馬太福音 10 - 現代台語譯本漢字版

耶穌設立十二使徒

¹ 耶穌召集伊十二個門徒來，互𪜶有權柄通趕邪神，醫治逐款的症頭及病疼。

² 此十二使徒的名就是諸個：第一是西門，嘛叫做彼得，及伊的小弟安得烈；西庇太的子雅各及伊的小弟約翰；

³ 腓力及巴多羅買；多馬及貿稅的馬太；達太及亞勒腓的子雅各；

⁴ 激進黨的西門及出賣耶穌彼個以斯加略的猶大。

十二使徒的使命

⁵ 耶穌差此十二使徒出去，吩咐𪜶講：「恁毋通去外邦人的地區；毋通進入撒馬利亞人的城，

⁶ 只有著去尋以色列家失迷的羊。

⁷ 恁去的時著宣揚講：『天國啲欲實現啦！』

⁸ 恁著醫好破病的人，互死人閣活，互痲瘋病人清氣，閣趕出邪神。恁白白得著，嘛著白白互人。

⁹ 腰帶內面毋免帶金幣、銀幣，抑是銅幣；

¹⁰ 出門毋免帶旅行袋抑是兩領內衫，嘛毋免帶涼鞋抑是攑柺仔；因為工人得著食物是應該。

¹¹ 「恁無論入去叨一個城叨一個庄社，著探聽看什麼人願意接待恁，才去住遐，住到離開。

¹² 恁入去厝內的時，著給𪜶請安。

¹³ 此家的人若願意接待恁，著將恁的平安互𪜶；若無願意接待恁，著將平安收回。

¹⁴ 毋接待恁，毋聽恁的話的人，恁離開彼間厝抑是彼個城的時，著將恁腳裡的土粉拌互伊清氣。

¹⁵ 我實在給恁講，佇審判的日，所多瑪及蛾摩拉地區所受的刑罰會比彼個城所受的閣較好忍受。」

啲欲來的迫害

¹⁶ 「著知，我差恁出去，親像送羊入去豺狼的中間。所以，著親像蛇赫呢靈巧，親像粉鳥赫呢馴良。

¹⁷ 恁著持防，因為有人會給恁掠去交互議會，佇𪜶的會堂用鞭給恁拍。

¹⁸ 閣為著我的緣故，恁會互人拖到總督及君王的面前，來對𪜶及外邦人做見證。

¹⁹ 毋拘，恁互人掠去審問的時，毋免煩惱欲按怎講，抑是欲講什麼；彼時恁所著講的，會給恁指示，

²⁰ 因為啲講的毋是恁家己，是恁天父的神通過恁啲講。

²¹ 「兄弟會出賣兄弟，互伊死；老父嘛會按呢對待子兒。子兒會起來攻擊父母，給𪜶害死。

²² 恁會因為我的名互眾人怨恨，毋拘忍耐到最後的會得著救。

²³ 𪜶佇此個城迫害恁，著逃走去別個城。我實在給恁講，以色列的城市恁行猶未透，人子就來！

²⁴ 「學生𣍐超過老師；僕人嘛𣍐超過主人。

²⁵ 學生抵著的迫害及老師仝款，僕人抵著的及主人仝款，按呢就有夠。人都給此家的主人叫做別西卜，何況伊家內的人。」

人應該驚的是上帝

²⁶ 「所以，毋免驚𪜶；因為無一項掩蓋的𣍐露現；嘛無一項祕密的𣍐互人知。

²⁷ 我佇暗中給恁講的，恁著佇光明中講出來；恁佇耳孔邊聽著的，著佇厝尾頂宣布。

²⁸ 會害死身軀卻𣍐害死靈魂的，恁毋免驚；顛倒著驚會將靈魂及身軀㧒落地獄毀滅的上帝。

²⁹ 兩隻雀鳥仔豈毋是賣一角銀若定？恁的天父若無允准，連一隻都𣍐跋落地。

³⁰ 恁咧，連恁的頭毛都攏有算過。

³¹ 所以，毋免驚，恁比歸群雀鳥仔閣較貴重！」

公開宣認基督

³² 「所以，佇人的面前宣認我的，我佇我天父的面前嘛會認伊。

³³ 佇人的面前毋認我的，我佇我天父的面前嘛毋認伊。」

毋是和平，是刀劍

³⁴ 「毋通想講我來是欲帶和平互地上；我帶來的毋是和平，是刀劍。

³⁵ 因為我來是欲互人分裂： 人對抗老父， 查某子對抗老母， 新婦對抗大家。

³⁶ 人的對敵是家己家內的人。

³⁷ 「疼父母贏過疼我的，無資格隨我；疼子抑是查某子贏過疼我的，無資格隨我。

³⁸ 毋夯家己的十字架來隨我的，嘛無資格隨我。

³⁹ 欲得著家己的性命的，會喪失性命；為著我喪失家己的性命的，會得著性命。」

報賞

⁴⁰ 「接納恁的就是接納我；接納我的就是接納差我來彼位。

⁴¹ 接納先知做先知的，會得著先知應得的報賞；接納義人做義人的，會得著義人應得的報賞。

⁴² 我實在給恁講，無論什麼人，干焦提一杯冷水互諸個上微細的一個飲，因為上微細的是我的門徒，此個人一定會得著報賞。」