馬太福音 12 - 現代台語譯本漢字版

安歇日的問題

¹ 過無偌久，佇安歇日耶穌對麥園經過。伊的門徒腹肚枵，就摘麥穗來食。

² 法利賽派的人看著，對耶穌講：「你看，你的門徒佇安歇日做𣍐用得做的代誌。」

³ 耶穌給𪜶講：「恁豈毋曾讀著大闢及隨伊的人腹肚枵的時所做的代誌？

⁴ 伊入去上帝的殿食獻祭的餅，此款餅只有祭司才通食，伊及隨伊的人攏𣍐用得食。

⁵ 另外，恁豈無讀著律法的記載，就是安歇日祭司佇聖殿犯著安歇日的規矩嘛算無罪。

⁶ 我給恁講，佇遮有一個比聖殿較重要的。

⁷ 聖經有講：『我愛憐憫，無愛祭物。』恁若了解此句話的意思，就𣍐給無罪的人定罪。

⁸ 因為人子是安歇日的主。」

耶穌醫好手瘸去的人

⁹ 耶穌離開彼所在，入去𪜶的會堂。

¹⁰ 抵好有一個一支手瘸去的人佇遐。有一寡人想欲控告耶穌，就問伊講：「佇安歇日醫病有合律法無？」

¹¹ 耶穌應講：「恁中間有人有一隻羊，抵好佇安歇日跋落窟仔，伊豈𣍐給伊扭起來？

¹² 人比羊加偌仔呢貴重！所以，佇安歇日做好事有合律法。」

¹³ 耶穌就給彼個人講：「手伸出來！」 此個人手伸出來，就復原，完全好去，及另外彼支手仝款。

¹⁴ 法利賽派的人出去，就計謀欲對付耶穌，看欲按怎給伊害死。

上帝揀選的僕人

¹⁵ 耶穌知影𪜶的計謀就離開遐；有真多人隨伊去，伊就醫好𪜶中間所有的病人。

¹⁶ 伊命令𪜶毋通對人傳揚伊的代誌。

¹⁷ 這是欲應驗通過先知以賽亞所講的話：

¹⁸ 恁看，我所揀選的僕人， 我所疼，所意愛的。 我欲賜我的神互伊； 伊欲對萬民宣告我的公義。

¹⁹ 伊𣍐爭辯，𣍐喧嚷； 佇街路無人會聽著伊的聲。

²⁰ 受傷的蘆葦，伊𣍐遏斷； 欲化的燈火，伊𣍐歕熄， 直到伊互公義得勝。

²¹ 萬民攏會將向望交託伊。

耶穌及別西卜

²² 彼時，有人導一個互鬼附身，失明閣𣍐講話的人來耶穌遐；耶穌給伊醫好，彼個𣍐講話的人就會講話，閣會看見。

²³ 群眾攏真著驚，講：「此個人敢是大闢的子乎？」

²⁴ 法利賽派的人聽著就講：「此個人是靠鬼王別西卜啲趕鬼。」

²⁵ 耶穌知影𪜶的心思就給𪜶講：「國家家己紛爭，會荒廢；城市抑是家庭家己紛爭，徛𣍐牢。

²⁶ 撒旦若趕撒旦，是家己紛爭，伊的國欲哪徛會牢？

²⁷ 我若靠別西卜趕鬼，恁的子弟是靠什麼人趕鬼？按呢，恁家己的子弟會給恁判罪。

²⁸ 不過我若是靠上帝的神趕鬼，上帝的主權就已經佇恁中間實現啦。

²⁹ 「人按怎才會當入去勇士的厝搶伊的財物，豈毋是著先給伊縛起來？

³⁰ 「無為我的就是反對我；無及我做夥收集的就是啲拍散。

³¹ 所以，我給恁講，人一切的罪及誹謗攏會得著赦免，毋拘褻瀆聖神𣍐得著赦免。

³² 無論什麼人講話攻擊人子，會得著赦免，毋拘無論什麼人講話攻擊聖神，佇現在及將來攏𣍐得著赦免。」

樹及果子

³³ 「好樹結好果子；歹樹結歹果子；對所結的果子通知樹的好歹。

³⁴ 恁諸個毒蛇，恁本來是歹的，欲哪會講好話？因為人心內充滿什麼，嘴就講什麼。

³⁵ 好人對所積聚的好發出好；歹人對所積聚的歹發出歹。

³⁶ 「我給恁講，人所講一切的閒仔話，佇審判的日逐句攏著負責。

³⁷ 因為上帝欲用你的話來判你無罪，嘛欲用你的話來定你有罪。」

要求神跡

³⁸ 彼時，有幾若個經學教師及法利賽派的人對耶穌講：「老師，阮愛你行一個神跡互阮看。」

³⁹ 耶穌應講：「邪惡姦淫的世代要求神跡，毋拘先知約拿的神跡以外，𣍐閣有神跡互𪜶。

⁴⁰ 親像約拿三暝三日佇大魚的腹肚內，人子嘛會三暝三日佇地深的所在。

⁴¹ 佇審判的時，尼尼微人會及此世代的人做夥起來，給此世代的人定罪，因為尼尼微人聽著約拿的傳道了後攏有悔改。恁看，有比約拿閣較偉大的佇遮！

⁴² 佇審判的時，南方的女王會及此世代的人做夥起來，給此世代的人定罪，因為伊有對地的極頭來聽所羅門智慧的話。恁看，有比所羅門閣較偉大的佇遮！」

邪神倒轉去

⁴³ 「邪神離開所附身的人了後，佇無水的地區行透透，欲尋一個歇睏的所在，尋攏無，

⁴⁴ 就講：『我欲轉來去我出來彼間厝。』伊轉去，看著厝空空，掃甲真清氣，閣整理好勢。

⁴⁵ 後來，伊去導七個比伊較歹的邪神及伊做夥來，入去遐住。按呢，彼個人的結局比起頭閣較慘。此個邪惡的世代嘛會親像按呢。」

耶穌的老母及兄弟

⁴⁶ 耶穌猶啲對眾人講話的時，伊的老母及兄弟來徛佇外面，愛欲及伊講話。

⁴⁷ 有人給耶穌講：「你看，你的老母及兄弟徛佇外面，愛欲及你講話。」

⁴⁸ 耶穌給彼個人講：「什麼人是我的老母？什麼人是我的兄弟？」

⁴⁹ 然後伊伸手指伊的門徒講：「恁看，我的老母，我的兄弟！

⁵⁰ 實行我天父旨意的人就是我的兄弟、姊妹，及老母。」