歷代志下卷 19 - 現代台語譯本漢字版

先見責備約沙法

¹ 猶大王約沙法平安倒去到耶路撒冷的王宮。

² 哈拿尼的子先見耶戶出來迎接約沙法王，給伊講：「你哪會去幫贊歹人，疼怨恨上主的人？因為按呢，上主的受氣會臨到你。

³ 毋拘你猶有好的表現；你有對此個國家廢除亞舍拉女神的柱像，閣堅心決意尋求上帝。」

約沙法的改革

⁴ 約沙法住佇耶路撒冷；後來閣去民間巡視，對別是巴到以法蓮山區，導人民歸向上主 — 𪜶列祖的上帝。

⁵ 伊佇猶大全地逐個堅固的城設立審判官。

⁶ 伊對許個審判官講：「恁辦事著謹慎，因為恁審判毋是用人的權威，是奉上主的權柄；恁審判的時，上主會及恁同在。

⁷ 今恁著驚畏上主，謹慎辦事，因為上主 — 咱的上帝無容允不義，無偏袒，無收賄賂。」

⁸ 約沙法對利未人、祭司，及以色列族長的中間選派人，佇耶路撒冷為上主判決案件，調解紛爭。𪜶攏住佇耶路撒冷。

⁹ 伊閣命令𪜶講：「恁著驚畏上主，忠心誠實辦理代誌。

¹⁰ 住佇逐個城的同胞若有紛爭來尋恁，無論是為著刣人，抑是為著律法及誡命、規例及命令諸個代誌，恁著警戒𪜶，毋通得罪上主，才免上主的受氣臨到恁及恁的同胞。恁按呢做，就𣍐致到犯罪。

¹¹ 今，宗教案件由大祭司亞瑪利雅做最後的裁決；民事案件由猶大的族長以實瑪利的子西巴第雅做最後的裁決；利未人做官長協助恁。恁著好膽辦事。願上主及正直的人同在。」