馬太福音 26 - 現代台語譯本漢字版

害死耶穌的陰謀

¹ 耶穌講諸個話了後給伊的門徒講：

² 「恁知閣兩日就是𨃟過節，人子會受出賣互人釘十字架。」

³ 彼時，祭司長及民間的長老聚集佇大祭司該亞法的公館。

⁴ 𪜶參詳欲用計謀掠耶穌，給伊害死。

⁵ 毋拘𪜶講：「毋通佇節期中，驚了民眾起暴動。」

耶穌佇伯大尼受抹油

^6-7 耶穌佇伯大尼痲瘋病人西門的厝啲坐桌食飯的時，有一個婦仁人提一罐玉瓶，內面貯非常高貴的芳油，行倚來，將芳油倒佇耶穌的頭殼頂。

⁸ 門徒看著真受氣，講：「哪著即浪費？

⁹ 此罐芳油會當賣真多錢來救濟散赤人。」

¹⁰ 耶穌知影，就對𪜶講：「恁哪欲刁難此個婦仁人？伊有為著我做一項好事。

¹¹ 不時有散赤人及恁做夥，不過我𣍐不時及恁做夥。

¹² 伊倒芳油佇我的身軀是給我準備埋葬。

¹³ 我實在給恁講，此個福音無論傳到全世界什麼所在，人攏會講起此個婦仁人所做的代誌來記念伊。」

猶大出賣耶穌

¹⁴ 十二使徒的一個，叫做以斯加略的猶大，去見許個祭司長，

¹⁵ 講：「我若將耶穌交互恁，恁欲互我什麼？」𪜶就提三十個銀仔互伊。

¹⁶ 對彼時起，猶大一直啲尋機會欲出賣耶穌。

準備𨃟過節的晚餐

¹⁷ 除酵節的頭一日，門徒來問耶穌：「你愛阮佇叨位給你準備食𨃟過節的晚餐？」

¹⁸ 耶穌講：「恁入城去尋彼個某人，給伊講：『老師講：我的時已經到，我欲及我的門徒佇你的厝守𨃟過節。』」

¹⁹ 門徒就照耶穌的吩咐去準備𨃟過節的晚餐。

²⁰ 黃昏的時，耶穌及十二使徒坐桌。

²¹ 𪜶啲食飯的時，耶穌講：「我實在給恁講，恁中間有一個人欲給我出賣。」

²² 𪜶真傷心，一個一個給伊問：「主啊，毋是我乎？」

²³ 耶穌應講：「伸手及我像時提食物佇盤裡啲搵彼個人欲給我出賣。

²⁴ 照聖經所記載，人子會受害，不過出賣人子彼個人慘啊！彼個人寧可無出世較好。」

²⁵ 出賣耶穌的猶大嘛給伊問：「拉比，毋是我乎？」 耶穌應講：「這是你講的。」

主的晚餐

²⁶ 𪜶啲食的時，耶穌提餅，感謝了後擘開，分互門徒，講：「提去食；這是我的身軀。」

²⁷ 然後伊捧杯，感謝了後提互門徒，講：「恁攏著飲此杯，

²⁸ 因為這是我的血，是立約的血，為著真多人流出的，欲互𪜶的罪得著赦免。

²⁹ 我給恁講，佇我的父的國及恁飲新的葡萄酒彼日以前，我絕對𣍐閣飲此個酒。」

³⁰ 𪜶吟詩了後就出去，去橄欖山。

耶穌預言彼得毋認伊

³¹ 耶穌給𪜶講：「今暝恁攏會放拺我，因為聖經有記載： 我欲拍牧者， 歸群羊就四散。

³² 毋拘我閣活以後會比恁先去加利利。」

³³ 彼得對耶穌講：「雖然𪜶大家攏放拺你，我絕對𣍐放拺你！」

³⁴ 耶穌給伊講：「我實在給你講，今暝雞啼以前，你會三遍毋認我。」

³⁵ 彼得應講：「若一定著及你做夥死，我嘛絕對𣍐毋認你！」 其他的門徒嘛攏按呢講。

佇客西馬尼祈禱

³⁶ 後來，耶穌及門徒來到一個所在叫做客西馬尼。伊給門徒講：「我去遐祈禱，恁𫢶遮坐。」

³⁷ 伊就導彼得及西庇太的兩個子做夥去。伊悲傷，非常痛苦，

³⁸ 對𪜶講：「我心憂傷到欲死。恁𫢶遮，及我做夥警醒。」

³⁹ 伊行較進前，面仆落去，祈禱講：「我的父啊，若會當，求你互我免飲此個杯，毋拘毋是照我的意思，著照你的旨意實現。」

⁴⁰ 伊轉來門徒遐，看著𪜶啲睏，就對彼得講：「恁真正𣍐當及我警醒一點鐘久是無？

⁴¹ 著警醒，著祈禱，才𣍐陷落誘惑。恁雖然心真意愛，毋拘肉體軟弱。」

⁴² 耶穌第二遍閣去祈禱，講：「我的父啊，此個杯若𣍐當免，我一定著飲，願你的旨意實現。」

⁴³ 伊閣轉來，看著𪜶因為目睭澀猶啲睏。

⁴⁴ 耶穌閣離開𪜶，第三遍去祈禱，嘛是講像款的話。

⁴⁵ 然後伊閣轉來門徒遐，對𪜶講：「恁猶啲睏，猶啲歇睏噢？恁看，時間接近啦；人子受出賣交佇罪人的手頭啦。

⁴⁶ 起來，咱來去。恁看，出賣我的人來啦。」

耶穌受掠

⁴⁷ 耶穌猶啲講的時，十二使徒的一個 — 猶大來，祭司長及民間的長老派來的一大陣人攑刀攑棍及伊鬥陣來。

⁴⁸ 出賣耶穌彼個人有互𪜶一個暗號，講：「我給伊唚彼個就是；恁給掠。」

⁴⁹ 猶大隨時行倚耶穌，對伊講：「拉比，平安！」就給伊唚。

⁵⁰ 耶穌給伊講：「朋友，你哪佇遮？」 許個人就倚去，下手掠耶穌。

⁵¹ 忽然，有一個及耶穌鬥陣的人伸手拔刀對大祭司的僕人刜落去，給伊一旁的耳仔削起來。

⁵² 耶穌給伊講：「刀收起來，因為攑刀的攏會死佇刀下。

⁵³ 你想講我𣍐當懇求我的父隨時差十二營較加的天使來是無？

⁵⁴ 我若按呢做，聖經所記載一定著發生的代誌哪會應驗？」

⁵⁵ 彼時耶穌對群眾講：「恁攑刀攑棍出來掠我，是欲掠強盜是無？我逐日佇聖殿坐啲教示人，恁無給我掠。

⁵⁶ 不過這一切的代誌攏已經實現，是欲應驗先知佇聖經所講的話。」 然後，所有的門徒攏放拺耶穌逃走。

耶穌佇議會受審

⁵⁷ 許個掠耶穌的人給伊導去大祭司該亞法遐；經學教師及長老攏已經聚集佇遐。

⁵⁸ 彼得離遠遠啲隨耶穌，隨到大祭司公館的埕。伊入去內面及警衛做夥坐，欲看代誌的結局。

⁵⁹ 祭司長及全議會一直啲尋假證據欲告耶穌，通給伊處死。

⁶⁰ 雖然有真多人出來給伊誣告，毋拘𪜶攏尋無證據。後來有兩個人出來，

⁶¹ 講：「此個人曾講『我有法度毀壞上帝的聖殿，三日內閣給伊起起來』。」

⁶² 大祭司徛起來對耶穌講：「諸個人啲給你告什麼，你哪攏無答辯？」

⁶³ 毋拘耶穌攏恬恬。大祭司閣一遍對伊講：「我指永遠活的上帝命令你給阮講，你是基督，上帝的子抑毋是。」

⁶⁴ 耶穌應講：「你已經講啦。毋拘我給恁講，對今以後恁會看見人子坐佇全能者的正旁，坐天頂的雲來臨。」

⁶⁵ 大祭司就拆裂家己的外衫，講：「伊已經褻瀆上帝。咱猶需要什麼證人？今恁已經有聽著伊褻瀆上帝。

⁶⁶ 恁想按怎？」 𪜶應講：「伊該死！」

⁶⁷ 後來𪜶呸涎佇耶穌的面，給伊掙，閣有人給伊搧，

⁶⁸ 講：「基督啊，你是先知，給阮講看覓，啥人給你拍？」

彼得毋認耶穌

⁶⁹ 彼得佇公館外面的埕啲坐，有一個女婢行倚去，講：「你嘛攏有啲及彼個加利利人耶穌做夥。」

⁷⁰ 彼得佇眾人的面前毋認，講：「我毋知你啲講什麼。」

⁷¹ 彼得行出去到大門口的時，有另外一個女婢看著伊，就給佇遐的人講：「此個人有啲及拿撒勒人耶穌做夥。」

⁷² 彼得閣一遍咒誓毋認，講：「我毋識彼個人。」

⁷³ 過無偌久，徛佇邊仔的人倚來，對彼得講：「你確實嘛是𪜶彼陣的人，聽你的腔就知。」

⁷⁴ 伊就咒誓講：「我毋識彼個人。我若講白賊，願天責罰我！」 雞隨時啼。

⁷⁵ 彼得想著耶穌所講的話「雞啼以前，你會三遍毋認我」，就出去外面大聲啼哭。