歷代志下卷 7 - 現代台語譯本漢字版

奉獻聖殿

¹ 所羅門祈禱煞，就有火對天降落，將燒化祭及所有的祭物攏燒盡；上主的榮光充滿聖殿。

² 因為上主的榮光充滿上主的殿，所以祭司𣍐當入去。

³ 以色列眾人看著火降落，閣上主的榮光罩佇聖殿頂面，就佇鋪石的所在仆落去敬拜，感謝上主，講： 上主至善， 伊的慈愛續到永遠。

⁴ 王及全體人民佇上主的面前獻祭。

⁵ 所羅門王獻牛兩萬兩千隻，羊十二萬隻做祭；按呢，王及全體人民為著上帝的殿舉行奉獻禮。

⁶ 祭司照𪜶家己的職務徛啲侍奉；利未人提以前大闢王所造的樂器，唱大闢所作的詩，稱讚上主講：「伊的慈愛續到永遠。」祭司佇利未人的對面歕喇叭；所有的以色列人攏徛啲。

⁷ 所羅門因為伊所造的銅壇傷細，無夠通佇遐獻燒化祭、素祭，及平安祭的油，就將上主殿前的埕中央的所在分別作聖，佇遐獻燒化祭，及平安祭的油。

⁸ 彼時，所羅門及以色列人民做夥守節七日；以色列人民對哈馬隘口到埃及的溪谷來參加，成做盛況的大會。

⁹ 到第八日𪜶舉行嚴肅會；𪜶守祭壇的奉獻禮七日，閣守節七日。

¹⁰ 七月二十三日，王給人民解散，互𪜶倒去𪜶兜。人民因為上主對大闢、所羅門，及伊的子民以色列所賞賜的恩惠，心內歡喜快樂。

上帝閣對所羅門顯現

¹¹ 所羅門完成上主聖殿及王宮的工程；伊順利完成心內所計劃一切的建築。

¹² 暝時上主對所羅門顯現，對伊講：「我有聽著你的祈禱，嘛揀此所在做向我獻祭的聖殿。

¹³ 我若給天關密無落雨，抑是命令草蜢食農作物，抑是降瘟疫佇我子民的中間，

¹⁴ 我的子民若謙卑，祈禱，悔改，離開𪜶的歹行為，我就欲對天頂聽𪜶的祈禱，赦免𪜶的罪，互土地閣再生產。

¹⁵ 我的目睭欲看，耳孔欲聽佇此所在所獻的祈禱。

¹⁶ 現在我已經揀此個殿，給伊分別作聖，做我永遠臨在的所在；我的目睭，我的心嘛欲永遠佇遮。

¹⁷ 你佇我面前的行做，若親像你的老父大闢，遵趁我的誡命，執守我的規例及命令，

¹⁸ 我就欲堅固你的王位，照我及你的老父大闢所立的約，講：『你的後代會永遠統治以色列。』

¹⁹ 「恁若越走，棄拺我頒布互恁的規例及誡命，去服事敬拜別個神明，

²⁰ 我就欲將以色列人對我賞賜𪜶的地給𪜶拔出來，嘛欲棄拺此間分別作聖用來敬拜我的殿，互伊佇萬國中做笑談，受人恥笑。

²¹ 「此間聖殿雖然受人尊崇，到彼時，經過的人會著驚，講：『上主哪會按呢對待此個地及此間殿？』

²² 有人會應講：『是因為𪜶棄拺導𪜶出埃及地的上主 — 𪜶列祖的上帝，去信奉別個神明，敬拜服事𪜶，所以上主互諸個一切的災禍臨到𪜶。』」