歷代志下卷 24 - 現代台語譯本漢字版

猶大王約阿施

¹ 約阿施作王的時才七歲，佇耶路撒冷作王四十年；伊的老母叫做西比亞，是別是巴人。

² 祭司耶何耶大活啲的時，約阿施做上主看做好的事。

³ 耶何耶大給伊娶兩個某，伊有生後生查某子。

⁴ 後來約阿施決定欲整修上主的殿，

⁵ 就召集祭司及利未人，給𪜶講：「恁著去猶大逐個城，對以色列眾人收稅金，通逐年修理上帝的殿。恁著趕緊辦理此個事。」毋拘利未人無隨時辦理。

⁶ 王召𪜶的領袖耶何耶大來，對伊講：「上主的僕人摩西及以色列的會眾，有為著約櫃的會幕規定著納的稅，你是按怎攏無命令利未人對猶大及耶路撒冷徵收？」

⁷ 因為彼個歹婦仁人亞她利雅及隨伊的曾侵入上帝的殿，閣用上主殿內聖化歸上主的物獻互巴力。

⁸ 王就命令人做一個奉獻櫃，下佇上主聖殿的門外。

⁹ 伊閣對猶大及耶路撒冷的人民宣布，著照上帝的僕人摩西佇曠野所規定著獻的稅金，帶來獻互上主。

¹⁰ 所有的首領及人民攏歡喜帶來落佇奉獻櫃，到淀起來。

¹¹ 利未人看著奉獻櫃已經淀，就帶去互王派的官員；王的書記及大祭司的代表就來，將內面的銀收起來，才閣將奉獻櫃下轉去原位。𪜶逐日按呢做，收著的銀真多。

¹² 王及耶何耶大將錢交互監督整修上主聖殿的人；𪜶就倩拍石、作木、拍鐵，及拍銅的師傅修理上主的聖殿。

¹³ 做工的人攏認真做工，修理的工程就順利完成；上帝的聖殿回復親像以前，閣真堅固。

¹⁴ 完工了後，𪜶將所賰的錢交互王及耶何耶大，提來造上主殿內的器具，就是服事及獻燒化祭的器具；閣造囥香的𥐵仔以及金銀的器具。耶何耶大活啲的時，人常常佇上主的聖殿獻燒化祭。

耶何耶大的改革受廢除

¹⁵ 耶何耶大年老，歲壽足，就死；死的時一百三十歲。

¹⁶ 人將伊及列王做夥安葬佇大闢城；因為伊佇以色列中為上帝及上帝的殿有真大的貢獻。

¹⁷ 耶何耶大死了，猶大眾首領來朝見王；王接受𪜶的意見。

¹⁸ 王及眾首領放拺上主 — 𪜶列祖的上帝的殿，去服事亞舍拉女神及偶像。𪜶犯此個罪，上帝的大受氣就臨到猶大及耶路撒冷。

¹⁹ 雖然上主差先知去𪜶遐欲導𪜶歸向上主；先知給𪜶警告，毋拘𪜶毋聽。

²⁰ 彼時上帝的神臨到祭司耶何耶大的子撒迦利亞；伊徛佇高的所在對人民講：「上帝按呢講：『恁是按怎違背上主的誡命，致到𣍐亨通繁榮？因為恁棄拺上主，上主嘛棄拺恁。』」

²¹ 𪜶共謀欲害撒迦利亞，就照王的命令，佇上主聖殿的埕，用石頭給伊抌死。

²² 約阿施王無帶念撒迦利亞的老父耶何耶大對伊的恩情，害死耶何耶大的子。撒迦利亞死的時，講：「願上主監察申冤！」

約阿施受刣

²³ 年尾，敘利亞的軍兵上來攻擊約阿施，來到猶大及耶路撒冷，刣死人民的首領，將所搶的戰利品運去大馬士革王遐。

²⁴ 敘利亞的軍兵只有一小隊的人，毋拘上主互𪜶拍敗猶大大軍，是因為猶大放拺上主 — 𪜶列祖的上帝，才用按呢責罰約阿施。

²⁵ 約阿施受重傷。敘利亞的軍兵撤退了後，約阿施的人臣背叛伊，為著報復伊殺害祭司耶何耶大許個子，將伊刣死佇伊家己的眠床。人將伊安葬佇大闢城，毋拘無及列王埋做夥。

²⁶ 背叛伊的是亞捫的婦仁人示米押的子撒拔，及摩押的婦仁人示米利的子約薩拔。

²⁷ 有關約阿施許個子，及對伊的預言，以及伊整修上帝聖殿的事蹟，攏記載佇列王評論集。伊的子亞瑪謝續接伊作王。