歷代志下卷 22 - 現代台語譯本漢字版

猶大王亞哈謝

¹ 耶路撒冷的住民設立約蘭的煞尾子亞哈謝續接伊作王；因為及阿拉伯人做夥來攻城的軍隊，將亞哈謝的兄哥攏刣死。按呢猶大王約蘭的子亞哈謝就作王。

² 亞哈謝坐位的時二十二歲，佇耶路撒冷作王一年。伊的老母叫做亞她利雅，是以色列王暗利的查某孫。

³ 伊嘛行亞哈家的路；因為伊的老母教伊做歹。

⁴ 伊親像亞哈家做上主看做歹的事；因為伊的老父死了後，亞哈家的人來教伊做歹致到伊滅亡。

⁵ 伊接受𪜶的計策，及以色列王亞哈的子約何蘭做夥去基列的拉末，及敘利亞王哈薛交戰；敘利亞人拍傷約何蘭。

⁶ 約何蘭倒去耶斯列，欲醫治伊佇拉末及敘利亞王哈薛交戰的時所受的傷。約蘭的子猶大王亞哈謝落去耶斯列，探訪亞哈的子約何蘭，因為伊破病。

⁷ 亞哈謝來看約何蘭，煞抵著陷害，這是出佇上帝的意思。伊佇遐的時，及約何蘭出去，抵著寧示的孫耶戶；上主有選立耶戶，欲互伊消滅亞哈家。

⁸ 耶戶啲執行上帝的審判，刑罰亞哈家的時，抵著猶大許個領袖，及亞哈謝兄哥的子 — 𪜶攏是啲侍候亞哈謝；耶戶將𪜶攏刣死。

⁹ 亞哈謝匿佇撒馬利亞，耶戶派人去掠伊；人尋著伊，給伊帶去耶戶遐，將伊刣死。人給伊埋葬，因為𪜶講：「伊是彼個專心尋求上主的約沙法的孫。」按呢，亞哈謝的家無人有能力維持王權。

亞她利雅篡位

¹⁰ 亞哈謝的老母亞她利雅一下知伊的子受殺害，就起來剿滅猶大王室所有的後代。

¹¹ 毋拘約蘭王的查某子約示芭，將亞哈謝的子約阿施，對許個受刣的王子中偷抱出來，將伊及伊的奶母藏佇聖殿的睏房，無互亞她利雅知，互約阿施免受殺害。約示芭是亞哈謝的小妹，祭司耶何耶大的某。

¹² 亞她利雅治理猶大國的時，約阿施及伊的奶母做夥匿佇上帝的殿六年久。