歷代志下卷 6 - 現代台語譯本漢字版

所羅門對人民講話

¹ 彼時所羅門講： 「上主曾講， 伊欲𫢶佇密雲的所在。

² 我已經起一間堂皇的殿， 做你永遠徛起的所在。」

³ 以色列會眾攏徛啲，所羅門王越過來給𪜶祝福。

⁴ 伊講：「上主 — 以色列的上帝應該得著謳咾！伊親嘴對我的老父大闢應允的，攏親手實現。

⁵ 上主有講：『對我導我的子民出埃及以來，我毋曾佇以色列眾支族中間揀一個城為我的名起聖殿，嘛毋曾選立人做我的子民以色列的領袖；

⁶ 毋拘我有揀耶路撒冷做我欲臨在的所在，閣揀大闢治理我的子民以色列。』

⁷ 我的老父大闢心內有意思欲為上主 — 以色列的上帝的名起聖殿。

⁸ 總是上主對我的老父大闢講：『你有意思欲為我的名起聖殿，你此個心意真好；

⁹ 毋拘你毋通起，你親生的子會為我的名起聖殿。』

¹⁰ 「今上主實現伊所講的話；我照上主的話起來續接我的老父大闢坐以色列的王位，閣為上主 — 以色列上帝的名起聖殿。

¹¹ 我將約櫃安置佇遐；櫃內有上主及以色列人所立的約。」

所羅門的祈禱

¹² 所羅門當以色列會眾的面前，徛佇上主的祭壇前，雙手攑起來。

¹³ 所羅門有造一個銅台，長兩公尺二十公分，闊兩公尺二十公分，高一公尺三十公分，下佇埕的中央；伊徛佇台頂，佇以色列會眾面前跪落去，攑雙手向天，

¹⁴ 講：「上主 — 以色列的上帝，天頂地下無一個神明親像你；你對許個一心一意順服你的僕人守約施慈愛。

¹⁵ 你有執守對你的僕人我的老父大闢的應允；你親嘴應允的，今仔日攏親手實現。

¹⁶ 上主 — 以色列的上帝，求你實現對你的僕人我的老父大闢的應允；你有講：『你的子孫若親像你佇我的面前謹慎生活，遵行我的律法，你的後代就會永遠坐以色列的王位。』

¹⁷ 上主 — 以色列的上帝，你對你的僕人大闢所講的，求你實現。

¹⁸ 「上帝啊，你豈真正欲及世間人住佇地上？天及天頂的天都無夠通互你住，何況我所起此間聖殿？

¹⁹ 上主 — 我的上帝，求你俯落聽你的僕人的祈禱懇求，聽你的僕人佇你面前的求叫祈禱。

²⁰ 願你暝日看顧此個聖殿，就是你講你欲臨在的所在。你的僕人向此個所在祈禱的時，求你聽。

²¹ 你的僕人及你的子民以色列向此所在祈禱的時，願你對天頂，你住的所在，聽阮的祈求，赦免阮。

²² 「人若得罪厝邊，受迫著咒誓，伊來此間殿佇你的壇前咒誓伊是無辜的，

²³ 求你對天頂俯落聽來辦理，審判你諸個僕人：歹人，照伊的歹給伊報應；無辜的，定伊做無罪，照伊的正直給伊報賞。

²⁴ 「你的子民以色列若得罪你，互對敵拍敗，𪜶若反悔歸向你，宣認你的名，閣佇此間聖殿對你祈禱懇求，

²⁵ 求你對天頂俯落聽，赦免你的子民以色列的罪，互𪜶倒來你所賞賜𪜶及𪜶列祖的地。

²⁶ 「𪜶若得罪你，你給天關密無落雨；你刑罰𪜶的時，𪜶若向此所在祈禱，宣認你的名，離開𪜶的罪惡，

²⁷ 求你對天頂俯落聽𪜶的祈禱，赦免你的僕人及你的子民以色列的罪，教示𪜶行正直的路，閣落雨佇你賞賜𪜶做產業的地。

²⁸ 「此個地若有飢荒、瘟疫、火燒風、病害、草蜢、草蜢公，抑是對敵圍困𪜶的城，無論有什麼災禍，什麼大病，

²⁹ 你的子民以色列中若有人知家己的災禍苦痛，向此個聖殿攑手迫切懇求，

³⁰ 求你對天頂，你徛起的所在，俯落聽來赦免𪜶；因為你知𪜶的心，嘛只有你知世間人的心，願你照𪜶逐個人的行做對待𪜶，

³¹ 互𪜶佇你賞賜阮列祖的地，一世人敬畏你，行你的道路。

³² 「若有外國人，毋是屬你的子民以色列的，因為聽著你的大名、大權能的作為，及你救助的手骨，對真遠的所在來，向此個殿祈禱，

³³ 求你對天頂，你徛起的所在，聽𪜶的祈求，照外國人一切對你懇求的來做，互天下萬民攏會親像你的子民以色列像款，識你的名，敬畏你；閣互𪜶知此個聖殿是敬拜求叫你的所在。

³⁴ 「你的子民奉你的命令，無論出去什麼所在及對敵交戰的時，若向你所揀選的城，及我為著你的名起的殿對你祈禱，

³⁵ 求你對天頂聽𪜶的祈禱懇求，互𪜶得勝。

³⁶ 「世間無一個人無犯罪，毋拘你的子民若得罪你，你對𪜶受氣，將𪜶交互對敵，給𪜶掠去外地，無論遠抑是近，

³⁷ 𪜶若佇互人掠去的地回心轉意，閣佇𪜶受掠的地悔改，對你哀求：『阮有罪，阮背逆，阮做歹。』

³⁸ 𪜶若佇對敵掠𪜶去的地，全心全意歸順你，閣向你賞賜𪜶列祖的地，及你所揀選的城，以及我奉你的名起的殿，對你祈禱，

³⁹ 求你對天頂，你徛起的所在，聽𪜶的祈禱懇求，照公道對待𪜶，閣赦免許個得罪你的子民。

⁴⁰ 「我的上帝啊，今求你開目睭看，俯耳孔聽佇遮所獻的祈禱。

⁴¹ 主上帝，求你起來； 你及你有氣力的約櫃做夥入去你歇睏的所在。 主上帝，願你的祭司用救恩做衫穿； 願你聖的子民因為得著福氣歡喜快樂。

⁴² 主上帝，求你毋通棄拺你抹油揀選的君王； 著帶念你施落互你的僕人大闢的慈愛。」