馬太福音 20 - 現代台語譯本漢字版

葡萄園工人的譬喻

¹ 「天國親像一個園主透早出去倩工人來伊的葡萄園做工。

² 伊及工人約定一日一個銀，就差𪜶去葡萄園做工。

³ 早起時九點左右伊閣出去，看著有一寡人佇市場口啲徛，無代誌做，

⁴ 就對𪜶講：『恁嘛去葡萄園做工，我會互恁公道的工錢。』

⁵ 𪜶就去。中晝十二點及下晡三點左右伊閣出去，嘛按呢做。

⁶ 下晡五點，伊閣出去，看著有一寡人徛佇遐，就對𪜶講：『恁哪歸日徛佇遮，無代誌做？』

⁷ 𪜶給伊講：『因為無人倩阮。』主人給𪜶講：『恁嘛去葡萄園做工。』

⁸ 「黃昏的時，園主給伊的管家講：『你去叫工人來，發工錢互𪜶，對路尾來的先發，然後才發互代先來的。』

⁹ 許個下晡五點才來的，逐個人領著一個銀。

¹⁰ 代先來作工的人想講家己會領較多，毋拘逐個人嘛只有領一個銀。

¹¹ 𪜶領了，對主人埋怨，

¹² 講：『諸個最後來的人只有做一點鐘若定，阮互日頭曝歸日，勞苦工作，你竟然互𪜶及阮領平多！』

¹³ 主人應其中一個人講：『朋友，我對你毋是無公道。你豈毋是及我約定一日一個銀？

¹⁴ 提你的工錢，轉去！我欲互上尾來的及你領平多。

¹⁵ 我用家己的物做我愛做的豈𣍐用得？我慷慨，你啲目眶赤是無？』

¹⁶ 「按呢，上路尾的會做第一；第一的會做上路尾。」

耶穌第三遍預告家己的死及閣活

¹⁷ 耶穌佇上耶路撒冷的路中叫十二個門徒來，私下對𪜶講：

¹⁸ 「今咱欲上耶路撒冷，人子會受出賣互祭司長及經學教師。𪜶會給伊定死罪，

¹⁹ 後來將伊交互外邦人，給伊戲弄，鞭拍，釘十字架；第三日上帝會互伊閣活。」

老母的請求

²⁰ 彼時，西庇太的某導伊兩個子來見耶穌，跪落去伊面前，求一項代誌。

²¹ 耶穌問伊講：「你愛什麼？」 伊應講：「你作王的時，請你互我此兩個子一個坐你的正旁，一個坐你的倒旁。」

²² 耶穌講：「恁毋知家己啲求什麼。我啲欲飲的杯，恁會當飲𣍐？」 𪜶講：「阮會。」

²³ 耶穌給𪜶講：「我的杯恁欲飲，不過坐我的正旁倒旁毋是我會當互人的。我的父為著什麼人準備就互彼個人。」

²⁴ 其他彼十個門徒聽著，就對彼兩個兄弟受氣。

²⁵ 耶穌叫𪜶來，給𪜶講：「恁知外邦人有統治者啲給𪜶管轄，有領袖啲給𪜶支配。

²⁶ 恁中間就毋應該按呢。恁中間愛做大的著做恁的差用；

²⁷ 愛做第一的，著做恁的僕人；

²⁸ 抵親像人子來，毋是欲互人服事，反轉是欲給人服事，甚至犧牲家己的性命來贖回真多人。」

耶穌醫好兩個盲人

²⁹ 𪜶離開耶利哥的時，有一大群人隨耶穌去。

³⁰ 抵有兩個盲人坐佇路邊，聽著耶穌對遐經過，就大聲喝：「大闢的子，憐憫阮！」

³¹ 群眾給𪜶責備，叫𪜶恬恬，毋拘𪜶閣較大聲喝：「主 — 大闢的子，憐憫阮！」

³² 耶穌停腳，叫𪜶，講：「恁愛我給恁做什麼？」

³³ 𪜶講：「主啊，阮愛目睭會看見。」

³⁴ 耶穌可憐𪜶，摸𪜶的目睭，𪜶隨時閣會看見，就隨伊去。