歷代志下卷 31 - 現代台語譯本漢字版

希西家的改革

¹ 諸個代誌結束了，佇遐的以色列眾人就出去，去猶大逐個城拍碎石柱像，摃斷亞舍拉女神的柱像；閣佇猶大、便雅憫、以法蓮，及瑪拿西地區，拆毀所有的山頭壇及祭壇。了後，以色列眾人就倒去家己的所在。

² 希西家照逐個祭司及利未人的職務重新組織𪜶的班次，互𪜶通獻燒化祭及平安祭，閣佇上主聖殿的門內服事、感謝、頌讚。

³ 王閣對伊的產業奉獻牛羊做燒化祭；就是佇逐日早暗、安歇日、每月初一，及節期，照上主律法的規定獻燒化祭。

⁴ 希西家命令耶路撒冷的住民供給祭司及利未人應該得著的份額，互𪜶專心執行上主律法的規定。

⁵ 命令一下出，以色列人就帶真多頭水的五穀、酒、油、蜜，及園裡的出產來；閣帶逐項物的十分一來，數量真多。

⁶ 住佇猶大的城的以色列人及猶大人，嘛牽牛羊的十分一來；閣對聖化歸上主 — 𪜶的上帝的物提十分一，疊一堆一堆。

⁷ 對三月起，𪜶將許個物件疊做堆，到七月才結束。

⁸ 希西家及眾首領看著許個囤積的物件，就稱讚上主，祝福伊的子民以色列。

⁹ 希西家對祭司及利未人查問關係許個囤積的物件的代誌。

¹⁰ 撒督的後代大祭司亞撒利雅應講：「對人民帶禮物到上主的殿以來，阮攏有夠通食，閣賰真多，因為上主賜福伊的子民，所以賰即多。」

¹¹ 希西家命令著佇上主的殿內準備倉庫，𪜶就準備。

¹² 𪜶誠實將禮物及十分一的奉獻，以及聖化歸上主的物，攏搬入來。利未人歌楠雅負責此個事；伊的小弟示每做副主管。

¹³ 希西家王及管理上帝聖殿的亞撒利雅派耶歇、亞撒西雅、拿哈、亞撒黑、耶利摩、約撒拔、以利業、伊斯瑪基雅、瑪哈，及比拿雅，協助歌楠雅及伊的小弟示每。

¹⁴ 聖殿東門的守衛利未人音拿的子可利，負責管理甘心獻互上帝的物，閣分發獻互上主的禮物及許個至聖的物。

¹⁵ 佇祭司的城，有伊甸、米拿民、耶書亞、示瑪雅、亞瑪利雅、示迦尼諸個人做伊的助手，忠實將人民的奉獻，照𪜶的班次，無論大細，分發互𪜶的親族。

¹⁶ 有登錄佇家譜三十歲以上的查甫人，以及逐日佇上主的殿，照𪜶的職務及班次啲服事的人，嘛分互𪜶。

¹⁷ 𪜶閣分互照宗族登錄佇家譜的祭司，以及二十歲以上，照班次執行職務的利未人。

¹⁸ 𪜶閣分互全體會眾中間登錄佇家譜，有需要扶養的家屬 — 𪜶的某、兒女；因為𪜶忠實分別家己做聖。

¹⁹ 閣為著住佇城外草埔的亞倫後代的祭司，佇逐個城有指派人，將物件分互祭司家族的查甫人，以及有登錄佇家譜的利未人。

²⁰ 希西家佇猶大全地攏按呢辦理；伊做上主 — 伊的上帝看做好、正直、忠實的事。

²¹ 伊所做的，無論辦理上帝聖殿的事，遵行律法及誡命，攏尋求伊的上帝，專心去做，就事事亨通。