馬太福音 4 - 現代台語譯本漢字版

耶穌受試探

¹ 後來，耶穌互聖神導去曠野，佇遐受魔鬼試探。

² 耶穌禁食四十暝日，後來就枵。

³ 試探者倚來對伊講：「既然你是上帝的子，命令諸個石頭變做餅！」

⁴ 耶穌應講：「聖經有記載： 人啲活毋若倚靠餅， 是倚靠對上帝的嘴所出的逐句話。」

⁵ 然後，魔鬼導耶穌入去聖殿，互伊徛佇聖殿厝頂上高的所在，

⁶ 對伊講：「既然你是上帝的子，跳落去！因為聖經有記載： 上帝會為著你命令伊的天使， 𪜶會用手扶你， 互你的腳𣍐磕著石頭。」

⁷ 耶穌應講：「聖經閣有記載： 毋通試探主 — 你的上帝。」

⁸ 魔鬼閣導耶穌上一個真高的山，將世上萬國及𪜶的榮華互伊看，

⁹ 對伊講：「你若仆落來拜我，諸個一切我攏互你。」

¹⁰ 耶穌應講：「撒旦，走！聖經有記載： 著拜主 — 你的上帝， 只有服事伊。」

¹¹ 然後魔鬼離開耶穌；有天使來給伊侍候。

耶穌佇加利利開始傳道

¹² 耶穌聽著約翰互人掠去就退去加利利。

¹³ 伊離開拿撒勒去住佇西布倫及拿弗他利地區，加利利湖邊的迦百農。

¹⁴ 這是欲應驗通過先知以賽亞所講的話：

¹⁵ 西布倫的地，拿弗他利的地， 沿海的路，約旦河東岸， 外邦人的加利利，

¹⁶ 𫢶佇烏暗中的人有看見大光； 𫢶佇死蔭的地的有光照𪜶。

¹⁷ 對彼時，耶穌開始宣揚講：「著悔改，因為天國啲欲實現啦！」

耶穌呼召四個掠魚的

¹⁸ 耶穌佇加利利湖邊啲行的時，看著兩個兄弟，叫做彼得的西門及伊的小弟安得烈，佇湖裡啲拋網，因為𪜶是掠魚的。

¹⁹ 伊對𪜶講：「來隨我，我欲互恁得著人親像掠魚的得著魚。」

²⁰ 𪜶隨時給網放咧，去隨耶穌。

²¹ 耶穌行進前，看著另外兩個兄弟，西庇太的子雅各及伊的小弟約翰。𪜶及老父西庇太佇船頂啲整理網，伊就呼召𪜶。

²² 𪜶隨時將船及老父放咧，去隨耶穌。

耶穌佇加利利傳道

²³ 耶穌到加利利逐所在，佇𪜶的會堂教示人，傳天國的福音，醫好民間逐款的病症。

²⁴ 伊的名聲傳到敘利亞的逐所在。人將所有的病人，就是邪神附身、羊眩，及半身不遂等，患著逐款症頭及病疼的人攏導來伊遐，伊就給𪜶醫好。

²⁵ 有一大陣人對加利利、低加坡里、耶路撒冷、猶太，及約旦河東岸來隨伊。