馬太福音 25 - 現代台語譯本漢字版

十個在室女的譬喻

¹ 「天國通譬喻做十個在室女攑燈出去迎接新郎。

² 其中有五個戇的，五個巧的。

³ 許個戇的攑燈，無另外帶油，

⁴ 毋拘巧的攑燈，有另外帶幾若罐油。

⁵ 新郎較晏到，𪜶煞攏盹佝睏去。

⁶ 「半暝，有人大聲喝：『新郎來啦，出來迎接！』

⁷ 彼時，許個在室女攏醒起來，修整𪜶的燈。

⁸ 戇的給巧的講：『阮的燈啲欲化去啦，恁的油分一寡互阮。』

⁹ 巧的應講：『驚了油無夠分恁用，上好恁家己去給賣油的買。』

¹⁰ 𪜶去買的時新郎到位，許個準備好勢的及伊入去赴婚宴，門就關起來。

¹¹ 「後來許個戇的在室女嘛來，講：『先生，先生，請給阮開門！』

¹² 新郎應講：『我實在給恁講，我毋識恁！』

¹³ 「所以，著警醒，因為彼個日彼個時恁毋知。」

三個僕人的譬喻

¹⁴ 「天國親像有一個人欲出外旅行，叫家己的僕人來，將財產交代𪜶。

¹⁵ 伊照逐人的才調交金幣互𪜶，一個五千，一個兩千，一個一千，就出外去。

¹⁶ 彼個領五千的隨時提去做生理，閣賺五千。

¹⁷ 像款，彼個領兩千的嘛閣賺兩千。

¹⁸ 毋拘彼個領一千的出去，佇土腳挖一孔，給主人的金幣藏起來。

¹⁹ 「過真久，許個僕人的主人轉來，及𪜶算賬。

²⁰ 彼個領五千的行進前，另外提五千來，講：『頭家，你交代我五千個金幣，請看，我有閣賺五千。』

²¹ 主人給伊講：『真好，好閣忠實的僕人，你既然佇少的有忠實，我欲派你管較多的；入來及主人做夥歡喜。』

²² 「領兩千的嘛來，講：『頭家，你交代我兩千個金幣，請你看，我有閣賺兩千。』

²³ 主人給伊講：『真好，好閣忠實的僕人，你既然佇少的有忠實，我欲派你管較多的；入來及主人做夥歡喜。』

²⁴ 「此時，彼個領一千的嘛行進前，講：『頭家，我知你是嚴轄的人，無撒種嘛欲收割，無種作嘛欲收成。

²⁵ 我真驚，才將你的金幣提去藏佇土腳底。今你的金幣還你。』

²⁶ 「主人應講：『歹閣貧憚的僕人，你既然知我無撒種嘛欲收割，無種作嘛欲收成，

²⁷ 你應該將我的金幣寄銀行，我轉來的時通連本帶利收回。』

²⁸ 給伊的金幣提來，交互有一萬金幣彼個人。

²⁹ 因為有的，欲互伊閣較多，甚至有賰；無的，連伊所有的嘛欲給伊搶起來。

³⁰ 此個無路用的僕人，給伊趕出去外面烏暗的所在；佇遐伊會啼哭，咬牙切齒。」

最後的審判

³¹ 「人子作王導眾天使來臨的時，伊會坐佇榮耀的寶座。

³² 地上萬民攏會聚集佇伊的面前。伊會將𪜶分做兩旁，親像牧者將綿羊及山羊分開；

³³ 給綿羊安排佇正旁，山羊佇倒旁。

³⁴ 後來，王會給正旁的人講：『來，恁諸個受我的父祝福的，來承受對創造宇宙以來就為著恁準備的國度。

³⁵ 因為我枵，恁有互我食；我嘴焦，恁有互我飲；我作出外人，恁有給我收留；

³⁶ 我赤身露體，恁有互我穿；我破病，恁有給我照顧；我佇監裡，恁有來探我。』

³⁷ 「彼時，義人會應伊講：『主啊，什麼時阮看著你枵有互你食，嘴焦有互你飲？

³⁸ 什麼時阮看著你作出外人有給你收留，赤身露體有互你穿？

³⁹ 什麼時阮看著你破病抑是佇監裡，阮有去探你？』

⁴⁰ 王會應講：『我實在給恁講，恁有按呢對待我兄弟姊妹上微細的一個，就是好款待我。』

⁴¹ 「後來，王會給倒旁的人講：『恁諸個受咒詛的人，離開我，入去為著魔鬼及伊的使者所準備永遠的火裡。

⁴² 因為我枵，恁無互我食；我嘴焦，恁無互我飲；

⁴³ 我作出外人，恁無給我收留；我赤身露體，恁無互我穿；我破病抑是佇監裡，恁無來探我。』

⁴⁴ 「彼時，𪜶嘛會應講：『主啊，什麼時阮看著你枵，嘴焦，作出外人，赤身露體，破病，抑是佇監裡，無給你照顧？』

⁴⁵ 王會給𪜶講：『我實在給恁講，恁無按呢對待上微細的一個，就是無好款待我。』

⁴⁶ 諸個人會受永遠的刑罰，總是義人會得著永遠的活命。」