父會給你報賞。」

天頂的財寶

¹⁹ 「毋通為著家己積聚財寶佇地上，佇遮有蟲咬，會生銹，賊會挖孔偷提。

²⁰ 著為著家己積聚財寶佇天頂，佇遐無蟲咬，𣍐生銹，無賊挖孔偷提。

²¹ 因為你的財寶佇叨位，你的心嘛會佇遐。」

身軀的光

²² 「目睭是身軀的燈。你的目睭若金，歸身軀就光明；

²³ 你的目睭若花，歸身軀就烏暗。按呢，你內面的光若變做暗，此個烏暗是偌仔呢嚴重！」

上帝抑是財富

²⁴ 「無人會當服事兩個主人；伊若毋是怨恨此個，疼彼個，就是看重此個，看輕彼個。恁𣍐當像時服事上帝閣服事錢財。

²⁵ 「所以，我給恁講，毋通為著恁的性命欲食什麼，欲飲什麼啲操煩；嘛毋通為著恁的身軀欲穿什麼啲操煩。性命豈毋是比食物較重要？身軀豈毋是比衣服較重要？

²⁶ 恁看空中的飛鳥，𪜶無種作，無收成，嘛無囤積糧食佇倉庫，恁的天父嘛啲給𪜶養飼。恁豈無比𪜶較貴重？

²⁷ 恁豈有人想講操煩會當互家己的性命加活一時仔久？

²⁸ 「恁哪著因為欲穿什麼操煩？恁想看山野的花按怎啲大欉；𪜶無勞苦，嘛無紡織。

²⁹ 不過我給恁講，連所羅門上榮華的時，伊穿的衫都無比諸個花的一蕊閣較媠。

³⁰ 山野的花草今仔日啲活，明仔載互人㧒落火爐，上帝都按呢給𪜶妝飾，伊豈𣍐閣較給恁妝飾？恁哪即呢無信心！

³¹ 「所以，恁毋免操煩講『阮欲食什麼』抑是『阮欲飲什麼，欲穿什麼』。

³² 諸個攏是外邦人啲追求的。恁的天父知諸個攏是恁所需要的。

³³ 著先追求伊的主權及伊的旨意實現，諸個物件就會攏續互恁。

³⁴ 所以，毋通為著明仔載操煩；明仔載的代誌明仔載才操煩。一日的艱苦一日當。」