馬太福音 28 - 現代台語譯本漢字版

耶穌的閣活

¹ 安歇日過了，禮拜日天欲光的時，末大拉的馬利亞及別個馬利亞去探墓。

² 忽然，有大地動，因為主的一個天使對天降臨，將彼塊石頭翱開，坐佇彼頂面。

³ 伊的面貌親像熠爁，伊的衫親像雪赫呢白。

⁴ 許個顧守的衛兵驚甲皮皮惙，煞變做親像死人。

⁵ 彼個天使給許個婦仁人講：「毋免驚；我知恁啲尋互人釘十字架的耶穌。

⁶ 伊無佇遮，照伊所講，伊已經閣活。來，來看伊倒的所在。

⁷ 恁趕緊去給伊的門徒講：『伊已經對死人中閣活啦。伊比恁先去加利利，佇遐恁會見著伊。』著會記得我已經有給恁講啦。」

⁸ 𪜶就趕緊離開墓，也驚也大歡喜，走去給耶穌的門徒講。

⁹ 忽然，耶穌出現，對𪜶講：「大家平安！」𪜶行進前攬伊的腳，給伊拜。

¹⁰ 耶穌給𪜶講：「毋免驚！去給我的兄弟講，叫𪜶去加利利，佇遐𪜶會見著我。」

衛兵的報告

¹¹ 許個婦仁人離開的時，有一寡顧守墓的衛兵入去城內，將所發生的代誌攏給祭司長報告。

¹² 祭司長及長老聚集參詳了後，提真多銀仔互許個兵，

¹³ 講：「恁著按呢講：『伊的門徒暗時來，佇阮啲睏的時將伊的身屍偷提去。』

¹⁴ 萬一總督聽著此個代誌，阮會去給伊安搭，包恁無代誌。」

¹⁵ 衛兵就提許個銀仔照𪜶所吩咐的去做。此個代誌到今仔日猶佇猶太人的中間啲流傳。

差遣門徒

¹⁶ 十一個門徒去加利利，到耶穌指定𪜶去彼座山頂。

¹⁷ 𪜶見著耶穌就給伊拜，不過有人猶啲憢疑。

¹⁸ 耶穌行倚去給𪜶講：「上帝已經將天頂地下一切的權柄攏互我。

¹⁹ 所以，恁著去招萬民來做門徒，給𪜶洗禮，互𪜶歸佇父、子、聖神的名，

²⁰ 教示𪜶遵守我所互恁一切的命令。著會記得，我逐日及恁同在，直到今世的結束。」