馬太福音 2 - 現代台語譯本漢字版

星象家來訪問

¹ 希律作王的時，耶穌佇猶太的伯利恆出世。有幾若個星象家對東方來到耶路撒冷。

² 𪜶問講：「彼個出世做猶太人的王的佇什麼所在？阮有看著伊的星出現，專工來欲拜伊。」

³ 希律王聽著，心內著急不安；耶路撒冷全城的人嘛是按呢。

⁴ 伊就召集所有的祭司長及民間的經學教師，問𪜶講：「基督應該佇什麼所在出世？」

⁵ 𪜶應講：「猶太的伯利恆。因為先知有按呢記載：

⁶ 猶大地區的伯利恆啊， 你佇猶大城市中毋是上微細的； 因為有一個領袖會對你遐出來， 伊欲牧養我的子民以色列。」

⁷ 希律就暗中召彼幾個星象家，詳細給𪜶問彼粒星什麼時出現。

⁸ 後來，伊差𪜶去伯利恆，講：「恁去詳細查問關係此個細漢囝仔的事；尋著，著來報我知，我嘛通去拜伊。」

⁹ 𪜶聽王的話就去。𪜶佇東方看著的彼粒星做頭導𪜶，來到彼個細漢囝仔的所在就停佇頂面。

¹⁰ 𪜶看著彼粒星，非常歡喜。

¹¹ 𪜶入去厝內，看著細漢囝仔及伊的老母馬利亞，就仆落去拜伊，然後開𪜶的寶盒，將黃金、乳香，及沒藥做禮物獻互伊。

¹² 後來，佇眠夢中上帝指示𪜶毋通倒去希律遐，𪜶就對別條路倒去本國。

逃走去埃及

¹³ 星象家離開了後，主的天使佇約瑟的眠夢中對伊出現，講：「起來，導細漢囝仔及伊的老母逃走去埃及，住遐到我講通離開的時，因為希律啲尋此個細漢囝仔，欲給伊刣死。」

¹⁴ 約瑟就起來，導細漢囝仔及伊的老母透暝離開去埃及，

¹⁵ 住佇遐到希律死。這是欲應驗主通過先知所講的話：我有召我的子出埃及。

刣死細漢查甫囝仔

¹⁶ 希律一下知家己互星象家騙去，非常受氣，就差人將伯利恆以及周圍所有的查甫囝仔，照伊對星象家詳細查問的時算起，兩歲以下的攏刣死。

¹⁷ 此個代誌有應驗主通過先知耶利米所講的話：

¹⁸ 佇拉瑪有聽著聲， 啼哭真悲傷； 蕾潔為著伊的子兒啲哭， 毋肯受安慰，因為𪜶攏無去啦。

對埃及倒來

¹⁹ 希律死以後，主的天使佇埃及，佇約瑟的眠夢中對伊出現，

²⁰ 講：「起來，導細漢囝仔及伊的老母倒去以色列地；因為欲害細漢囝仔的性命許個人已經死。」

²¹ 約瑟就起來，導細漢囝仔及伊的老母倒去以色列地。

²² 約瑟聽見亞基老續接伊的老父希律做猶太的王，毋敢倒去遐；後來佇眠夢中得著指示，就退去加利利境內，

²³ 到一個城叫做拿撒勒，住佇遐。這是欲應驗主通過先知所講的話：伊欲叫做拿撒勒人。