歷代志下卷 3 - 現代台語譯本漢字版

開始起造聖殿

¹ 所羅門佇耶路撒冷的摩利亞山動工起造上主的聖殿。此個所在早前是耶布斯人亞勞拿的五穀場；上主曾佇遮對所羅門的老父大闢顯現，所以大闢決定欲佇遮起聖殿。

² 所羅門作王第四年，二月初二，開始動工。

³ 所羅門欲起的上帝的殿的地基，長二十七公尺，闊九公尺。

⁴ 殿前的走廊闊九公尺，及殿平闊；高五十四公尺；內面貼純金。

⁵ 大殿的壁用松樹板蓋，用純金貼；頂面刻棗樹及鍊仔。

⁶ 彼間殿閣用寶石及巴瓦音的金裝飾。

⁷ 殿，包括殿的樑、戶橂、牆壁、門扇攏用金貼；壁頂刻天使基路伯。

⁸ 閣起至聖所，長九公尺，闊及聖殿的闊相像九公尺，攏貼純金，金的重量二十公噸。

⁹ 金釘仔重五百七十公克。頂面的部份嘛攏貼金。

¹⁰ 至聖所的內面雕刻一對天使基路伯，外面包金。

^11-12 兩個基路伯的翼攏總大約九公尺。第一個基路伯一旁的翼抵著此旁的壁，第二個一旁的翼抵著彼旁的壁；𪜶另外兩支翼佇殿的中央相磕；每一支翼長兩公尺二十公分。

¹³ 此兩個基路伯搋開翼，攏總約九公尺；𪜶的腳徛啲，面向入口。

¹⁴ 閣用藍色、紫色、朱紅色的紗，及幼麻布做帳，繡基路伯佇彼頂面。

兩支銅柱

¹⁵ 所羅門王佇殿前造兩支柱，高十五公尺半，每一支柱的柱斗高兩公尺二十公分。

¹⁶ 閣做鍊仔安佇柱斗；閣做石榴一百粒，安佇鍊仔頂。

¹⁷ 彼兩支柱𫞼佇殿前，一支佇正旁，一支佇倒旁；正旁彼支叫做雅斤，倒旁彼支叫做波阿斯。