歷代志下卷 5 - 現代台語譯本漢字版

¹ 按呢，所羅門王完成上主聖殿一切的工。所羅門將伊的老父大闢所獻的金、銀，及器具攏帶入去下佇上帝聖殿的府庫。

迎接約櫃入聖殿

² 彼時，所羅門召集以色列的長老、逐支族的首領，以及逐宗族的族長來耶路撒冷，欲迎接上主的約櫃，對錫安的大闢城運起來聖殿。

³ 七月的節期，以色列人攏聚集佇王遐。

⁴ 以色列的長老攏來，許個利未人就扛約櫃起來。

⁵ 祭司及利未人將約櫃、會幕，以及布棚內一切聖的器具扛入聖殿。

⁶ 所羅門王及聚集佇伊遐的以色列全會眾，佇約櫃前獻牛、羊做祭物，祭物多甲𣍐算得。

⁷ 祭司扛上主的約櫃入內殿，就是至聖所，下佇指定的所在，天使基路伯翼股下面。

⁸ 基路伯佇下約櫃的所在的頂面搋開𪜶的翼，遮蓋約櫃及扛約櫃的槓。

⁹ 槓真長，槓尾佇內殿前的聖所看會著，對外面就𣍐當看著；到今仔日槓猶佇遐。

¹⁰ 約櫃內面只有兩塊石版，以外攏無別項物；石版是以色列人出埃及地，上主佇何烈山及𪜶立約的時摩西所下的。

上主的榮光

¹¹ 所有佇聖殿無論屬叨一個班次服事的祭司，攏已經潔淨家己。𪜶對聖殿出來的時，

¹² 利未人的中間負責獻詩的，就是亞薩、希幔、耶杜頓，以及𪜶的後代及親族，攏穿幼麻布的衫，徛佇祭壇的東旁，提鐃鈸、瑟，及琴；閣有百二個祭司提喇叭及𪜶做夥佇遐。

¹³ 許個歕喇叭的、唱歌的，和諧齊聲，稱讚感謝上主。𪜶用喇叭、鐃鈸、樂器伴奏，大聲稱讚上主講： 上主至善， 伊的慈愛續到永遠。 彼時，上主的殿互雲充滿；

¹⁴ 因為按呢，祭司𣍐當繼續服事；上主的榮光充滿上帝的殿。