馬太福音 14 - 現代台語譯本漢字版

施洗者約翰的死

¹ 彼時，加利利分封的王希律聽著耶穌的名聲，

² 就對伊的部下講：「此個人是施洗者約翰，伊已經對死人中閣活，所以才有權能行諸個神跡。」

³ 原來，希律為著伊的小弟腓力的某希羅底的緣故有掠約翰，給伊鍊起來，關落監。

⁴ 因為約翰定定對伊講：「你娶此個婦仁人做某無合法。」

⁵ 希律想欲給伊刣，不過驚群眾，因為𪜶攏想講伊是先知。

⁶ 希律作生日的時，希羅底的查某子佇來賓面前跳舞；希律真歡喜，

⁷ 就咒誓答應彼個查某囝仔無論求什麼攏欲互伊。

⁸ 查某囝仔互老母使弄，就講：「請將施洗者約翰的頭殼囥佇盤裡互我。」

⁹ 王的心真艱苦，不過因為已經佇貴賓的面前咒誓，就命令照所求的互伊。

¹⁰ 王差人去監裡斬約翰的頭，

¹¹ 將頭殼下佇盤裡，交互查某囝仔，查某囝仔就捧去互伊的老母。

¹² 約翰的門徒來收伊的身屍去埋葬，然後去給耶穌報告。

耶穌互五千人食飽

¹³ 耶穌聽著此個消息就離開遐，干焦家己坐船退去偏僻無人住的所在。一大陣人聽著就對逐城市行路隨伊。

¹⁴ 耶穌上岸，看著一大陣人就可憐𪜶，醫好𪜶的病。

¹⁵ 黃昏暗，門徒倚來給伊講：「遮是偏僻的所在，天嘛啲暗啊；請給群眾解散，互𪜶通家己去附近的庄社買食物。」

¹⁶ 耶穌應講：「𪜶毋免去，恁互𪜶食。」

¹⁷ 門徒對伊講：「咱遮只有五個餅，兩尾魚。」

¹⁸ 耶穌講：「提來遮互我。」

¹⁹ 伊就叫眾人坐佇草埔，然後提彼五個餅及兩尾魚，向天感謝；餅擘開，提互門徒，門徒就分互眾人。

²⁰ 大家攏食，食到飽。門徒拾食賰的碎屑仔，滿十二籃。

²¹ 食的人，婦仁人及囝仔無算，約有五千個查甫人。

耶穌佇湖的頂面行

²² 耶穌隨時迫門徒上船先過去對面岸，伊家己留啲解散群眾。

²³ 群眾四散了後，伊家己上山祈禱。天暗的時，伊猶家己一個佇遐。

²⁴ 彼時，船已經離岸真遠，因為搢風互湧撥來撥去。

²⁵ 天欲光的時，耶穌佇湖的頂面向門徒遐行去。

²⁶ 門徒看著伊佇湖的頂面啲行，真著驚，講：「是鬼！」𪜶驚甲大聲喝出來。

²⁷ 耶穌隨時給𪜶講：「安心，是我，毋免驚！」

²⁸ 彼得應講：「主啊，若真正是你，命令我行水面去你遐。」

²⁹ 耶穌講：「來！」彼得就對船頂落來，行水面去耶穌遐。

³⁰ 彼得一下看著風赫呢大就驚，煞欲沉落去，大聲喝：「主啊，救咧噢！」

³¹ 耶穌隨時伸手給伊扭啲，講：「小信的人，是按怎啲憢疑？」

³² 𪜶上船，風就恬去。

³³ 船頂的人跪落去拜伊，講：「你真正是上帝的子！」

耶穌醫好革尼撒勒的病人

³⁴ 耶穌及門徒過湖了後，佇革尼撒勒上岸。

³⁵ 彼所在的人一下認出耶穌，就派人去四周圍給所有的病人攏導來伊遐。

³⁶ 𪜶懇求耶穌互病人干焦摸伊衫仔裾的鬚就好；所有摸著的人攏得著醫好。