歷代志下卷 23 - 現代台語譯本漢字版

推翻亞她利雅

¹ 第七年，耶何耶大勇敢採取行動；召集導一百個兵的軍官耶羅罕的子亞撒利雅、約哈難的子以實瑪利、俄備得的子亞撒利雅、亞大雅的子瑪西雅、細基利的子以利沙法，來及伊立約。

² 𪜶行透猶大，對猶大許個城聚集利未人及以色列逐宗族的族長來耶路撒冷。

³ 所有的會眾佇上帝的殿及王立約。耶何耶大對𪜶講：「恁看，王的子佇遮！照上主對大闢後代的應允，伊一定著作王。

⁴ 今，恁著按呢做：恁諸個祭司及利未人，佇安歇日值班的時，著三分一顧守聖殿所有的門，

⁵ 三分一顧守王宮，三分一顧守根基門；會眾攏著佇上主聖殿的埕。

⁶ 所有的人民攏毋通進入上主的殿；只有祭司及啲服事的利未人通入去，因為𪜶有聖化歸上主。所有的人民著遵守上主的命令。

⁷ 利未人著帶軍器，佇王的四圍保護；所有進入聖殿的人著互伊死；王無論佇叨位，恁攏著跟隨保護伊。」

⁸ 利未人及猶大眾人，攏照祭司耶何耶大的命令去做；逐個人帶𪜶的部下，無論安歇日值班抑是無值班的人攏來；因為祭司耶何耶大毋准𪜶離開。

⁹ 祭司耶何耶大就將囥佇上帝聖殿內面大闢王的槍及大細盾牌，交互許個管一百個兵的軍官。

¹⁰ 耶何耶大閣將軍器分互人民；𪜶佇祭壇及聖殿遐，對殿的南旁到北旁，徛佇王的四圍保護。

¹¹ 𪜶就導約阿施出來，給伊戴王冠，將有關王權的約書交互伊；耶何耶大及伊許個子給伊抹油，設立伊作王；𪜶喝講：「願王萬歲！」

¹² 亞她利雅聽著人民那走那謳咾王的聲，就去到聚集佇上主聖殿的人民遐，

¹³ 看著王徛佇聖殿入口的柱邊，官長及歕喇叭的人徛佇王的邊仔；國內的人民攏歡喜，歕喇叭；閣有唱歌的，用逐款的樂器導人民唱歌謳咾。亞她利雅就拆裂伊的衫，喝講：「造反啦，造反啦！」

¹⁴ 祭司耶何耶大導許個管一百個兵的軍官出來，因為伊毋愛有人佇上主的聖殿互人刣死，就對𪜶講：「給伊對隊伍的中間趕出去；欲隨伊的，著互伊死。」

¹⁵ 𪜶閃開雙旁互亞她利雅過去；伊到進入王宮的馬門，就佇遐互人刣死。

耶何耶大的改革

¹⁶ 耶何耶大及王以及人民做夥立約，欲做上主的子民。

¹⁷ 對按呢，全國的人民攏給巴力的廟拆毀，拍碎祭壇及偶像，閣佇壇前拍死巴力的祭司馬坦。

¹⁸ 耶何耶大派利未人做祭司的負責顧守上主的聖殿。諸個祭司是照大闢以前的規定，啲負責上主聖殿的職務；照摩西的律法，歡喜稱讚，向上主獻燒化祭。

¹⁹ 伊嘛派人顧守上主聖殿逐個門；無論什麼緣故，禮儀上無清氣的人攏𣍐用得入去。

²⁰ 耶何耶大閣導軍官及貴族，民間的首領及全國人民，請王對上主的聖殿落來；對正門進入王宮，互伊坐王位。

²¹ 全國人民攏歡喜快樂，全城攏平靜；亞她利雅已經互人刣死。