歷代志下卷 9 - 現代台語譯本漢字版

示巴女王來拜訪

¹ 示巴的女王聽見所羅門的名聲，就來耶路撒冷欲用難題考驗所羅門。伊導真多跟隨來，閣有駱駝載香料、真多黃金及寶石。伊見所羅門的時，就將心內所有的難題給伊問。

² 所羅門照伊所問的一一給伊回答，無一項困難甲所羅門𣍐曉應。

³ 示巴女王見識著所羅門的智慧，看著伊起的宮殿、

⁴ 桌頂的食物、排列坐啲的人臣、跟隨服事的奴僕及𪜶的衣服，斟酒的奴僕及𪜶穿的衫，閣看著伊佇上主的聖殿所獻的燒化祭，就歸個人攏愣去。

⁵ 示巴女王就對王講：「我佇阮本國所聽著你的事蹟及你的智慧攏是真的！

⁶ 本來我毋信𪜶的話，到我親目看著才相信。人給我講的猶無事實的一半；你的智慧及你的富足超過我所聽著的。

⁷ 你的部屬真有福氣！你的人臣真有福氣！𪜶不時佇你的面前聽你智慧的話。

⁸ 上主 — 你的上帝應該受稱讚！伊意愛你，互你佇上主 — 你的上帝面前坐位作王；因為你的上帝疼以色列，愛伊永遠堅立，所以選立你做𪜶的王，互你通秉公行義。」

⁹ 示巴女王將大約四千公斤的金、真多香料，及寶石送互王；前到今毋曾有人親像示巴女王送赫多香料互所羅門王。

¹⁰ 希蘭的船員及所羅門的船員對俄斐運金來，閣帶檀香柴及寶石來。

¹¹ 王用諸個檀香柴為上主的殿及王宮做砛仔，嘛為唱歌的人做琴及瑟。佇猶大地，前到今毋曾有人看見按呢。

¹² 所羅門王送互示巴女王的回禮，超過女王帶來的禮物，閣照伊所意愛、所要求的攏送互伊。女王及伊的人臣就倒去𪜶本國。

所羅門的財富

¹³ 所羅門逐年收著的金共兩萬三千公斤。

¹⁴ 以外，伊有對生理人及貿易商收稅金；國內的省長及阿拉伯諸個王，攏進貢金銀互所羅門。

¹⁵ 所羅門王拍大盾牌兩百面，每一面用金七公斤；

¹⁶ 閣拍小盾牌三百面，每一面用金三公斤。王將諸個盾牌下佇黎巴嫩林宮。

¹⁷ 王閣用象牙做一個大寶座，用純金貼啲。

¹⁸ 寶座前有六層崎仔，閣有金的腳砧，及寶座相連；雙旁有手按，手按的邊仔各有一座獅徛啲；

¹⁹ 閣有十二座獅徛佇六層崎仔逐層的雙旁邊；別個王國攏毋曾按呢做。

²⁰ 所羅門王所有飲的器具攏是金的；黎巴嫩林宮一切的器具嘛是純金的；佇所羅門的時代，銀無互人看做真有價值。

²¹ 王的船隊及希蘭的船員做夥去他施；諸個他施的船隊運金、銀、象牙、猴、孔雀，每三年倒來一遍。

²² 所羅門王的財富及智慧贏過天下諸王。

²³ 天下諸王攏想欲來見所羅門的面，聽上帝賜互伊的智慧。

²⁴ 𪜶逐個帶進貢的禮物，就是金器、銀器、衣服、軍器、香料、馬，及騾；逐年攏有一定的數量。

²⁵ 所羅門有馬椆四千間，閣有馬兵一萬兩千名，閣安置戰車佇許個囤戰車的城，及耶路撒冷王遐。

²⁶ 所羅門管轄所有的王，對幼發拉底河，到非利士人的地，直到埃及邊界。

²⁷ 王統治的期間，耶路撒冷的銀親像石頭赫多，柏香柴親像山埔的桑材樹赫多。

²⁸ 有人對埃及，對逐所在，進口馬互所羅門。

所羅門死

²⁹ 所羅門其他的事蹟，對頭到尾攏記載佇先知拿單史，示羅人亞希雅的預言書，及先見易多論尼八的子耶羅波安的異象書。

³⁰ 所羅門佇耶路撒冷做以色列全國的王，共四十年。

³¹ 所羅門轉去伊的列祖遐了後，埋葬佇伊的老父大闢的城。伊的子羅波安續接伊作王。