馬太福音 18 - 現代台語譯本漢字版

什麼人上大

¹ 彼時，門徒來問耶穌：「佇天國什麼人上大？」

² 耶穌叫一個囝仔來，互伊徛佇𪜶中間，

³ 講：「我實在給恁講，恁若無改變變做親像囝仔，絕對𣍐當入天國。

⁴ 所以，人家己謙卑親像此個囝仔，此個人佇天國就是上大。

⁵ 無論什麼人，為著我的名接納此款囝仔就是接納我。」

引起人犯罪

⁶ 「無論什麼人互信我的人中間微細的一個犯罪，寧可互人用大石磨縛佇頷頸填落深海。

⁷ 此個世間慘啊，因為有互人跋倒犯罪。互人犯罪的事一定有，毋拘引起人犯罪的人慘啊。

⁸ 「你的一支手抑是一支腳若互你犯罪，著給伊斬起來擲㧒确。寧可一腳一手入永遠活，比雙腳雙手好好互人㧒落永遠的火較好。

⁹ 你的目睭若互你犯罪，著給伊挖出來擲㧒确。寧可減一蕊目睭入永遠活，比兩蕊目睭好好，互人㧒落火啲𤏸的地獄較好。」

失迷的羊的譬喻

¹⁰ 「恁著謹慎，毋通看輕諸個微細的人的一個。我給恁講，𪜶的天使佇天頂時常啲見我天父的面。

¹² 「恁想啥款？有一個人有一百隻羊，其中一隻失迷，伊豈𣍐將九十九隻放佇山頂，去尋彼隻失迷的？

¹³ 我實在給恁講，伊若尋著彼隻失迷的羊，一定真歡喜，比有九十九隻無失迷的閣較歡喜。

¹⁴ 像款，恁的天父毋甘諸個微細的人的一個滅亡。」

按怎對待得罪你的人

¹⁵ 「你的兄弟抑是姊妹若得罪你，著去尋伊，干焦恁兩人做夥的時私下給伊指出錯誤。伊若欲聽，就回復你及伊做兄弟抑是姊妹的關係。

¹⁶ 伊若毋聽，著導一兩個人及你去，按呢逐句話有兩個抑是三個人通作證。

¹⁷ 伊若猶毋聽，著給教會講；伊若連教會都毋聽，就給伊看做外邦人抑是貿稅的。」

禁止及允准

¹⁸ 「我實在給恁講，恁佇地上禁止的，佇天頂嘛會禁止；恁佇地上允准的，佇天頂嘛會允准。

¹⁹ 「我閣給恁講，恁中間若有兩個人佇地上同心合意祈求，我的天父攏會給𪜶成全。

²⁰ 因為，有兩個抑是三個人奉我的名聚會，我就佇𪜶中間。」

毋赦免人的僕人的譬喻

²¹ 彼得來問耶穌：「主啊，我的兄弟抑是姊妹得罪我，我著赦免伊幾遍？到七遍是無？」

²² 耶穌給伊講：「毋是。我毋是給你講著到七遍，是著到七十個七遍。

²³ 「按呢，天國通用此個譬喻來說明：有一個國王欲及伊的僕人結賬，

²⁴ 伊開始算賬的時，有人將欠幾若百萬銀仔的人導來伊的面前。

²⁵ 彼個人𣍐當還，主人就命令人將彼個人及伊的某子以及一切所有的攏去賣來還債。

²⁶ 彼個僕人就跪落去求講：『請互我限一下，我會攏還。』

²⁷ 僕人的主人就可憐伊，擦消伊的債，放伊去。

²⁸ 「彼個僕人出去，抵著一個平平做僕人的，彼個人只有欠伊幾個銀仔，就給伊掠啲，掟伊的頷頸，講：『你所欠的，攏著還！』

²⁹ 平平做僕人的跪落去求伊講：『拜託互我限一下，我會攏還。』

³⁰ 伊毋肯，顛倒將此個人關落監，關到所欠的攏還清楚。

³¹ 另外平平做僕人的看著，非常痛心，就將所發生一切的代誌去給主人報告。

³² 主人就叫彼個僕人來，對伊講：『你此個歹僕人，因為你對我求，我就將你所欠的債攏擦消。

³³ 我有憐憫你，你豈毋應該親像按呢憐憫彼個平平做僕人的？』

³⁴ 伊的主人真受氣，就給伊關落監受刑，關到伊將一切的債務攏還清楚。

³⁵ 「恁逐個人若無對心底赦免家己的兄弟抑是姊妹，我的天父嘛會按呢對待恁，𣍐給恁赦免。」