歷代志下卷 8 - 現代台語譯本漢字版

所羅門其他的事蹟

¹ 所羅門用二十年起上主的聖殿及王宮，完工以後，

² 所羅門閣修建希蘭王互伊的城，互以色列人住佇遐。

³ 所羅門攻取哈馬‧瑣巴，

⁴ 閣重建佇曠野的達莫，佇哈馬起造囤積物資的城；

⁵ 閣重建頂‧伯‧和崙及下‧伯‧和崙，成做有牆，有門，有門閂的堅固的城。

⁶ 所羅門閣起造巴拉城及真多囤積軍用品的城，以及下戰車的城及下戰馬的城。所羅門閣佇耶路撒冷、黎巴嫩，及全國逐所在，起造伊所愛起的建築。

⁷ 所有住佇境內的赫人、亞摩利人、比利洗人、希未人、耶布斯人賰落來的後代，毋是屬佇以色列，

⁸ 無互以色列人消滅的，所羅門強制𪜶做苦工，到今仔日。

⁹ 毋拘所羅門無互以色列人做奴隸做苦工；伊互𪜶做伊的戰士、官長、戰車長、馬兵長。

¹⁰ 所羅門王的督工有兩百五十人。

¹¹ 所羅門將埃及王的查某子對大闢城搬入去為著伊起的宮殿；因為所羅門講：「我的某毋通住佇以色列王大闢的宮殿；因為上主的約櫃所到的所在攏神聖。」

¹² 所羅門佇聖殿走廊頭前所起上主的祭壇，獻燒化祭互上主；

¹³ 照摩西的命令，佇安歇日、初一，及逐年三遍的節期，就是除酵節、七七收割節、搭寮節，照逐日應該獻的來獻祭。

¹⁴ 閣照伊的老父大闢的規例，分配祭司的班次及職務；嘛分配利未人的職務，負責頌讚，照逐日的規定協助祭司；閣分派守衛，照班次佇逐個門顧守。諸個攏照上帝重用的人大闢的命令安排。

¹⁵ 無論管理府庫，抑是做逐款職務，許個祭司及利未人攏無違逆王的命令。

¹⁶ 所羅門起上主聖殿的工事，對下地基彼日到完工，攏順利進行。按呢，上主的殿就完成。

¹⁷ 彼時，所羅門去以東地區的海港以旬‧迦別及以祿。

¹⁸ 希蘭派伊的官員，將船及經驗豐富的船員送互所羅門。𪜶及所羅門的船員去俄斐，對遐運送金一萬五千公斤到所羅門王遐。