馬太福音 15 - 現代台語譯本漢字版

祖先的傳統

¹ 有法利賽派的人及經學教師對耶路撒冷來見耶穌，問伊講：

² 「是按怎你的門徒無先洗手就食飯，違犯古早人的傳統？」

³ 伊應講：「恁是按怎因為恁的傳統來違犯上帝的誡命？

⁴ 上帝講『著孝敬父母』；閣講『罵老父抑是罵老母的人應該處死』。

⁵ 毋拘恁講：『人若對家己的老父抑是老母講：我應該互你的已經獻互上帝，

⁶ 伊就無需要孝敬老父。』按呢，恁因為家己的傳統廢除上帝的話。

⁷ 恁假好的人，以賽亞所講關係恁的預言真著；伊講：

⁸ 此個子民用嘴唇尊敬我， 𪜶的心卻離開我遠遠。

⁹ 𪜶用人的規例做我的教示教示人； 𪜶敬拜我攏無採工。」

什麼才會互人無清氣

¹⁰ 耶穌叫眾人來，給𪜶講：「著聽，著了解：

¹¹ 毋是對嘴入去的互人無清氣，是對嘴出來的才互人無清氣。」

¹² 門徒來對伊講：「法利賽派的人聽著你此個話真反感，你知無？」

¹³ 伊應講：「毋是我的天父栽種的，攏欲給伊摳起來。

¹⁴ 出在𪜶講。𪜶是睛瞑啲牽睛瞑；若睛瞑牽睛瞑，兩個攏會跋落窟仔。」

¹⁵ 彼得應伊講：「請你給阮解說此個譬喻。」

¹⁶ 伊就講：「連恁都猶無明白噢？

¹⁷ 恁豈無了解，所有對嘴入的攏入去腹肚內，後來放落去便所？

¹⁸ 對嘴出來的是對心出，這才會互人無清氣。

¹⁹ 因為對心出來的有歹念頭、凶殺、私通、姦淫、偷提、偽證，及誹謗。

²⁰ 諸個才會互人無清氣；無洗手就食飯，𣍐互人無清氣。」

迦南婦仁人的信心

²¹ 耶穌離開彼所在，退去泰爾及西頓的境內。

²² 抵好有一個迦南的婦仁人對彼地區來，大聲喝：「主啊，大闢的子，憐憫我！我的查某子互鬼附身，真艱苦。」

²³ 耶穌無給伊應半句。伊的門徒來求伊講：「給伊趕走，伊隨佇咱後面直直啲喝。」

²⁴ 耶穌應講：「我受差派只有是欲尋以色列家失落的羊。」

²⁵ 毋拘婦仁人來跪佇伊的面前，講：「主啊，請幫贊我！」

²⁶ 耶穌講：「提囝仔的食物㧒互狗仔食，毋好。」

²⁷ 婦仁人講：「主，是啦，狗仔嘛有食主人桌頂落落來的餅幼仔。」

²⁸ 後來，耶穌應講：「婦仁人，你的信心真大。互你的心願實現！」伊的查某子佇彼陣就得著醫好。

醫好逐款病人

²⁹ 耶穌離開彼所在，沿加利利湖邊行，後來上山，佇遐坐。

³⁰ 有真大陣的人導腳手瘸去、腳跛、目睭無看見、嘴𣍐講話，及真多有別款病的人來耶穌遐，下佇伊的腳前，伊就給𪜶醫好。

³¹ 眾人看著𣍐講話的人會講話，手瘸去的人復原，腳跛的人會行，𣍐看見的人會看見，真著驚，就歸榮光互以色列的上帝。

互四千人食飽

³² 耶穌叫伊的門徒來，給𪜶講：「我真可憐此陣人，因為𪜶已經及我做夥三日久，現在無物通食啦。我毋甘互𪜶四散枵枵轉去，驚了𪜶佇路中暈倒。」

³³ 門徒給伊講：「佇此個偏僻無人住的所在，阮欲去叨位提赫多餅來互即多人食？」

³⁴ 耶穌問𪜶講：「恁有偌多餅？」 𪜶講：「七個；嘛有幾尾仔細尾魚。」

³⁵ 伊命令群眾坐落去土腳，

³⁶ 然後提彼七個餅及許個魚，感謝，擘開，提互門徒，門徒就提互群眾。

³⁷ 眾人攏食，食到飽；𪜶拾食賰的碎屑仔，貯滿七籠。

³⁸ 食的人，婦仁人及囝仔無算，干焦查甫人就有四千。

³⁹ 耶穌解散群眾了後，上船去馬加丹地區。