馬太福音 24 - 現代台語譯本漢字版

耶穌預言聖殿受毀壞

¹ 耶穌對聖殿出來，抵欲離開的時，門徒倚來，報伊看聖殿的建築物。

² 耶穌給𪜶講：「諸個恁豈毋是攏有看著？我實在給恁講，佇遮一切攏會受拆毀，拆甲無兩塊石相疊。」

災難及迫害

³ 耶穌佇橄欖山頂啲坐的時，門徒私下來問伊：「請給阮講，此個代誌什麼時會發生？你的來臨及今世的結局有什麼兆頭？」

⁴ 耶穌應講：「著謹慎，才免受迷惑。

⁵ 因為有真多人會利用我的名來，講『我就是基督』來迷惑真多人。

⁶ 恁會聽著戰爭以及戰爭的風聲。著謹慎，毋免驚。諸個代誌一定會發生，毋拘終局猶未到。

⁷ 因為民族會起來攻擊民族，國家攻擊國家；真多所在有飢荒及地動。

⁸ 這一切的代誌不過是催陣痛疼的開始。

⁹ 「彼時，恁會互人掠去，受苦楚，殺害；恁會因為我的名互萬民怨恨。

¹⁰ 彼時，真多人會失去信心，互相出賣，彼此怨恨。

¹¹ 有真多假先知會出現來迷惑真多人。

¹² 不法的代誌愈加添，真多人的疼心會漸漸冷淡。

¹³ 毋拘忍耐到最後的人會得著救。

¹⁴ 此個天國的福音會傳到普天下，對萬民做見證，最後終局才會到。」

大災難

¹⁵ 「所以，當恁看著上帝通過先知但以理所講彼個『可惡的毀滅者』徛佇神聖的所在 — 讀的人著明白此句話的意思 —

¹⁶ 彼時佇猶太的人著逃走去山內；

¹⁷ 佇厝頂的，毋通落來提厝內的物；

¹⁸ 佇園裡的，毋通轉去挔外衫。

¹⁹ 佇許個日子，有身孕的及互嬰仔食奶的婦仁人非常不幸！

²⁰ 著祈禱，恁才免佇冬天抑是安歇日逃難。

²¹ 因為佇許個日子啲欲有大災難，是創造宇宙以來毋曾有的，將來嘛𣍐閣有。

²² 上帝若無減少許個日子，無人會得著救；毋拘為著伊的選民，上帝會減少許個日子。

²³ 「彼時，若有人給恁講『恁看，基督佇遮』，抑是講『伊佇遐』，毋通相信。

²⁴ 因為有一寡假基督及假先知會出現，行大神跡及奇事來迷惑人，若會當，連選民都欲給𪜶迷惑。

²⁵ 我已經先給恁講啦。

²⁶ 「所以，若有人給恁講『恁看，基督佇曠野』，毋通出去；抑是講『恁看，伊佇房間內』，嘛毋通相信。

²⁷ 熠爁對東旁熠到西旁，人子的來臨嘛會親像按呢。

²⁸ 「屍體佇叨位，禿頭鷹攏會擒倚去遐。」

人子的來臨

²⁹ 「此個災難的日子一下過去， 日會變烏暗， 月𣍐發光， 星會對天頂落落來， 天頂的光體攏會搖泏。

³⁰ 彼時，人子的兆頭會佇天頂出現。地上萬族萬民攏會啼哭；𪜶會看見人子充滿權能及大榮光坐天頂的雲來臨。

³¹ 伊會差伊的天使歕響亮的喇叭，對天的此旁到天的彼旁，對四方聚集伊的選民。」

對無花果樹學習

³² 「著對無花果樹學習：枝茁芛發葉的時，恁就知熱天啲欲到啊。

³³ 親像按呢，恁看著這一切的代誌的時就知人子已經接近，到門口啦。

³⁴ 我實在給恁講，此世代猶未過去，這一切攏會發生。

³⁵ 天及地會消失，毋拘我的話絕對𣍐消失。」

彼個日，彼個時，無人知

³⁶ 「關係彼個日，彼個時，無人知；天頂的天使毋知，子嘛毋知，只有父知若定。

³⁷ 因為人子的來臨嘛會親像挪亞的時的情境。

³⁸ 大水來以前到挪亞進入大船彼日，人照常飲食嫁娶。

³⁹ 𪜶糊里糊塗攏毋知，大水忽然來，給𪜶攏沖走。人子的來臨嘛會按呢。

⁴⁰ 彼時，有兩個人佇園裡，一個受接去；一個放啲。

⁴¹ 兩個婦仁人佇挨磨間啲挨石磨，一個受接去；一個放啲。

⁴² 「著警醒，因為恁毋知恁的主什麼日會來臨。

⁴³ 恁著知，此家的主人若知暗時幾點賊仔會來，一定會警醒，𣍐互賊仔挖壁孔入來厝內。

⁴⁴ 所以，恁嘛著準備便便，因為人子會佇恁想𣍐到的時陣來臨。」

忠實及無忠實的僕人

⁴⁵ 「若是按呢，什麼人是忠實閣聰明的僕人？就是主人交代伊管家內其他的僕人，照時分食物互𪜶彼個人。

⁴⁶ 主人轉來的時看著有照按呢啲做彼個僕人實在有福氣！

⁴⁷ 我實在給恁講，主人會派此個僕人管理伊攏總的財產。

⁴⁸ 彼個歹的僕人若心內想講『我的主人𣍐赫緊轉來』，

⁴⁹ 就拍平平做僕人的，閣及酒醉的做夥亦飲亦食。

⁵⁰ 主人會佇伊無按算的日，毋知的時轉來。

⁵¹ 主人會嚴嚴給伊處罰，給伊及假好的人下做堆；佇遐𪜶會啼哭，咬牙切齒。」