馬太福音 16 - 現代台語譯本漢字版

法利賽派的人要求神跡

¹ 有法利賽派及撒都該派的人來試探耶穌，要求伊互𪜶看對天來的神跡。

² 耶穌應講：「黃昏的時，恁講『明仔載會好天，因為天色紅』。

³ 早起時恁講『今仔日有風雨，因為天色暗閣紅』。恁都看會出天的景象，哪看𣍐出此個時代的兆頭。

⁴ 邪惡姦淫的世代要求神跡；約拿的神跡以外，𣍐閣有神跡互此世代的人。」 講了，耶穌就離開𪜶去別位。

法利賽派及撒都該派的酵

⁵ 門徒到湖的彼旁岸才知𪜶𣍐記得帶餅。

⁶ 耶穌給𪜶講：「著注意，著持防法利賽派及撒都該派的酵。」

⁷ 𪜶互相議論講：「是因為咱無帶餅是無？」

⁸ 耶穌知影就講：「小信的人，恁是按怎啲議論無帶餅的代誌？

⁹ 恁豈猶未明白，豈𣍐記得我用五個餅互五千人食，食賰的恁有拾幾籃？

¹⁰ 恁豈𣍐記得我用七個餅互四千人食，食賰的恁有拾幾籠？

¹¹ 是按怎恁無明白我給恁講的毋是關係餅的代誌？著持防法利賽派及撒都該派的酵！」

¹² 此時門徒才明白耶穌毋是講著持防餅的酵，是著持防法利賽派及撒都該派的教示。

彼得宣認耶穌是基督

¹³ 耶穌來到凱撒利亞‧腓立比境內的時，問伊的門徒講：「人講人子是什麼人？」

¹⁴ 𪜶應講：「有人講是施洗者約翰；有人講是以利亞；嘛有人講是耶利米抑是先知中的一位。」

¹⁵ 耶穌問𪜶講：「恁咧，恁講我是什麼人？」

¹⁶ 西門‧彼得應講：「你是基督，永活上帝的子。」

¹⁷ 耶穌應伊講：「西門‧巴約拿，你真有福氣，因為給你啟示的毋是人，是我的天父。

¹⁸ 我閣給你講，你是彼得，是石磐，我欲佇此個石磐頂起造我的教會，陰府死亡的權勢都𣍐贏過伊。

¹⁹ 我欲將天國的鎖匙互你；你佇地上禁止的，佇天頂嘛會禁止；你佇地上允准的，佇天頂嘛會允准。」

²⁰ 後來，伊命令門徒毋通給人講伊就是基督。

耶穌預告受難及閣活

²¹ 彼時，耶穌開始對伊的門徒表示伊一定著去耶路撒冷，對長老、祭司長，及經學教師受真多苦難，閣互人害死，第三日上帝會互伊閣活。

²² 彼得就扭耶穌去邊仔，給伊責備講：「主啊，絕對毋通！你𣍐用得有此款代誌！」

²³ 耶穌越轉身對彼得講：「撒旦，閃開！你啲給我纏腳絆手；你想的毋是上帝的事，是人的事。」

²⁴ 後來，耶穌對伊的門徒講：「欲隨我的人，著完全否定家己，夯家己的十字架來隨我。

²⁵ 因為欲救家己的性命的，會喪失性命；為著我的緣故喪失家己的性命的，會得著性命。

²⁶ 人若得著全世界煞喪失家己的性命有什麼利益？人會當用什麼代價來交換家己的性命？

²⁷ 人子啲欲佇伊的父的榮耀中及伊的天使來臨，彼時伊會照逐個人的行為給𪜶報賞抑是刑罰。

²⁸ 我實在給恁講，徛佇遮的人，有的猶未死以前會看見人子作王來臨。」