馬太福音 17 - 現代台語譯本漢字版

耶穌改變形像

¹ 六日後，耶穌導彼得、雅各，及雅各的小弟約翰，干焦𪜶家己𬦰上一座高山。

² 佇𪜶面前，耶穌的形像改變：伊的面親像日頭發光；伊的衫變甲親像光赫呢白。

³ 忽然間，摩西及以利亞對𪜶顯現，及耶穌講話。

⁴ 彼得對耶穌講：「主啊，咱佇遮真好！你若欲，我佇遮搭三間寮仔，一間互你，一間互摩西，一間互以利亞。」

⁵ 伊猶啲講的時，忽然有一片燦爛的雲給𪜶罩咧，有聲對雲出來，講：「此個是我所疼的子，伊，我真意愛，恁著聽趁伊。」

⁶ 門徒一下聽著就仆落去，非常驚惶。

⁷ 耶穌行倚去，給𪜶摸，講：「起來，毋免驚！」

⁸ 𪜶一下攑目看，只有看著耶穌，以外無別人。

⁹ 𪜶落山的時，耶穌命令𪜶，講：「人子對死人中閣活以前，恁毋通給人講起所看見的異象。」

¹⁰ 門徒問伊，講：「若按呢，是按怎經學教師講以利亞一定著先來？」

¹¹ 耶穌應講：「以利亞一定著來重新整理一切。

¹² 我給恁講，以利亞已經來啦，毋拘人毋識伊，反轉照𪜶的意思對待伊。親像按呢，人子嘛啲欲佇𪜶的手下受苦。」

¹³ 彼時門徒才明白伊對𪜶講的是指施洗者約翰。

耶穌醫好邪神附身的囝仔

¹⁴ 𪜶來到群眾遐，有一個人來，跪佇耶穌的腳前，

¹⁵ 對伊講：「主啊，憐憫我的子！因為伊致著羊眩，非常艱苦，不時跋落火，嘛不時跋落水。

¹⁶ 我導伊去你的門徒遐，𪜶無法度給伊醫好。」

¹⁷ 耶穌應講：「唉啊，毋信閣腐敗的世代，我著及恁住偌久？我著閣忍耐恁偌久？給伊導來我遮。」

¹⁸ 耶穌責備鬼，鬼就對囝仔出去；伊的病隨時好去。

¹⁹ 後來，門徒私下來問耶穌：「是按怎阮無法度給鬼趕出去？」

²⁰ 耶穌給𪜶講：「是因為恁小信。我實在給恁講，恁的信心若有芥菜籽赫大，恁對此座山講『對遮徙去遐』，山嘛會徙去；無一項事恁做𣍐到。」

耶穌閣預告家己的死及閣活

²² 門徒聚集佇加利利的時，耶穌給𪜶講：「人子啲欲互人出賣。

²³ 𪜶會給伊害死，第三日上帝會互伊閣活。」門徒就非常傷心。

納聖殿稅

²⁴ 耶穌及門徒來到迦百農的時，有一寡收聖殿稅的人去問彼得：「恁老師有納聖殿稅無？」

²⁵ 伊講：「有。」 彼得入去厝內的時，耶穌先問伊講：「地上的君王是對什麼人收關稅抑是人頭稅？是對本國人抑是外國人？西門，你想按怎？」

²⁶ 彼得應講：「對外國人。」 耶穌給伊講：「按呢，本國人就毋免納稅囉。

²⁷ 不過，咱為著無愛得罪諸個人，你去湖裡釣魚，釣起來的頭一尾，給魚的嘴擘開就會看著一個銀仔，提去互𪜶，替我及你納聖殿稅。」