馬太福音 19 - 現代台語譯本漢字版

關係離婚的教示

¹ 耶穌講諸個話了後，離開加利利去約旦河對岸的猶太地區。

² 有歸大陣的人隨伊，伊就佇遐醫好𪜶的病。

³ 有一寡法利賽派的人來試探伊，講：「人無論什麼理由都通離伊的某，有合律法無？」

⁴ 耶穌應講：「恁豈無讀著創造主佇起頭創造人有男有女？

⁵ 上帝講：『因為此個理由，人會離開父母，及伊的某結合，兩人成做一體。』

⁶ 按呢，𪜶已經毋是兩個，是一體。所以，上帝所配合的，人毋通拆開。」

⁷ 法利賽派的人問伊講：「若按呢，摩西是按怎命令人互伊的某一張離婚書就通給伊離？」

⁸ 耶穌應講：「因為恁的心硬，摩西才容允恁離恁的某。起頭創造的時上帝的意思並毋是按呢。

⁹ 我給恁講，若毋是因為某不貞，𣍐用得給伊離，若給伊離閣娶別個婦仁人就是犯姦淫。」

¹⁰ 門徒給伊講：「既然夫婦的關係是按呢，寧可結婚較好。」

¹¹ 耶穌給𪜶講：「此個話毋是逐個人攏會當接受，只有有此款恩賜的人才會。

¹² 有人對出世就無適合結婚；有人是人為的原因𣍐當結婚；嘛有人是為著天國的緣故無愛結婚。會當接受的人著接受。」

耶穌祝福囝仔

¹³ 有人導囝仔來耶穌遐，愛伊給𪜶按手祈禱。門徒責備許個人。

¹⁴ 毋拘耶穌講：「互囝仔來我遮，毋通給𪜶阻擋，因為天國是此款人的。」

¹⁵ 伊就給𪜶按手祝福，然後離開遐。

好額的少年人來見耶穌

¹⁶ 有一遍，有一個人來尋耶穌，對伊講：「老師，我著做什麼好事才會當得著永遠的活命？」

¹⁷ 耶穌應講：「你哪會問我關係好的事？只有一位是好。你若愛進入永遠的活命，著遵守誡命。」

¹⁸ 伊問耶穌講：「是叨一條誡命？」 耶穌應講：「毋通害死人；毋通姦淫；毋通偷提；毋通作偽證；

¹⁹ 著孝敬父母；著疼厝邊親像疼家己。」

²⁰ 此個少年人給伊講：「諸個我一直有啲遵守，猶欠什麼？」

²¹ 耶穌應講：「你若愛做完全的人，你去，去賣你的財產，分互散赤人，你佇天頂就有財寶，然後來隨我。」

²² 少年人聽著此個話，就憂憂愁愁離開；因為伊財產真多。

²³ 耶穌就給伊的門徒講：「我實在給恁講，好額人入天國實在真困難！

²⁴ 我閣給恁講，駱駝穿過針鼻嘛比好額人入上帝國閣較簡單。」

²⁵ 門徒聽著，真著驚，講：「若按呢，什麼人會當得著救？」

²⁶ 耶穌注目給𪜶看，講：「此個事，人做𣍐到，毋拘上帝逐項攏會。」

²⁷ 彼得應講：「阮已經放拺一切來隨你啦，阮會得著什麼？」

²⁸ 耶穌對𪜶講：「我實在給恁講，將來的新世界，人子坐佇伊榮光的寶座的時，恁隨我的人會坐佇十二個寶座來審判以色列的十二支族。

²⁹ 為著我的名放拺家己的厝、兄弟、姊妹、父母、子兒，抑是田園的人，攏會得著百倍的報賞，閣承受永遠的活命。

³⁰ 總是真多做頭前的會做上路尾；上路尾的會做上頭前。」