歷代志下卷 18 - 現代台語譯本漢字版

先知米該雅警告亞哈

¹ 約沙法有真多財富閣真受尊敬；伊及以色列王亞哈結親。

² 過幾若年，伊落去撒馬利亞拜訪亞哈；亞哈為著伊及伊的跟隨，刣真多牛、羊，說服伊做夥去攻打基列的拉末。

³ 以色列王亞哈對猶大王約沙法講：「你欲及我做夥去攻打基列的拉末無？」 約沙法應講：「我的就是你的，我的人民就是你的人民，阮欲及你做夥去交戰。」

⁴ 約沙法閣對以色列王講：「請你先問上主的意思。」

⁵ 以色列王就召集先知四百人，問𪜶講：「阮通去攻打基列的拉末，抑是毋通？」 𪜶應講：「通去攻打；上帝欲將此個城交佇王的手。」

⁶ 約沙法講：「遮豈無閣有上主的先知互咱通問？」

⁷ 以色列王給約沙法講：「猶有一個人，是音拉的子米該雅，咱通對伊請問上主；毋拘我怨恨伊，因為伊對我講的預言無一項好，常常只有講災禍。」 約沙法講：「請王毋通按呢講。」

⁸ 以色列王就召一個官員來，講：「你趕緊去叫音拉的子米該雅來。」

⁹ 以色列王及猶大王約沙法佇撒馬利亞城門口的五穀場，穿禮服，坐佇𪜶的寶座；所有的先知攏佇𪜶的面前講預言。

¹⁰ 基拿拿的子西底家做鐵的角，講：「上主按呢講：『你欲用諸個鐵角觸敘利亞人，觸甲𪜶攏消滅。』」

¹¹ 所有的先知攏按呢預言講：「通去攻打基列的拉末，一定得勝，上主欲將此個城交佇王的手。」

¹² 彼個去叫米該雅的使者給伊講：「你看，所有的先知攏對王講好話。請你嘛及𪜶像款講好話。」

¹³ 米該雅講：「我指永活的上主咒誓，我的上帝講什麼，我就對王講什麼。」

¹⁴ 米該雅來到王的面前，王問伊講：「米該雅，阮通去攻打基列的拉末，抑是毋通？」 伊應講：「好啊，做你去攻打，一定會勝利；此個城會交佇恁的手。」

¹⁵ 王對伊講：「我著叫你咒誓幾遍，你才會奉上主的名對我講實在話？」

¹⁶ 米該雅講：「我看見以色列眾人親像無牧者的羊四散佇山裡；上主按呢講：『諸個人無主人；逐個人通平安倒去𪜶兜。』」

¹⁷ 以色列王對約沙法講：「我豈無給你講，此個人對我講的預言攏無好話，只有講災禍。」

¹⁸ 米該雅繼續講：「所以，著聽上主的話！我看見上主坐佇寶座，天頂的萬軍徛佇伊的正旁倒旁。

¹⁹ 上主講：『什麼人欲引誘以色列王亞哈，互伊去基列的拉末，死佇遐？』此個講按呢，彼個講按呢。

²⁰ 後來有一個神出來，徛佇上主的面前，講：『我去給伊引誘。』上主問伊講：『你欲按怎給引誘？』

²¹ 伊應講：『我欲出去做白賊的神，互許個先知講白賊。』上主講：『你給伊引誘，一定會成功。你去，照按呢做。』

²² 現在上主有互白賊的神入佇你諸個先知的嘴；上主宣布欲降災禍互你。」

²³ 基拿拿的子西底家行進前，搧米該雅的嘴䩃，講：「上主的神什麼時離開我來對你講話？」

²⁴ 米該雅講：「你去匿佇密房彼日就會知。」

²⁵ 以色列王講：「將米該雅掠起來，交互市長亞們及王的子約阿施，

²⁶ 給𪜶講：『王交代：將此個人關落監，互伊一屑仔餅及水就好，聽候我平安倒來。』」

²⁷ 米該雅講：「你若真正平安倒來，就是上主無託我講話。」閣講：「恁大家，著會記得我講的話！」

亞哈戰死

²⁸ 以色列王亞哈及猶大王約沙法去進攻基列的拉末。

²⁹ 以色列王對約沙法講：「我欲改裝上戰場，你通穿你的王服。」以色列王就改裝，𪜶就上陣。

³⁰ 敘利亞王有吩咐伊的戰車長講：「毋通及𪜶的士兵抑是官長交戰，只有及以色列王交戰。」

³¹ 戰車長看著約沙法就講：「此個一定是以色列王！」𪜶就斡去欲攻擊伊。約沙法一下喝救命，上主就幫贊伊。上帝互𪜶離開無閣趇伊。

³² 戰車長一下看著伊毋是以色列王，就越走無閣追伊。

³³ 有一個敘利亞的兵仔開弓，無拍算射入以色列王戰甲的敆綴。王給駛車的講：「我著重傷。緊踅翻頭，帶我離開戰場。」

³⁴ 彼日，交戰非常猛烈。有人扶以色列王，互伊徛佇車裡，面向敘利亞人；到下昏，差不多日落的時，伊就死。