馬太福音 21 - 現代台語譯本漢字版

耶穌光榮進入耶路撒冷

¹ 耶穌及門徒啲欲到耶路撒冷，來到橄欖山附近的伯法其。彼時伊差兩個門徒，

² 給𪜶講：「恁去對面的庄社，到遐隨時會看著一隻驢縛啲，閣有一隻驢仔子及伊佇遐；恁給𪜶解開，牽來我遮。

³ 若有人對恁講什麼，恁就講：『主欲用𪜶。』彼個人會隨時准恁牽來。」

⁴ 此個代誌發生是欲應驗上帝通過先知所講的話：

⁵ 著給錫安的婦仁人講： 看咧，恁的王欲來恁遮； 伊謙遜騎驢仔， 騎驢仔子。

⁶ 門徒就去，照耶穌的指示去做。

⁷ 𪜶牽驢仔及驢仔子來，將外衫袚佇𪜶頂面，耶穌就𬦰起去騎。

⁸ 大部分的群眾將𪜶家己的外衫鋪佇路裡，嘛有人剉樹椏鋪佇路裡給伊歡迎。

⁹ 前行後隨的群眾喝講： 大闢的子，和散那！ 奉主的名來彼位應該受稱讚！ 至高的上帝，和散那！

¹⁰ 耶穌一下進入耶路撒冷，全城攏喊起來，講：「此個是啥人？」

¹¹ 眾人講：「此個是對加利利的拿撒勒來的先知耶穌。」

耶穌潔淨聖殿

¹² 耶穌入去聖殿，將殿內所有啲買賣的人攏趕出去，閣捙倒換錢的人的桌及賣粉鳥的人的椅。

¹³ 伊對𪜶講：「聖經有記載： 我的厝欲叫做祈禱的殿， 恁煞給伊變做土匪仔窟。」

¹⁴ 有盲人及腳跛的人來聖殿尋耶穌，伊就給𪜶醫好。

¹⁵ 祭司長及經學教師看著耶穌所行的奇事，閣聽見細漢囝仔佇聖殿大聲喝「大闢的子，和散那」，就真受氣，

¹⁶ 給耶穌講：「你有聽著𪜶啲喝什麼無？」 耶穌應講：「有。恁豈無讀著聖經的話： 你互囝仔及嬰仔的嘴大聲唱出謳咾。」

¹⁷ 後來耶穌離開𪜶，出城去伯大尼，佇遐過暝。

耶穌咒詛無花果樹

¹⁸ 隔早起，欲倒去耶路撒冷的時，耶穌腹肚枵。

¹⁹ 伊看著路邊有一欉無花果樹，就行倚去，毋拘樹頂攏無看著半項，只有葉若定。伊對彼欉樹講：「你永遠𣍐閣結果子。」彼欉無花果樹隨時焦去。

²⁰ 門徒看著，真著驚，講：「此欉無花果樹哪會忽然間焦去？」

²¹ 耶穌應講：「我實在給恁講，恁若有信心，無憢疑，毋若會當做我對此欉無花果樹所做的代誌，甚至命令此座山講『起來，去填海』嘛一定會實現。

²² 祈禱的時，恁所求的一切，有信就會得著。」

質問耶穌的權柄

²³ 耶穌入去聖殿啲教示人的時，祭司長及民間的長老來伊遐，對伊講：「你靠什麼權柄做諸個代誌？什麼人互你此個權柄？」

²⁴ 耶穌應講：「我嘛欲問恁一句話，恁若給我應，我才給恁講我靠什麼權柄做諸個代誌。

²⁵ 約翰給人洗禮的權柄對叨位來，是對天抑是對人？」 𪜶互相議論講：「咱若講『對天』，伊會給咱講『按呢，恁是按怎無信約翰？』

²⁶ 咱若講『對人』，恐驚群眾反感，因為𪜶攏想講約翰是先知。」

²⁷ 𪜶就應耶穌：「阮毋知。」 耶穌給𪜶講：「按呢，我嘛毋給恁講我靠什麼權柄做諸個代誌。」

兩個子的譬喻

²⁸ 耶穌講：「恁想按怎？有一個人有兩個子；伊去給大子講：『子啊，你今仔日去葡萄園做工。』

²⁹ 大子應講『我毋去』，後來改變心意有去。

³⁰ 老父嘛去給第二子講像款的話。第二子應講『阿爸，我來去』，後來無去。

³¹ 此兩個子叨一個有照老父的意思去做？」 𪜶講：「大子。」 耶穌給𪜶講：「我實在給恁講，貿稅的及娼妓會比恁先進入上帝國。

³² 因為施洗者約翰來恁遮，指示恁行正路，恁無信伊，毋拘貿稅的及娼妓有信。甚至恁看著了後嘛無悔改來信伊。」

歹佃農的譬喻

³³ 耶穌給𪜶講：「恁閣聽一個譬喻。有一個園主開墾一坵葡萄園，四面圍籬笆，內面挖一個酒窟，起一個守望台，將此坵園租互佃農，後來出外去真遠的所在。

³⁴ 收成果子的時到，園主差僕人去佃農遐，欲對𪜶收果子。

³⁵ 佃農給諸個僕人掠起來，一個給伊拍，一個給伊刣死，一個用石頭給伊抌死。

³⁶ 園主閣差另外一寡僕人去，比頭一遍較多人。佃農嘛照按呢對待𪜶。

³⁷ 最後，園主差家己的子去𪜶遐，想講『𪜶會尊重我的子』。

³⁸ 毋拘佃農一下看著伊的子就參詳講：『此個是伊的繼承人。來，咱來給刣死，通得伊的財產！』

³⁹ 𪜶就給伊掠起來，㧒出去葡萄園的外面，給伊刣死。

⁴⁰ 「按呢，葡萄園的主人倒來的時會按怎處理許個佃農？」

⁴¹ 𪜶給耶穌講：「伊一定會將許個歹人徹底消滅，將葡萄園租互別個會照季節納果子租的佃農。」

⁴² 耶穌給𪜶講：「恁豈毋曾讀著聖經有記載： 起厝師傅所棄拺的石， 已經成做上重要的基石。 這是主的作為， 對咱來看實在真奇妙！

⁴³ 「所以，我給恁講，上帝會將上帝國對恁搶起來，交互會結果子的人。

⁴⁴ 彼個摔落去此塊石頭頂的人，會摔甲碎骨分屍；互彼塊石頭硩著的人，會硩甲碎糊糊。」

⁴⁵ 諸個祭司長及法利賽派的人聽著耶穌的譬喻，知影伊是啲講𪜶。

⁴⁶ 𪜶就尋孔縫欲給伊掠，毋拘驚群眾，因為𪜶看伊是先知。