歷代志下卷 32 - 現代台語譯本漢字版

亞述威脅耶路撒冷

¹ 希西家忠誠做諸個代誌以後，亞述王西拿基立上來侵略猶大，圍困堅固的城，想欲攻取諸個城。

² 希西家看見西拿基立已經來，知影伊一定欲攻打耶路撒冷，

³ 就及許個首領以及勇士參詳，欲塞密城外的水源；𪜶攏支持伊。

⁴ 真多人民聚集，塞密所有的水源及流過彼地區的溪，講：「哪著互亞述許個王有真多水通飲？」

⁵ 希西家奮發，修建損壞的城牆，起造城樓，佇城外閣起一座牆，加強大闢城的米羅，閣製造真多軍器及盾牌。

⁶ 希西家有設立軍事將領管理人民；伊召集𪜶來城門的廣場，激勵𪜶，講：

⁷ 「著堅強勇敢，毋通因為亞述王及伊的大軍隊驚惶失膽；因為及咱同在的，比及𪜶同在的較強；

⁸ 及𪜶同在的是肉體的手骨，及咱同在的是上主 — 咱的上帝，伊欲幫贊咱，替咱交戰。」人民因為猶大王希西家的話得著真大的鼓勵。

⁹ 後來，亞述王西拿基立及伊的全軍攻打拉吉的時，派伊的人臣去耶路撒冷見猶大王希西家及所有耶路撒冷的猶大人，講：

¹⁰ 「亞述王西拿基立按呢講：『恁啲靠什麼，耶路撒冷受圍困，恁猶啲守？

¹¹ 希西家講，上主 — 恁的上帝會救恁脫離亞述王的手。伊按呢是啲騙恁，結局會害恁枵死，嘴焦死。

¹² 此個希西家豈毋是有廢除上帝的山頭壇及祭壇，閣給猶大及耶路撒冷的人講：恁一定著佇耶路撒冷此個祭壇敬拜燒香？

¹³ 恁豈毋知我及我的列祖按怎對付列國的人民？萬國的眾神明豈曾救家己的國脫離我的手？

¹⁴ 我的列祖消滅的國家，𪜶的神明叨一個有救伊的人民脫離我的手？按呢，恁的上帝哪會當救恁脫離我的手頭？

¹⁵ 所以，毋通互希西家騙去，給恁迷惑，嘛毋通相信伊；因為無任何一個國家的神明會救伊的人民脫離我及我的列祖的手；恁的上帝，伊嘛一定𣍐當救恁脫離我的手！』」

¹⁶ 西拿基立的人臣講真多褻瀆主上帝及伊的僕人希西家的話。

¹⁷ 西拿基立閣寫批謗瀆上主 — 以色列的上帝，譏刺伊講：「列邦的神明既然𣍐當救𪜶的人民脫離我的手，希西家的上帝嘛𣍐當救伊的人民脫離我的手。」

¹⁸ 西拿基立的人臣用猶大話，大聲對城牆頂的耶路撒冷人講話，給𪜶恐嚇，擾亂𪜶的心，通攻取此個城。

¹⁹ 𪜶談論耶路撒冷的上帝，親像啲講世間人的手所造的神明仝款。

²⁰ 希西家王及亞摩斯的子先知以賽亞為著此個事祈禱，向上帝求叫。

²¹ 上主就差一個使者入亞述王的營中，消滅許個強猛的戰士、官長，及將領。亞述王滿面見笑倒去伊的本國。有一日，伊入去伊的神明的廟，互伊幾個親生子用刀給伊刣死。

²² 按呢，上主解救希西家及耶路撒冷的住民脫離亞述王西拿基立及所有對敵的手，閣互𪜶四境平安。

²³ 此個代誌了後，希西家得著列國的尊敬。有真多人帶禮物來耶路撒冷，獻互上主，閣帶寶貝送猶大王希西家。

希西家破病及驕傲

²⁴ 彼個時陣，希西家病甲啲欲死，就對上主祈禱；上主給伊應允，閣互伊一個兆頭。

²⁵ 毋拘希西家因為驕傲，無照伊所得著的恩典報答上主；所以上主的審判臨到伊、猶大，及耶路撒冷。

²⁶ 後來，希西家及耶路撒冷的住民為著𪜶的驕傲謙卑認罪，上主就無佇希西家活啲的日給𪜶審判。

希西家的財富及尊榮

²⁷ 希西家有真多財富，閣真受人尊敬。伊為著家己起府庫，收囥金銀、寶石、香料、盾牌，及逐款貴重的物件；

²⁸ 伊閣起倉庫收囥五穀、新酒，及油，嘛為著牲生搭牛椆及羊椆。

²⁹ 伊閣起幾若個城，嘛有真多牛群、羊群，因為上帝有賞賜伊真多財富。

³⁰ 希西家佇基訓泉的出口截水，給水引落來到大闢城的西旁。希西家所做的逐項攏順利。

³¹ 毋拘，巴比倫許個領袖差使者來伊遐，欲了解猶大國所發生的奇事；佇此個事，上帝離開伊，欲考驗伊，愛知伊的心思意念。

希西家死

³² 希西家其他的事蹟，及伊對上主的忠誠，攏記載佇猶大及以色列列王史及亞摩斯的子先知以賽亞的默示書。

³³ 希西家轉去伊的列祖遐，安葬佇大闢子孫的墓地較高的所在。伊死的時，猶大人及耶路撒冷的住民攏為著伊哀傷，給伊致敬。伊的子瑪拿西續接伊作王。