歷代志下卷 2 - 現代台語譯本漢字版

所羅門準備起造聖殿

¹ 所羅門決定欲為著上主的名起聖殿，閣為家己的王國起宮殿。

² 所羅門就召集運搬的工人七萬，佇山裡拍石的八萬，督工的三千六百。

³ 所羅門派人去見泰爾王希蘭，講：「你曾運柏香柴互我的老父大闢起宮殿徛起，請你嘛按呢對待我。

⁴ 現在，我欲為著上主 — 我的上帝的名起聖殿，分別作聖獻互伊，通照以色列人永遠的規例，佇伊的面前燒香，常常排獻祭的餅，逐早暗、安歇日、初一，及上主 — 阮的上帝所定的節期，獻燒化祭。

⁵ 我所欲起的聖殿真大，因為阮的上帝真偉大，贏過所有的神明。

⁶ 天及天頂的天都無夠通互伊徛起，啥人會當為著伊起聖殿？我算什麼通為著伊起聖殿？我不過是起一間會當佇伊面前燒香獻祭的殿若定。

⁷ 今請你派一個真𠢕用金、銀、銅、鐵，及紫色、朱紅色、藍色的紗做工藝，閣真𠢕雕刻的師傅來我遮，通及我的老父大闢所準備佇猶大以及耶路撒冷許個𠢕的師傅做夥做工。

⁸ 閣請你對黎巴嫩運柏香樹、松樹、檀香樹的柴料來互我；我知你的工人𠢕剉黎巴嫩的樹。我會派人去協助你的工人。

⁹ 請為著我準備較多木材，因為我欲起的聖殿真大閣堂皇。

¹⁰ 你的工人剉樹，我會互𪜶小麥兩千公噸，大麥兩千公噸，酒四十萬公升，油四十萬公升。」

¹¹ 泰爾王希蘭給所羅門回批，講：「因為上主疼伊的子民，所以設立你做𪜶的王。」

¹² 希蘭閣講：「創造天地的上主 — 以色列的上帝應該受稱讚！伊賞賜大闢王一個有智慧的子，互伊有見識聰明，通為著上主起聖殿，閣為家己起宮殿。

¹³ 今我派一個𠢕閣聰明的人去，伊是我的師傅戶蘭。

¹⁴ 伊是但支族一個婦仁人的子，老父是泰爾人；伊真𠢕用金、銀、銅、鐵、石、柴，及紫色、藍色、幼麻、朱紅色的紗做工藝，嘛真𠢕雕刻，閣會曉設計人交互伊的逐款圖案；你通互伊及你𠢕的師傅，以及你的老父，我的主大闢，𠢕的師傅做夥做工。

¹⁵ 今我的主所講的小麥、大麥、油、酒，請運來互諸個工人。

¹⁶ 阮會照你所需要的，對黎巴嫩剉樹，縛做歸排浮佇海裡，運到約帕；你就通對遐運去耶路撒冷。」

¹⁷ 所羅門照伊的老父大闢所做的戶口普查，閣點算住佇以色列地所有的外族人，攏總有十五萬三千六百人。

¹⁸ 伊互七萬人做運搬的工人，八萬人佇山裡拍石，三千六百人監督𪜶做工。