馬太福音 1 - 現代台語譯本漢字版

耶穌基督的家譜

¹ 這是耶穌基督的家譜：耶穌是大闢的後代，大闢是亞伯拉罕的後代。

² 亞伯拉罕生以撒，以撒生雅各，雅各生猶大及伊的兄弟。

³ 猶大對她瑪生法勒斯及謝拉，法勒斯生希斯崙，希斯崙生亞蘭，

⁴ 亞蘭生亞米拿達，亞米拿達生拿順，拿順生撒門，

⁵ 撒門對喇合生波阿斯，波阿斯對路得生俄備得，俄備得生耶西，

⁶ 耶西生大闢王。 大闢對烏利亞的某生所羅門，

⁷ 所羅門生羅波安，羅波安生亞比雅，亞比雅生亞撒，

⁸ 亞撒生約沙法，約沙法生約蘭，約蘭生烏西亞，

⁹ 烏西亞生約坦，約坦生亞哈斯，亞哈斯生希西家，

¹⁰ 希西家生瑪拿西，瑪拿西生阿摩司，阿摩司生約西亞。

¹¹ 以色列人受遷徙去巴比倫的時，約西亞生約雅斤及伊的兄弟。

¹² 受遷徙去巴比倫以後，約雅斤生撒拉鐵，撒拉鐵生所羅巴伯，

¹³ 所羅巴伯生亞比玉，亞比玉生以利亞敬，以利亞敬生亞所，

¹⁴ 亞所生撒督，撒督生亞金，亞金生以律，

¹⁵ 以律生以利亞撒，以利亞撒生馬但，馬但生雅各，

¹⁶ 雅各生約瑟，約瑟是馬利亞的丈夫；彼個稱做基督的耶穌是對此個馬利亞生的。

¹⁷ 按呢，對亞伯拉罕到大闢攏總有十四代，對大闢到受遷徙去巴比倫有十四代，對受遷徙去巴比倫到基督嘛有十四代。

耶穌基督的出世

¹⁸ 耶穌基督出世的經過是按呢：伊的老母馬利亞已經及約瑟定婚，猶未結婚就對聖神懷孕。

¹⁹ 伊的未婚夫約瑟是正直的人，無愛互伊佇人的面前見笑，想欲暗中解除婚約。

²⁰ 伊啲想此個代誌的時，佇眠夢中，主的天使對伊出現，講：「大闢的後代約瑟，毋免驚，著娶馬利亞入門做某，因為伊所懷孕的胎是對聖神來的。

²¹ 伊會生一個查甫子，你著給伊號名叫做耶穌，因為伊欲救伊的子民脫離𪜶的罪。」

²² 這一切的事發生是欲應驗主託先知所講的話：

²³ 你看，在室女會懷孕生子， 伊的名欲叫做以馬內利。 「以馬內利」的意思是「上帝及咱同在」。

²⁴ 約瑟一下睏醒，就照主的天使所吩咐娶馬利亞入門做某，

²⁵ 不過此個查甫子猶未出世以前無及馬利亞同房。嬰仔出世，約瑟就給伊號名叫做耶穌。