歷代志下卷 20 - 現代台語譯本漢字版

及以東交戰

¹ 過無偌久，摩押人及亞捫人，閣有一寡米烏尼人，做夥來欲攻擊約沙法。

² 有人來報告約沙法講：「對海彼旁以東遐有大軍隊來攻擊。𪜶現在佇哈洗遜‧他瑪 (就是隱‧基底)。」

³ 約沙法非常驚，決定欲懇求上主，宣布猶大全地禁食。

⁴ 猶大人就聚集，求上主幫贊；猶大逐個城攏有人出來尋求上主。

⁵ 約沙法就佇猶大及耶路撒冷的大會中，徛佇上主聖殿新的埕的頭前，

⁶ 祈禱講：「上主 — 阮列祖的上帝，你豈毋是佇天裡的上帝？你豈毋是萬邦萬國的主宰？佇你的手有權能有氣力，無一個會當對抗你。

⁷ 阮的上帝，你曾佇你子民以色列人的面前趕出此個地的住民，將此個地永遠賜互你的朋友亞伯拉罕的後代。

⁸ 𪜶就住佇此個地，閣為著榮耀你的名佇遮起聖殿，講：

⁹ 『若有災禍臨到阮，無論是刀劍、責罰、瘟疫、飢荒，阮欲徛佇此間聖殿的頭前，佇你的面前為著阮的患難求叫你；你欲聽來解救，因為你臨在佇此間殿。』

¹⁰ 「早前，阮的祖先出埃及地的時，你不准𪜶侵犯亞捫人、摩押人，及以東人的土地，阮的祖先就踅對別條路，無給𪜶消滅。

¹¹ 現在，𪜶來欲趕逐阮離開你賞賜互阮做產業的土地；𪜶竟然按呢回報阮。

¹² 阮的上帝啊，你無欲責罰𪜶是無？阮無氣力通對抗諸個來攻擊阮的大軍隊，嘛毋知著按怎做，毋拘阮欲仰望你。」

¹³ 猶大眾人，及𪜶的細漢囝仔、𪜶的某、𪜶的子兒，攏徛佇上主的面前。

¹⁴ 彼時，上主的神佇大會中臨到雅哈悉；伊是利未人亞薩的後代，瑪他尼的元孫，耶利的曾孫，比拿雅的孫，撒迦利亞的子。

¹⁵ 伊講：「猶大眾人、耶路撒冷的住民，及約沙法王，著注意聽！上主對恁按呢講：『毋免因為此個大軍隊驚惶失膽，因為戰爭的勝敗不在佇恁，是在佇上帝。

¹⁶ 明仔載恁著落去迎戰；𪜶對洗斯山坪上來，恁會佇耶魯伊勒曠野頭前的山谷口抵著𪜶。

¹⁷ 猶大及耶路撒冷人，此遍恁毋免出手交戰；恁只有排陣徛啲，看上主按怎解救恁。毋免驚惶，毋免失膽！明仔載出去迎戰，上主會及恁同在。』」

¹⁸ 約沙法俯頭仆佇土腳；猶大眾人及耶路撒冷的住民嘛仆佇上主的面前，敬拜上主。

¹⁹ 哥轄宗族及可拉宗族的利未人攏徛起來，用極大的聲稱讚上主 — 以色列的上帝。

²⁰ 隔日𪜶早早起來，出去提哥亞的曠野；出去的時，約沙法徛啲，講：「猶大人及耶路撒冷的住民，聽我講，恁著信上主 — 恁的上帝，就會徛在；信伊的先知就會得勝。」

²¹ 伊及人民參詳了後，就設立唱歌稱讚上主的人，互𪜶行佇軍隊的頭前稱讚聖潔尊貴的上主，講：「著感謝上主，因為伊的慈愛續到永遠。」

²² 𪜶一下唱歌歡呼的時，上主派埋伏的兵攻擊許個來攻打猶大的亞捫、摩押，及以東人；諸個對敵就受拍敗。

²³ 亞捫及摩押人攻擊以東人，將𪜶全部剿滅；剿滅以東人了後，𪜶兩族閣互相殘殺。

²⁴ 猶大人到曠野的守望台，欲看許個大軍隊；一下看，看著身屍倒甲滿四界，無一個逃脫。

²⁵ 約沙法及伊的軍兵來抄戰利品，尋著真多牲生、財物、衣服、寶貝，多甲帶𣍐去。𪜶搶三日，因為物件真多。

²⁶ 第四日，𪜶聚集佇比拉迦的山谷；𪜶佇遐稱讚上主，所以彼所在叫做比拉迦山谷，到今仔日。

²⁷ 約沙法導猶大及耶路撒冷的人歡歡喜喜倒去耶路撒冷，因為上主互𪜶刣贏對敵。

²⁸ 𪜶彈琴，彈瑟，歕喇叭，來到耶路撒冷，進入上主的聖殿。

²⁹ 周圍列國聽見上主刣贏以色列的對敵，就真驚上帝。

³⁰ 按呢約沙法的國太平，因為伊的上帝賜伊四境平安。

約沙法統治結束

³¹ 約沙法坐位的時三十五歲，佇耶路撒冷做猶大王二十五年；伊的老母叫做阿蘇芭，是示利希的查某子。

³² 約沙法行伊老父亞撒的路，攏無偏離，做上主看做好的事。

³³ 毋拘山頭壇猶未廢除，人民嘛猶未堅心決意歸向𪜶列祖的上帝。

³⁴ 約沙法其他的事蹟，對頭到尾攏記載佇哈拿尼的子耶戶的冊；此本冊嘛收佇以色列列王史。

³⁵ 後來，猶大王約沙法及作惡多端的以色列王亞哈謝結盟。

³⁶ 兩個王做夥佇以旬‧迦別造船欲去他施。

³⁷ 彼時，瑪利沙人多大瓦的子以利以謝，講預言攻擊約沙法：「因為你及亞哈謝結盟，上主欲破壞你造的船。」船果然失事，𣍐當去他施。